خلى بالك من عيال اليومين دول.. ::

الكاتب: د. عاطف عزت
نشرت على الموقع بتاريخ: 06/11/2005

جامعة نيويورك عملت مؤتمر عالمي كبير عشان يناقش فكرة فن مخاطبة الأطفال وهذا الموضوع يحتاج بالفعل لمؤتمر وجلسات عمل لأن العيال الأيام دي محتاجة طريقة حوار وتعامل غير اللي اتربينا عليها زمان..

العيال الأيام دى وصلوا والعالم مفتوح على بعضه.. مش زينا اللى اتربينا على القناة الأولى والتانية بالتيلة..

خلاص مينفعش تقول للعيل دلوقتي {العصفورة قالت لي وفتنت لي عليك}.. عصفورة إيه وهو بيفهم في الموبايل بتاعك أحسن منك؟؟

ومينفعش تخوف العيل بأبو رجل مسلوخة لأنه هايدخل على google ويعمل سيرش على معنى أبو رجل مسلوخة وهيلاقي الموقع بيقول له: دي هجايص وأساطير عملوها الكبار ف القرن اللي فات عشان يخوفوا بيها العيال..

مينفش تعاقبه بأنك تأومه من أودام فيلم بيحبه وبيتفرج عليه.. لأنه هايشوفه تاني يوم على نفس المحطة الصبح وإنت ف الشغل.. ويخليك زي قرطاس الجوافة..

عايز تعاقبه.. نزل له فيروس على الجهاز بتاعه ودمر له الوندوز وقول له الجهاز مش ها يتفرمط ويتعمل له ست أب من أول وجديد ألا لما يتعدل ويشوف مذاكرته و يبقى محترم وبنى آدم..
لما تعوز تدلعه وتكافؤه على تفوقه.. مينفعش تجيب له بندقية صيد وكوره وكتب م المكتبة الخضراء والجو القديم ده كله.. ممكن تظبطه.. تدخل له dsl.. تجيب لهscreen جامده.. تدخل عليه بweb cam ولو إبنك بيحب الغنا والفن.. مينفعش تقول له عيب دى صياعة ومالهاش مستقبل.. مش هايصدقك وهو شايف البلد كلها بتغني وترقص.. وعاملين أرانب على قلوبهم م المسخرة

مينفعش لو أبنك سألك عن حاجه منتش عارفها.. تألفله أى أجابة من دماغك.. بعد يوم ولا اتنين هايعرف الإجابه الصحيحة م التليفزيون ولا النت.. وساعتها هيبقى منظرك عامل زي العدة الأريكسون 688.. لما يسألك أقعد معاه ع النت ودور معاه  ع الأجابة المظبوطة.. بلاش قلة قيمة..

وأوعى تفهم الواد إن الرياضة هى أهلي وزمالك.. على رأى ماري منيب.. "بلا نيلللللا".. لأنه دلوقتى عارف لعيبه ريال مدريد والأرسنال وعارف أسعارهم كمان

وأذا طلب رأيك ف أكلة دليفرى م اللى بياكلوها الأيام دي أوعى تقول له: يعنى أيه دى ياااد. لأ خليك أب روش.. هز دماغك بألاطه وقول له.. حلوة طحن..

أحبائى.. رحم الله محمد فوزى الذي عشقناه حينما قال..

ذهب الليل طلع الفجر والعصفور صوصو

شاف القطه آل لها بسبس آلت لو نونو.. نونو..

لو كان عايش كان زمانه قال: ذهب الليل طلع الفجر والحشاش كر كر.. كركر

شاف الجوزة آل لها بسبس.. آلت له عمَّر.. عمَّــــــــر.

اقرأ أيضا:
عيال صايعة.. بس عندها منطق..!!
ليست شرم الشيخ وحدها.. ياريس..
نصائح وهمية (1) ..!!
نصائح وهمية (2) ..!!
نصائح وهمية (3) ..!!