السلام عليكم ورحمة الله وبركاته؛أنا طالبة رابعة ليسانس ألسن. كنت في أجازة الصيف دخلت ولأول مرة كنت أدخل علي شات إسلامي علشان كنت عاوزة أعرف إيه النظام يا ترى ها يفيد معلوماتي الدينية أم لا؟ أما بعد أنا كنت في الشات مش بتكلم أنا بس بأشوف إيه اللي بيتم من غير كلام أو مشاركة مني, لكن كان في واحد بيتكلم وبيحكي حكايته مع الأغاني وإزاي بطلها وإزاي ربنا هداه والحمد الله أنا كنت بأستعمل نت البيت وكان كل شوية الخط يفصل وهو كان كتب اللينك إللى خلاه يبطل, المهم دخلت تاني وفي العام طلبت منه إنه يبعت لي لينك، المهم جاء لي على الخاص وبمنتهى الأدب والاحترام, وما كنش ينفع أخذه منه إلا على الماسنجر، المهم برضه إحنا اتفقنا على إن دا طبعا آخر شات ومجرد ما أخذت اللينك وبس.طبعا الأيام عدت وبقينا أصدقاء في حدود المعقول من غير تلفون ولا مقابلة ولا الكلام, وطبعا الصداقة تحولت إلى حب، وطلب مني إنه يكلم ماما وفعلا كلم ماما وهو كلم أهله في البيت وأخواته يكلموني. هو إنسان محترم جدا ومتدين جدا. بس المستوى الاجتماعي مش من نفس المستوي هو عنده 22 ولسه مش اشتغل وقال لي أول لما يجيء الشغل هيكلم بابا على طول، الحمد الله بطلت أغاني على يده وتعلمت وبتعلم منه حاجات كتير، وبالمناسبة موضوع المستوى دا مش فارق معايا بس ممكن يفرق مع بابا. مش عارفة إذا كنت أكمل معه ولا لا, أنا بجد تعلقت بيه وشايفة إنه مناسب وبيحبني وبيخاف علي, يعني كل ما يدل علي الحب، وهو ناوي كمان يشتغل بالصبح وبالنهار علشان يخلص وييجي، أرجو الإفادة. وشكرا.20/9/2005
