يوميات مفروسة: المزنوق ::

الكاتب: جوافة
نشرت على الموقع بتاريخ: 26/01/2008

ياعيييييني كان نفسي أبقى جنبك دلوقتي وانت ف الزنقة السودة دي!! معلش؛ معلش ياما دقت ع الراس طبول؛ وهي دي يعني أول مرة تتزنق وتطلع منها.
طول ما دماغك شغالة وبتطلع أفكار وبتحل ف الآخر ما تقلقش، مع إن المرة دي زنقة واضحة ومافيهاش تلفيق ولا تحايل ولا مواربه ولا دياولوا ولا كدة ولا كدة.. أنا عارفة أنو لما عدى عليك وهو مش طايقك كان بيوريك العين الحمرا علشان ما تمدش بوزك في اللي هيحصل لحسن يظهر المستخبي ويقلب عليك بس إنت طبعا عاقل وراسييييي وبتفهم واديك قلتلك كلمتين كدة ع الماشي عن الحرية الشخصية من فرستك..

بس اللي حصل إنهم كسروا السور! وبقيت مزنوق زنقة بيضه!....
طب أنت كنت ساكت ومش هتساعد لو ماتوا واحد واحد وست ست وطفل طفل؛ لكن دول بقى اللي من كتر تعبهم كسروا السور اللي بينك وبينهم وقالولك الحقنا لحسن دة احنا جعانين وبنمووووووت! هتعمل ايييييييييييه؟ عموماً أنا متطمنة عليك وعارفة أنك عاقل وهتدبّرها ومتوقعة أنك تديهم بس بحدود وشوية وهتقفل السور ويا دار مادخلك شر ولو حد فيهم زودها ولا طمع في الضيافة ساعتها هيبقى معاك الحق إنك ترفض ومحدش ليه لوم عليك أصل أنا عارفاك ماتحبش حد يلومك.

بس تصدق بإيه...؛ أن الناس هناك اتنغنغوا قوي وواحد منهم بيقول أنو مقفلش محله ولا ربع ساعة وأنو باع كل البضاعة، وكان مكسب رفح 20 مليون جنيه في يوم.. والله جدعان يا عيال طالعين للشا كمكم "استفيد واطلع بأحسن مكسب وأقل خسارة".
مش يبقى أهطل ويقول أديلوا ولو صدقة أو بأرخص الأسعار.. ليه أهبل؟ ولا برياله؟ غير أنو هو كمان جعاااااااااااان
يلا مبروك علينا انت يا..... انت
وزغردي يالي مانتيش غرمانه.

اقرأ أيضاً:
رسائل فك الحصار 24 /7 /2006  
حملة المليار لفك الحصار.. فلسطين لن تموت.
رسائل فك الحصار دمج فكرتين
هالة الفيصل .. طاب الموت يا عرب
ماذا .... لو سلمت حماس؟؟