مغناطيس للمصائب : شخصية حدية

ما لي غيركم.. اتعبت
  
يعطيكم العافيه؛ بتمنى الرد على الإيميل ورح ضل تابع الإيميل من اليوم وإن شالله كمان 10 سنين, ما رح أيأس منكو، بدي أحكي كل شيء بقلبي وذاكرتي يمكن أرتاح وألاقي عندكم العلاج ((وموضوع زيارة طبيب نفسي أنا مفكر فيه من سنين بس للفكرة الاجتماعية السائدة والخجل من الإنسان يلي وصلتيلوا عم يمنعني من إني فاتح أهلي بالموضوع -مع علمي المسبق لرفضهم الأكيد)).
  
رح طوّل شوي بس مو بإيدي لأنه صار لازم شوف لي حل، أنا عمري 18 سنة وبس أفكر بالسنين يلي مرت من أول ما وعيت على الدنيا ما بلاقي إلا إني مغناطيس للمصايب، وقت كان عمري 5 سنين تعرضت للتحرش من ابن الجيران وبعمر 7 سنين اتعرضت للتحرش من قريب إلي ولأني كنت مفكرة يلي بنعمله تسلية كنت أعمل نفس الشيء مع إخواني الصغار (3 و 5 )، بعمر 14 بلشت أفهم وأعرف إنو يلي صار معي غلط وصار الندم ياكلني من جوا لأني آذيت إخواتي وصرت خاف يكونوا بيتألموا ألمي بطريقه ما! لقيت إنو خيالي بخفف عني فصرت أسرح كتير ولسا هاد العيب مرافقني للجامعة وواخد وقتي وصحتي ومأثر على دراستي.
  
في مرحلة الطفولة مش عارفة ليش كنت أكره أهلي وما أطيقهم يعني لحتى سن 18 صرت أحبهم وأقدر تعبهم وتضحيتهم، هم عملوا كل شي مشاني أنا وأخواتي وراحتنا، بس ما بعرف ليش كنت أستنى الجامعة مشان أطلع من البيت وأرتاح، كنت دايماً حس أني بقلق كتير والأرق مرافقني وبعد ما قرأت عن الموضوع لقيت إنو عندي أعراض القلق المزمن وبعرف إنو عندي وسواس قهري كمان.
  
ضليت إنسانة متماسكة وبحاول صلّح من حالي ومتفوقة بكل شي بعمله لحتى قبل سنتين من الجامعة ((عمر 17 تقريباً))، اتعرضت لمحاولة اعتداء وترهيب من رجل غريب ((ما رح أدخل بالتفاصيل))، وقتها انهرت انهيارا كاملا فقدت الثقة كلياً ودخلت في حالة اكتئاب وعشت فترة طويلة كلها هلوسات ووساوس وكل الأعراض يلي ذكرتهم عن ((نوبات الهوس)).
  
أهم فترة بحياتي يلي من المفترض أقضيها دراسة مشان أحقق أحلام أهلي قضيتها وأنا بفكر بالطريقة يلي لازم موت فيها، صرت أتخيل حالي وأنا بطعن بحالي بسكين أو بقطع براسي أو... أو.... أو..... حتى أني حاولت مرة أرمي حالي من شباك بس اتذكرت أهلي والعذاب واتراجعت، كنت كتير أضرب حالي مشان أوعى عحالي وأوقف على رجليّ، مو هالأذى الكبير (كف هالوجه بالكتير)) طبعاً كل هدول الشغلات أنا مخبيتهم جواتي ما حدا بيعرفها ((القرايب مني بلاحظوا إني مزاجية ووقت عصّب بنفجر بس)) شخصيتي الظاهرة للناس البشوشة الضحوكة يلي بتعيش أحلى أيام حياتها.
  
بشعر كتير بالاضطهاد والنحس وخصوصي إنو ناس كتير بتأكدلي هالشي، بخاف من حالي أكتر شي لأني أحيانا ما بقدر سيطر ع حالي وبخاف العتمة ومستحيل نام فيها، ما بحب نام بالليل وما بعرف نام إلا أشغل حالي بشي، ووقت نام ما بفيق وإذا فقت بفيق تعبانة ومكسًرة، دايماً مدايقة ومخنوقة وبحس إني وحيدة ((مع إنو في ناس كتير بحبوني وبخافوا علي)) ما عدت أقدر أجبر حالي على شي، يعني متل دراستي يلي هي أهم شي بحياتي حالياً.
  
** ما بعرف شو نوع المساعدة يلي بتقدروا تقدموها بس انتوا أملي الأخير، انتوا آخر حل، أنا بدي أرتاح وكون طبيعية متل باقي العالم، بدي حس بالهدوء جواتي ولو مرة واحدة لأني ما فيي كفي أكتر من هيك –انصحوني، احكولي اعملي هيك، كيف بدي أمتلك الإرادة وأتحدى واقعي؟؟ 
 
أنا ما بدي أرضى بحالي هيك، أنا بستاهل أحسن، ساعدوني مشان اللـــــــــه,
بعتذر عالإطالة, وشكراً
11/01/2015