منذ سنة 1949، وأنا معجب بهذه القصيدة الأشهر، "لو...IF"، ولست معجباً بتاتاً بكاتبها، (أول إنجليزي نال جائزة نوبل للآداب عام 1907م)، اللهم إلا بشجاعته أن يعلن موقفه الاستعماري، وحتى العنصري، دون تردد أو نفاق. رجعت إليها حين استشهدت بها في تعتعة الأسبوع الماضي "أغنية إلى الله"، فخطر لي أن أقدمها لناسنا بلغتنا القادرة، ترجمتـُها إلى الفصحى، فاختفى الشعر وبقي ما يشبه الحكم والنصائح، فغلبت المثالية على القصيدة كأنها اللامبالاة، عارية من الجمال، أعدتُ ترجمتها إلى العامية المصرية، فأسعفتني أكثر، وتجلّت الصور شعراً(غالباً)، علماً بأنني التزمت–تقريباً- بحرفية النص الإنجليزي.
* لو يعـْـنِي قدرت تكون واعِي وْعاقلْ فاهمْ وجميع الناس مهزوزة حواليك: عومْ عالعايم ويقولوا دهـُهْ كلـُّـه بسببكْ!!
* لو يعني قدرت تكون واثق إنك ناجحْ مع إن الكل شاكك إنك ما انتشْ فالحْ تقوم انت تكمّل مش همّـك، لكن برضه: مش يمكن قالوا حاجهْ تهمّك!
* لو تقدر تستنى كفاية، من غير ما تـْمـِـلّ * لوتقدر تستحمل كدبة كدا ورا كدبة، منهمْ برضهْ ولا تـِسأل فيهم ولا تعمل يوم زييهم
* لو يوصلّك غـِـلّ وكره الواحد منهم، تقوم انت برضه ما تكرهْـهُـمشْ كل دهوَّه، ولا تتمنظر، ولا تعمل إنك وادْ ما حصلـْـشْ
* لو بتفكـّـر زي ما عايزْ، في اللي قصادكْ بس ما يكونش الفكر وبس، كلّ مُـرادكْ
* لوتقدر يا ابني تعيش خيبتك واللي جرى لكْ، زي ما بتعيش انتصاراتك راكب خـيلكْ، ما هي كلها يـُفَـط انت حاطِطـْها ما هي كورة وانت اللي شايـِطـْها
* لو تستحمل إنك تسمع نَـص كلامك "الحق، الجد، مافيش زيه"، يقولوه نفسُـهْ، بطريقة ملوية ومش هيّهْ يضحكوا بيها: على أي عبيط أو حد اهبلْ...
* لو تستحمل إن اللي اديت عمرك ليهْ كلـّهْ تشوفو يتكسّـرْ تنحني للأزمة، وتتأثرْ بس تقوم منها وتعافر تبنى ما الأول وتخاطر....
* لو تجمع نجاحاتك يعني كلها على بعْضْ، وتكوّمها كدا كومْ واحدْ وتغامر بيها: ... : يا "مَـلِـكْ" يا "كتابه"، وتقوم "خسران" فاتقول: "ماشي"، ولا تنطق كلمة، ولا تزنّ لْنَا، ولا تعيـّط وكإن ما فيش حاجة قد حصلت، كده من أصله !! "مالعود موجود وانتَا أصْله".
* لو تقدر تصدر لي أوامركْ لجناب جـِسْمَـكْ يعني تؤمر حضرة قلبك وجوارحك، كـلـَّـكْ على بعضك إنه "على الكل انه يواصل كدا بالعافية.." علشان قررت انك تدخل سكة جديدة، وكده تكمـّل مع إن ما عادشى حاجة عندك غير قولة "ياللا" "هيلا هبّهْ"، "كله على الله"!!
* لو تقدر تتكلم عادي مع كل الناس، وانت برضك مالي هدومك، ما نتاش منفوش ولو انت مصاحب إيه يعني "الريّس" نفسه، وف نفس الوقت ما تخسرشي أيها حرفوشْ تتبادلو لمسة حنيهْ، أو كلمة حلوة مندّية
* لو ما يقدرش أي حد إنه يمسّك، يكسر نِـفسك، أو يخدشْ حاجة من حِسك لا عدو يقصدهَا،...، ولا حتى حبيبْ مش قصدهْ، تفضل زي ما انتا برضه
* لو إنتا بتقدر يعنى كل إنسان سِوا عاش أو مات ولا بتبالغ لفلان بالذات
* لو كنت قـِدِرت تملاها ثانية بثانية دي"دقيقة" بحالها شوف يا ابني: "ستين ثانية" حاتعاتبك لو إنت مليتها بحاجات ماهيشْ قدّ قيمتها
* لو إنت صحيح كنت سامعني ولقيت نفسك تقدر ..، يعني يبقى انت الدنيا دي بحالها لأ والأدهى- واهو دا جمالها -: تبقى انت يا إبني "البني آدم" خلقةْ ربّك، حاسب! عندك!!
المواد والآراء المنشورة على هذا الموقع تعبر عن آراء أصحابها ولا تعبر بالضرورة عن رأي الموقع
Copyright @2010 Maganin.com, Established by: Prof.Dr. Wa-il Abou Hendy - , Powered by
GoOnWeb.Com
منذ سنة 1949، وأنا معجب بهذه القصيدة الأشهر، "لو...IF"، ولست معجباً بتاتاً بكاتبها،
