نصائح وهمية (4) ::

الكاتب: د. عاطف عزت
نشرت على الموقع بتاريخ: 14/11/2005

مبرووووك.. اتجوزتي.. وعدى الفرح على خير ورحتي قضيتي شهر عسل ف الساحل الشمالي.. يجنن.. ودلوقتي ياعروسة.. رجعت لبيتك.. عشك الجميل.. لتبدئي حياة أسرية جديدة..

1- سنة أولى جوااااااز:
-صباح الخير يا حبيبي.. إصحى بقى الساعة بقت 8 علشان تلحق الشغل وألحق أنا المدرسة عندي الحصة الأولى
-يا سلاااام.. طيب جهزي الفطار والشاي يا حياتي على ما آخد الحمام بتاعي.
-أنا هاجهز الفطار علق أنت على الشاي.
-يووووووه....إنتي عارفة إني بحب آخد الحمام براحتي ومعايا الجرنان..

وبعدييين..
-< في سرك طبعًا>.. إنت مش هاتبطل الطبايع الخ... دي.. ما علينا كبري مخك يابت....؟؟؟
-في حاجة ياروحي سرحتي في إيه.....؟؟؟
-أبدًاااا يا حبيبي.. دانا كنت بافكر أحط لك ف الحمام كاسيت صغير أو سي دي، أو دي في دي يعمل لك جو مع الجرنان يا حبيبي..
-إنتي بتتريقي ياروحي....؟؟؟؟؟
-لا والله....شا الله....تعدمني ولا يفرمني الترماي.. والنعمة ما بترييق...؟؟
-<في سره طبعًااا> إنتي هاتجبيه من بره.. طالعه زي أمك بالظبط..> طب يالله ياحبي أحسن الوقت سرقنا..

2- سنة تانية جوااااز:
-صباح الخير يالله بقى.. قوم الساعة 8 مش كل يوم تروح متأخر ع الشغل وترجع تقول خصمولي نص يوم، يالله ياسيدي يادي الصباح الأغبر..
-حضري الفطار والشاي على ماخد حمامي.
-بقولك إيه.. قوم إعمل الشاي إنت.. كفاية عليا الفطار.. مش لازم تقرا لي الجرنان ع الريحة..؟؟
-أصتبحنا وصبح الملك لله.. أنا قايم مش ناقصك.. خلي اليوم يعدي على خير وقولي أعوذ بالله من الشيطان الرجيم..
-طبعًااا ماهي الشغالة اللي انت اشتريتها هي اللي لازم يكون راكبها الشيطان.. إنت ناسي إنى مدرِّسة.. يعني موظفة زي...... زيك بالظبط....
-اقعدي م الشغل.....
-اسم الله.. حوش ياواد الفلوس اللي زايدة وفايضة.. ياخويا بلا خيبة..
-قصدك إيه أنا مش مالي عينك؟.. كده؟.. طب والله مانا طافح.. أنا هافطر ف الشغل....
-وأنا هافطرعند ماما قبل ماروح المدرسة.. فطار خمس نجوم ربنا يخليكي ليَّا يا أمي...
-أمك... طيب.. معلش... بكرة الأيام توريكي...

3- سنة تالتة جواااز:
-إصحى يا عِدِلْ.. الساعة 8 ياخوياااااا ولا انت خدت على التهزيء من المدير قوم يالله أنا مش فاضية عندي الحصة الأولى.....
-أستغفر الله العظيم.. أووووف.. صباح ما يعلم بيه إلا ربنا.. خوشي يا هانم حضري الفطار ولا هانزل على لحم بطني زي امبارح؟
-عندك الجبنة والعسل ف التلاجة واعمل الشاي وانت واقف.
-أنا إيه اللي كان خبطني ف مخي وخلاني أتجوز؟؟ مانا كنت بافطر في المكتب من إيدين زنفل الفراش اللي كان بيأكلني الشهد.. ويعملي أحلى شاي شربته ف حياتي.
-لأ.. وانت الصادق.. أنا اللي كان الفطار بيجيني ف السرير.. وماما تأكلني ف بؤئى.. ياريتني كنت سمعت نصيحتك ياماما.. لكن هاقول إيه النصيب غلاب كده..
-ماحنا فيها.. روحي ياختي افطري واتغدي واتعشى عند أمك.. دا يوم المونا..
-لأ.. ناصح ياعِدِلْ دا إنت اللي تسيب البيت وأنا هاقعد فيه.. إصحى لروحك يا حبيبي.. وهاجيب ماما تقعد معايا كمان.. وابقى ورينا الهمة.
-إتلمي.. وخلي يومك يعدي على خير...!!!!
-اتلم إنت وقول ياصبح.. واتكلم على قدك...
-كده......؟؟؟
-كده.....
-طييييييب..........

طااااااخ.... بوووووم..... طوووووووخ..... تراااااش.. آآآآآآآآآي....... يالهووووووي......

((حكمت المحكمة حضوريًا على كل من المتهم والمتهمة.. بالسجن مع بعضهم لمدة عشرين سنة مع الشغل والنفاااااذ))
لااااااااااااااااااااااااااءااااااااااااااااااااااهــ..............

-ماتخافيش يابت هانستأنف...
=ماتخافش ياضنايا...عمامك هايخطفوا القاضي......

ودلوقتي حطي عقلك ف رااااسك واعرفي خلاصك....

*اقرأ أيضا:
نصائح وهمية (1) ..!!
نصائح وهمية (2) ..!!
نصائح وهمية (3) ..!!
خلى بالك من عيال اليومين دول..
عيال صايعة.. بس عندها منطق..!!
ليست شرم الشيخ وحدها.. ياريس..