تعليم مين، تعليم إيه، تعليم ليه!!! يا عم كبر.

تعليم مين، تعليم إيه، تعليم ليه!!! يا عم كبر. ::

الكاتب: د.بلال نور الدين
نشرت على الموقع بتاريخ: 15/02/2005

بداية أريد أن أعتذر إلى أخي الأكبر وأستاذي الأستاذ الدكتور وائل أبو هندي جزاه الله عنا وعن المسلمين خيرا على ما قام به من تأسيس ورعاية ذلك الموقع الرائع.

وأعتذر له عن استخدامي للهجة العامية المصرية وأعلم جيدا أنه من أشد محبي لغتنا العربية الجميلة وأنا أيضا أحب تلك اللغة الفصحى لغة القرآن الكريم ولغة أهل الجنة التي ارتضاها لنا المولى عز وجل وأعتذر أيضا للأخ العراقي الذي كان قد اعترض على استخدام اللغة العامية المصرية بكثافة في موقع مجانين وقام دكتور وائل بالرد على ذلك.

لكني اضطررت إلى استخدام اللغة العامية لأن الحوار أصلا كان قد تم أمامي باللغة العامية وأجد أن اللغة العامية أسهل على الوصول إلى قلوب الناس واستشعار الموقف أكثر من اللغة الفصحى وأخيرا أعتذر عن الإطالة في المقدمة.

كنت بالقريب عند زميل لي لزيارته وعندما دخلت غرفته وجدته كونتاكت على النت وكان بيشيت مع إحدى الفتيات ومع النظر إلى المحادثة ظننت أن صاحبة هذه الكلمة بالضرورة صاحبه عقليه تُحترم فطلبت منه أن يسألها عن عدد الساعات التي تقضيها على النت فقالت له أنا minimum بتاعي تشاتنج بس 6 ساعات فقلت له اسألها عن مجال دراستها فقالت أنها في سنه 6 طب بشري، فقلت له اسألها بتذاكري إمته ولا بتحضري محاضراتك إمته وبتعيشي أصلا إمته؟

وكانت المفاجأة واحده في 6 طب ومن القاهرة في حي الدقي وبنت وردت بكل ثقة وبرود (تعليم مين تعليم إيه تعليم ليه يا عم كبر) وكانت الكلمة لها وقع الصدمة علي لما اللي 6 بشرى بتقول كده أمال اللي في أولى دبلوم ولا معهد تقول إيه!!! ألحقونا يا بشر روحنا في داهية.

المهم بعد تقبل الصدمة فكرت ببساطه في هذه الجملة وهداني عقلي إلى الآتي:
1. تعليم مين:
عندها حق، تعليم مين؟ مين اللي هيتعلم؟
طلبة مفيش في دماغهم غير رنة موبايل جديدة ويا سلام لو كانت بوليفونيك أو أجنبي مع إنه مش فاهم الأغنية بتقول إيه بس أهو والسلام-أو ريموت وطبعا مش ريموت TVعادي لالالالا ريموت بتاع ريسيفر أو عربية ع الزيرو.

والبنت كل اللي يهمها هتلبس ايه النهارده يجسدها أكتر ويغري بيها الشباب أكتر وخارجة بتفكر تعمل إيه تلفت بيه انتباه البشر وعاوزه تنقيلها واد مروش يكون شعره فنكوش يقولها شوية كلام مهروش، والواد كل اللي في دماغه عاوز عدة بكاميرا والألبوم الأخير للمطرب المرعوش وإزاي يمسك سيجاره merit –قال يعني الدكاترة اللي بيشربوا سجاير بيشربوها وهو عاوز ينوبه من الحب جانب، وإزاي يذل أنفاس أهله ويبجح في أمه ومفيش مانع يرفع إيده على أبوه وطبعا معذور الراجل إتخنق من البني آدم الدقة قديمة ده وهنعلم مين؟

عيال أبوهم كل اللي في دماغه الفلوس والفلوس والفلوس وكل اللي عليه في تربية عياله إنه يجيبلهم المليم كل يوم وبس وأم عمرها ما احترمت أبو العيال بالعكس بترد على تليفونات الواد والبت (يا ميدو يا ميدو يا واد يا ميدو رد على سيندي ويا سون سون يا بت كلمي صاحبك إيه...؟ اسمه إيه؟ طيب.. أنت اسمك إيه يا حبيبي؟ –ناقص تقوله أنت مين فيهم- هيثم؟؟ آه... اسمه جيمي يا حبيبتي طب يا مامي أنا جايه حالا أهي يا بني جايه ربنا يوفقكو يا رب وتعدو السنة دي) إيه يا حاجه في إيه صباح الخير أنت أم ولا سكرتيره سنترال وطباخة أوتيل؟
المهم خلينا في موضوعنا تعليم مييييييييييييييين!!!؟؟؟

2. تعليم إيه:
بالله عليك عايزك تبص كدا في المناهج الدراسية وأنت –سواء كنت متخصص أو غير متخصص- انظر إلى تلك المناهج وقيمها شكلا ومضمونا أن ما يتعلمه طالب ثانوي من 20 سنه هو هو اللي بيتعلمه حاليا، دول الخليج اللي إحنا بندعي إن إحنا أكثر تقدما منها قد أخذت بشعار وإن كان حتى شعار لمجرد أن يبقى لينا شعار وهو (نبدأ من حيث انتهى الآخرون) ونحن نرفع شعار (نبدأ من قبل ما بدأ الآخرين) – عشان نتأسس صح- الناس بتتكلم فيما وراء الطبيعة وإحنا بندرس الأرض كرويةٌ ولا بيضاويةٌ، مدرسين مبيعرفوش يقولوا كلمتين على بعض وكلام أصلاً مكلكع ميفهموش أستاذ الجامعة، إيه بتقولوا إيه، عاوزين الدليل؟؟

أوكي: كام مرة قابلت طالب في كليه من كليات القمة – اللي بيقولوا عليها قمة- مش عارف الفرق بين همزة الوصل وهمزة القطع؟ إذا كان أنا نفسي بتلخبط فيهم، والله العظيم حاجة تجنن العاقل وتعقل المجنون.

3. تعليم ليه:
ودي بالذات عندها حق فيها لأننا مش بقينا بلد بتاعة شهادات لا لا لا بقينا بلد بتاعة الواد الفهلوي الحرِِك المفتح اللي يعرف يجيب القرش من فم الحوت ولا أنا شايف قرش أصلا ولا شايف حوت وأول مره أعرف إن الحوت ممكن يأكل القرش، المهم زميل ليا فدى طب بشري عنده 28 سنة بسأله هو ليه إلى الآن لم يأخذ خطوة في الزواج فقال لي أن صافي دخله في الشهر لا يكفي لإقامة بيت والحلاق بتاعي (وعلاقتي به قوية والحمد لله) بيقول لي إن دخله صافي شهريا لا يقل عن 1500جنيه وهو لم يكمل تعليمه ولا حتى تعليم متوسط وكأني أرى لسان حال صاحبي بيقول جتنا نيله في حظنا الهباب، يا عم تعليم ليه؟؟

4. أخيراً يا عم كبر:
وهنا الاختلاف بقى، كل الجملة.. إلا يا عم كبر دي، نعم معاك في أننا نعيش فساد إداري خطير ونظام التربية على مستوى الفرد والأسرة والمجتمع نظام فاسد لا يصلح لإدارة الحياة، ونظم التعليم في بلادنا لا تخرج ولو حتى سائق تاكسي يجيد مهنتة، لكن أملنا الوحيد في إيجابية تسري في شرايين الأمة تحيى الشعوب بعد الممات فإن السلبية هي آخر مسمار يمكن أن يوضع في نعش هذه الأمة إن الأمل لا يحيا إلا بالفعل والفعل لا يكون إلا بالهمة والهمة لا تتجسد إلا بالإيجابية فنحن بحاجة إلى زرع الصفات الأساسية للبناء في نفوس أبناء هذه الأمة وأول هذه الصفات هي الإيجابية تجاه أنفسهم أولا ثم تجاه أسرهم ثم مجتمعاتهم ودينهم وهنا أتذكر دورة كان أحد أساتذتي في الجامعة قد دعاني إلى حضورها وكان موضوعها عن الإيجابية وبنهاية تلك الدورة كانت قد تغيرت الكثير من المفاهيم عندي وتمنيت لو علم بها كل إنسان في الوطن العربي لذا أحدثكم بها إن شاء الله في القريب العاجل.

د.بلال نور الدين.
belalnoureldeen@yahoo.com

روابط ذات صلة:
الحب والغيرة وأسئلةً كثيرة: وجهة نظر / جيل الماوس والموبايل والريموت كونترول / حكايات بنت الفرات: في مدرسة القرية / أساسيات في التعلم / المجتمع المصري وظاهرة رجل الأسرة الطيب / ثورة الأخلاق الاجتماعية..تجربة ونظرات / استراتيجيات لتحسين التركيز والذاكرة / الدردشة الالكترونية وحوار الأعماق / الحوار وقاية من العنف / المصريون والتعليم

الكاتب: د.بلال نور الدين
نشرت على الموقع بتاريخ: 15/02/2005