اضطراب هوية جنسية أنا شاب عندي 21 سنة طالب في كلية علمية من كليات القمة، مشكلتي أن عندي اضطراب هوية جنسية أنا عرفت كده بعد ما قرأت كتاب بيتكلم عن الأمراض النفسية من كام شهر بس وهشرحلك كل حاجة بالتفصيل، طفولتي مش فاكر منها كتير غير أني عمري ما كنت زي باقي الأولاد كنت دايما هادي مش بتكلم خجول جدا مش بحب ألعب مع باقي الأولاد ولا بحب لعبهم وما كنش لي أصدقاء لعبتي المفضلة كانت العروسة وطبعا بابا ما كنش بيشتريلي عرايس عشان كده كنت بستنى لما نزور قرايبنا وألعب مع بناتهم بعرايسهم، كنت كمان بحب ألبس جزم ماما وأحط الفوطة على رأسي كأنها شعر أو ألفها على وسطي كأنها جيبة.ماما شافتني مرة بس ما اهتمتش قالت لعب عيال، وأنا في ابتدائي حبيت زميلي طبعا وقتها ماكنتش أعرف كده وكنت فاكر إنه عادي، وفي الإعدادي بلغت وازدادت المشاعر جوايا وبرضة ماكنتش أعرف إن ده حاجة مش طبيعية ماكنتش أعرف حاجة عن البلوغ والجنس ماحدش في البيت كلمني، وأنا اتكسفت أسأل وما كنش ليا أصحاب أعرف منهم تصور كنت بحتلم وأنا ما عرفش إيه ده طبعا مشاعري كانت ناحية الأولاد كنت بحبهم زي أي بنت ما تحب ولد المهم بدأت أعرف شوية حاجات بالفطرة والتخمين وخصوصا من التلفزيون وكنت زي ما أنا ولد خجول جدا لدرجة إني كنت بتكسف أشتري حاجة من أي محل هادى مابتكلمش كنت في نظر الناس ولد مؤدب أوي أخلاقي زي البنات.وفي ثانوي ما فيش حاجة تغيرت بس بدأت أفهم أكتر وكنت بحب زميلي وكل ده وأنا ما عرفش إني مش طبيعي ولد خجول صامت ما ليش أصحاب وفي الجامعة كان ليا صاحب واحد كنت بسأله عن كل حاجة من غير ما يعرف إني بتكلم عن نفسي ومنه عرفت إن الراجل الطبيعي يفكر في بنت وفي أمور الجنس مع البنات وأنا عمري ما بصيت على بنت وحسيت بحاجة حتى لو لابسة حاجة عريانة بالعكس كانت مشاعري ناحية الرجال حاولت كتير إني أفكر في البنات زي صاحبي ماقدرتش والموضوع بقى خطير.بعد النت ما دخل من كام شهر لأني بدأت أدور على ناس زيي وللأسف لقيت كتير مستعدين لإقامة علاقة مع ولد بس مش زيي وعرفت ساعتها ليه الكتاب فصل بين مريض الهوية الجنسية واللوطي سيدي أنا بتعذب أنا مش عاوز أغضب ربنا. وعشان أكون صريح أنا كنت هقابل واحد منهم بس ربنا نجدني قبل ما أرتكب الذنب أنا مش عاوز بس الشطان شاطر وأنا مش قادر أمنع نفسي أنا الحمد لله لحد دلوقتي ما حصلش حاجة بس خايف أضعف وساعتها مش هسامح نفسي أبدا أرجوك أنا عايز حل مع العلم إني مش معايا فلوس لطبيب نفسي ولا أعرف أي طبيب نفسي وكمان مش هقدر أقول لبابا إنه يوديني لدكتور نفسي أنا مش عاوز حد يعرف خالص أنت عارف حساسية موضوع زي ده انا عايز حد يساعدني يأخذ بيدي ويلاقي حل لمشكلتي أرجوكم أتوسل إليكم ساعدوني أنا بموت في اليوم ألف مرة بسبب إني حاسس إني هفضل طول عمري كده انقذو شاب قبل ما أغضب ربي ، أقسم لك إني عمري ما فكرت في حد إني يعنى بنام معاه أو حاجة كل اللي كنت بفكر فيه إني بحبه ويحبني بس مش أكتر أنا أتمنى أن تفاصيل المشكلة تفضل سر يعني ماتتنشرش عشان أنا خايف حد يعرفني وشكرا وأرجو إخفاء بياناتي الخاصة وخصوصا الإيميل. 06/07/2007
