يوميات أم مصرية ::

الكاتب: د.هبة رؤوف
نشرت على الموقع بتاريخ: 17/05/2005

 
البنت الصغيرة عايزه" أديدس" والبك أبو رجل3 سم عاوز صندل" تيمبرلاند" مثل أي زوجة أو أم مصرية صميمة أدبر وأقتصد في صرف كل مليم من دخلي أنا وزوجي من أجل أن نعيش بشكل معقول … لكن طاحونة الحياة العادية تقوم بدورها في الفتك بهذا الدخل وهرسه وفتفتته شأنه شأن الغالبية. تتزايد احتياجات الأولاد باستمرار، وتزداد مطالبهم اليومية، وتطلعاتهم الاستهلاكية.

كنا نشتري حذاء الألعاب من باتا ونلبس ملابس صنع في مصر أما الآن "فالآنسة الصغيرة عايزه أديدس والأخ اللي رجله ثلاثة سنتي لم يدخل مزاجه العلي غير صندل تمبرلاند(مش مهم يعني إيه–صندل– صندل غالي وماركة وخلاص) والكبيرة عايزه حذاء اسبور نايكي.(نايكي مقاطعة –هييييييييييييه– أحمدك يا رب)!

أستيقظ في العادة السادسة والنصف صباحا لأستعد للجهاد الأكبر وأم المعارك اليومية: إيقاظ الأطفال ثم دفعهم عبر روتين أول ساعة في الصباح(حالة مطاردة من غرفة لغرفة بالذخيرة الحية) حتى نفلح أخيرا في فتح باب المنزل ونخرج(انتصارا) ثم أقوم بإسقاطهم من السيارة أمام المدرسة ثم أعود للمنزل للإفطار مع(أبو العيال) ثم يمضي كل في طريق.

اليوم …. الأربعاء 27 أبريل – كان عندي يوم عمل مزدحم لكن خرجت مبكرا من المكتب لألحق مظاهرة كفاية – قلت أعدي أطل عليها … كل مرة أقرر أشارك وظروفي لا تسمح.

خرجت بالسيارة للشارع الرئيسي وجدته واااااااقف تماما ……… في إيه يا جماعة؟! ما حدش عارف … طيب في إيه يا حضرة الضابط؟ قال بقرف مظاهرة كفاية انهارده وموقفين الدنيا !
كفاية؟ دي في وسط البلد واحنا في الجيزة
ياااااااه ..الله أكبر هو الجماهير أخيرا خرجت مطالبة بالديمقراطية؟
0 ألو حسام (صحفي صديقنا) إنت في المظاهرة؟ العدد كام دا انتم موقفين البلد كلها !...
0 إحنا 700 وحوالينا عشرين ألف عسكري وضابط! (يبقى بردو إحنا إللي موقفين البلد) يا ولاد اللذينا، مرت ساعة والطريق يمر ببطء ممل، حان موعد خروج العيال من المدرسة، ما ليش نصيب المرة دي كمان، للخلف در، وصلت للأولاد متأخرة ساعة، ووصلنا للبيت بعدها بساعة، وأنا أنهي وضع الطعام على المائدة جاء ابني الصغير:
0 ماما! (قالها في حزم) لو سمحت عاوز كراسة"ماث"،
0 طيب ما احنا كنا برة ما قلتش ليه يا حححح....بيبي؟ هز كتفيه ببساطة وأعطاني ظهره حاااااضر!

بعد الغذاء نزلت اشتري كراسة الباشا التلميذ رجعت بالكراسة وعلبة منظف للغسالة خمسة كيلو وشكارة أرز صغيرة
0 إنتي رجعتي يا ماما
0 أيوة يا بابا
0 طيب لو سمحتي تكوي لي القميص وتجهزي لي بدلة عندي موعد مهم حاااااااااضر !
0ماما أنتي جيتي؟
0ننننعم يا نوران ...!
0 صاحبتي اتكلمت بكرة عيد ميلادها في المدرسة ومحتاجة شوية بسكوت على كيك على يعني حاجات كدة ممكن تنزلي تجبيها لي؟حااااااااضر !
ترن .. ترن ترن .
0ألو .. أيوة يا ماما إزيك؟ بس الأولاد مش عارفة أسمع اسكتوا ..بس ...بس صراخ(أنا) : أقعدي يا بنتي مكانك خلصي الواجب !!!! أيوة يا ماما معلش لما مؤاخذة يا حبيبتي دول العيال كنا بنقول إيه؟! ... طيب حاكلمك لما الأولاد يناموا ..

تمر ساعتين أتابع الفصل بين القوات .. والانسحاب المنظم لكل واحد لمكانه وراء الخط الأخضر.. وأغسل وأنشر ملابس المدرسة ... وأرتب بعضا من الفوضى العارمة في المطبخ ... صلوا يا أولاد ... وانتي يا بنتي ما ينفعش صلاة من غير وضوء ... بطلي استعباط ... ياللا يا اولاد العشاء .. غسل الأسنان قبل النوم، ياللا تصبحوا على خير ما تنسوش الفاتحة ودعاء قبل النوم ... كفاية لقى رغي في الضلمة .. قلنا نااااموا !
واخيييييرا نام الولاد ... الله ..... هدوء.

وانا نصف نائمة أكلم زوجي: ألو يا أحمد ... أيوة خلصت العيادة ؟ طيب ما تنساش عايزين عيش الفينو .. علشان سندوتشات المدرسة .. طبعا طبعا ...حستناك !
أكمل تشطيب المطبخ وترويقه .. تمر نصف ساعة .. قلت أفرد ظهري على السرير شوية ... الله .. مخدتي حبيبتي أتثاءب من بعيد يأتيني صوت مفاتيح زوجي وغلق باب الشقة ... كأنه حلم ... أسمع صوت كأنه قادم من يحر الظلمات:
0 إيه ... دة .. إنتي نمتي ولا إيه ... قومي ... قومي ياللا علشان نتعشى سوا ... بلاش كسل
0 كسل ؟!
خخخخخخخخ ..!
أحلم بأنني أمسك يافطة مكتوب عليها المدام مرفوعة مؤقتا من الخدمة ... وأمشي بيها في مظاهرة كفاااااية!!!

ثاني يوم على الإفطار يعاتبني زوجي:
- رجعت لقيتك نايمة امبارح فين بقى مستنياك دي
- معلهش .. مقدرتش يا بابا ... مش طول النهار على رجلي؟ ومتنساش ... انا امرأة عاملة!
- يكمل آخر لقمة في طبق الفول وآخر شفطة في كوب الشاي بلبن ويقوم من على السفرة وعلى فمه نصف ابتسامة ويقول وهو يعطيني ظهره .
- امرأة عاملة ... ولا عاملة امرأة؟!!
- مين ... فين ............. إيييييييه
- ششششششكرا!

عن جريدة الدستور: عدد الأربعاء 11/5/2005