سيدي مشكلتي أو مأساتي هي مشكلة مزدوجة بس المشكلة الأولى لا تمثل لي خطورة ورضيت بقضاء الله أما المشكلة الأساسية وهي الأرق نعم الوحش الذي سيقضي علي أنا قريت أن سيدة سجلت أطول فترة يقظة 11يوم أنا بقى بقالي والله 6سنين عيني ما ذاقت طعم النوم بل ربما نسيت ما هو النوم.

بدأت المشكلة من أجازة 3 إعدادي وأنا الآن في سنة 4 كلية آداب علم اجتماع بدأت قبل النوم آخد3 ساعات عقبال ما أنام ثم تطور الأمر إلى عدم النوم نهائي ولا أحد يصدقني حتى كنت في الليل أنام مستيقظة على أن يأتي النوم فأفضل أفكر ماذا سأفعل غدا في المدرسة وألاقي فجأة ماما تصحيني من النوم عشان المدرسة وأنا منمتش قولت يمكن عشان ليل الشتاء قصير وأصبحت حين أنام عشان مستيقظة أحلم أحلام يقظة وتطور الأمر إلى أن أصبحت أألف قصص رائعة وأصبح أكتبها وبتعجب من حولي حتى قلت لدكتور المدرسة عن ذلك نصحني بأني أروح مستشفى عباس حلمي إخوتي قالوا علي إني مجنونة خفت يطلع علي كده، ولما دخلت الكلية روحت تخصص مخ وأعصاب ونفسية وعصبية وعطوني منوم ومهدئ وأنا أصلا كنت مجربة كل أنواع المنومات ما كنتش بتعمل أي حاجة بتسترخي جسمي لكن عقلي ومخي صاحي لو أخذته جسمي يكون هادي جدا ومش عايزة أكلمو لو مسكت حاجة تقع كتبت لي الدكتورة على برشام تريبتيزل لمدة شهر كل يوم واحدة10جرام ولو الحالة شديدة آخذ اثنين أنا طبعا ملقتشي إلا 25جرام وبقيت آخذ 2يعنى50جرام ولا بيعمل حاجة معايا أول يوم بس أكني ميتة وبعدين لو أخذت 10ميعملوش حاجة.
 
بقيت أسأل كل دكتور وكل الناس، أخذت كل الأعشاب اللي بتساعد على الاسترخاء والنوم ومش بقطع الصلاة وبقرأ القرآن أنا متدينة الحمد لله وبقول أدعية الأرق وأخذت التلبينة النبوية عشان النوم وجربت كل المنومات ولما رحت أولى كلية أتعالج من النحافة الدكتور بيقول لازم النوم وعلى فكرة كان وزني ساعتها 37 كيلو وسني17لحد ما أصبح وزني مع الدكتور المعالج 41كيلو مع إن الهرمونات كويسة وكمان الغدد كلها ومفيش أنيميا خالص وكنت بأخذ فاتح شهية وبرشام يعالج المعدة ومش بزيد من غير سبب قلت المهم النوم الأول جفوني اسودت وجحظت وجربت الإبر الصينية وكنت حآخذ إبرة الهرمونات بس كله قال إنها غلط بتنشط الخلايا السرطانية المهم الأول النوم وقالوا بعد الزواج حتتخني.

وعملت أشعة مقطعية على المخ ورسم مخ ومفيش حاجة مفيش دكتور عارف أي سبب لعدم النوم أنا نسيت النوم خالص آخر حاجة عملت حجامة حديثة للنوم وللنحافة المفروض تتعمل 3مرات في 3شهور وراء بعض خلتني عايزة آكل كل شوية وجعانة على طول وفي المرة الثانية خلتني أنام ساعة في الليل كله ومتقطعة بس الحمد لله وبعدين كنت بآكل على طول عشان شغلت المعدة ونشطتها بس متخنتش حتى نص كيلو وأصبحت أخس أكتر لحد ما بقيت عندي 21 سنة ووزنى 36 كيلو وعيني ما ذاقت طعم النوم م 3 إعدادي من غير سبب أنا إيماني قوي ومش بيأس من رحمة الله وبختم على طول الحمد لله ومحدش بيكرهني وبسامح كل الناس ومبعرفش أكره حد حتى لو أذاني بس خايفة من الفتن وإن الشيطان ييئسني من رحمة الله أنا صبرت 6سنين وبدعي الله وبتوكل عليه وبسأل عن علاجي محدش مصدقني ومحدش بيساعدني لحد ما أيقنت إني أكيد ملبوسة.
 
مش عارفة الفكرة دية أصبحت مسيطرة على نفسي وخايفة يجيلي اكتئاب وأمراض نفسية وأنا من النوع اللي بيكبت في نفسه وحساسة وخايفة يجيلي هلاوس أو أتخيل حاجات عشان بفكر في أي حاجة أو أحلم بيها يقظة بحسب إنها حصلت حقيقي وألاقي إني كنت بتخيل أرجوك سيدي ساعدني أنا قربت أدمر كل مدى ما بخس ومش بنام عملت ما في وسعي من أشعة وتحاليل غدد وهرمونات وأشعات على المخ والله المستعان وليقضي الله أمرا كان مفعولا لدرجة إني كنت بدعي ربنا إني يكون عندي أي مرض عشان أعالجه وأنام لكن كل معمل حاجة ألاقي إني طبيعية ومفيش حاجة قلت يمكن ملبوسة لأن مليش علاج أو أي مرض ساعدني أرجووووووووووووووووووك.

أرجو أن يرد على المشكلة الدكتور أحمد عبد الله وأنا من إسكندرية ولو تريدون أن أعرض نفسي على دكتور نفساني أنا معرفشي عيادات الرجاء دلوني بالعيادات في الإسكندرية وأنا سمعت إن هناك مستشفيات لاضطرابات النوم هل يوجد منها في بلدنا وسمعت عن دراسة النوم وهم بيضعوا المريض على أجهزة في أوقات النوم لمعرفة أسباب عدم النوم أرجوك أفدني بالمعلومات عن هذه الأشياء مع العلم بأن أي نصائح للنوم السليم التي يقولها أي دكتور لا تنفع معي ولا تمارين ولا أي شيء أنا أريد علاج لحالتي مش أنا اللي أعالج نفسي بنصائح لا تصلح لي لمثل هذا الأرق الأشد أزمانا.
ومعذرة على الإطالة

31/8/2007