مدونات مجنونة عن استشارات مجانين (1) ::

الكاتب: مجنونة استشارات
نشرت على الموقع بتاريخ: 26/05/2005

 

بسم الله الرحمن الرحيم

أنا واحدة من المتصفحين الدائمين لاستشارات مجانين وعن قريب هبقى مريضة دائمة أو دكتورة خبيرة وهافتحلي موقع في الشارع اللي جنبكم بإذن الله، وبما أنني في موقع مجانين فيا ليت تخلوني أفضفض براحتي وبعدين عالجوني ..

بصراحة بعد القراءة والتحليل والتتبع والاستقراء وصلت لنظرية نفسية حديثة وهي أن كثرة المشاكل في اليومين دول أصلها ( لا مشكلة ) !!!!
فمع المعطيات والبراهين استنتجت أن كثرة عرض المشاكل وقراءة الناس لها يؤثر عليهم، خصوصًا أنه أصبح الآن فرض من الحكومة علشان تفتح موقع لازم تخصص على الأقل ثلثه استشارات، وبقيت المشاكل روتين يومي في حكاوي الناس وسهراتهم ..
- "شفت حسين حصلو ايه" ؟
ويرد التاني : - " لأ يا شيخ ده ميجيش ربع اللي حصل لمحمدين " ..
فحصل للناس نوع من الوسوسة أو مرض (( Obsessive )) ما أنا بقيت دكتورة وبشخص "عقبال الجميع"

فلو صنفنا المشاكل هتنقسم لثلاث أقسام :
1- رجالي
2- نسائي
3- الاثنان معًا (مشاكل اجتماعية)

متفقين طبعًا كلنا إن أغلبية مشاكل الرجال (الضعف الجنسي) ، كل واحد يقرأ مشكلة صاحبه بدون مقدمات يرجع ويسأل نفسه : "طيب وأنا أخباري ايه في دا كله ؟؟ .. لا لا دي العزوبية أهون من الفضايح . ولا خليني أسأل أحسن .. " !!!!

أما البنات بدون كلام (سلامة الغشاء)، مفيش وحدة تكمل قراءة المشكلة وبدل ما تضغط "التالي" تضغط: " أرسل مشكلتك" !!!

والمشاكل الإجتماعية بالتسلسل أصبحت :
( أولاً ) قسم للذكريات والفضفضة .. وكل واحد بيفكر التاني بماضيه المؤلم بعد ما كان مش فاكر مامتو اسمها ايه، ولا اللي الأستاذ باسه على تفوقه ولا جاره قرصه على قلة أدبه ورجعها للتحرشات ... الخ، ودا نعتبره الجزء الأول من الاستشارات والأساسي .

وبعدين يدخل الأزواج والزوجات للقراءة، وبعد قراءة الذكريات تبدأ الغيرة والشك ................ وتبدأ أسئلة (الجزء الثاني) من الاستشارات .

ثم يطور الأمر للاتهام والسب والضرب واللي آخرته عاهة مستديمة والي بتمثل لنا ( الجزء الثالث) للاستشارات من الإعاقة والعقد وعدم الثقة .. "هو أحلى مني/بعد ماعيني راحت؟/لأ هي أحلى مني وهتبص لغيري بعد ما اتحرقت .. " وهكذا ..

ثم قد يكون منهم لا قدر الله عاهة مأساوية وآخرها غرغرينا والي بتختم معاه بضغط وسكر وينتج لنا لا قدر الله (الجزء الرابع) من الاستشارات : فقدان حبيب أو قريب ومطلوب من الاستشاريين العون على الصبر والسلوان ..

وبكدة عرفنا سبب قلة استشارات شعب الأغا وراحة بالهم

إيه رأيكم ؟؟
مش تحليل يجنن ؟؟

من غير ما تقولوا عارفة انكم هتعرضوا موضوعي أو مشكلتي في قسم الموسوسين ..