يوميات أبلة سحيبة..(1) ::

الكاتب: سحابة..
نشرت على الموقع بتاريخ: 26/12/2005

الحلقة الأولى..
بادئ ذي بدء.. أكيد طبعًا الجمهور الكريم بيتساءل.. مين أبلة سحيبة دي يا ترى؟ وعشان أوفر عليكم نص المشوار.. هاقولكم..
أبلة سحيبة دي تبقى المعلمة والأستاذة والأب الروحي لأبلة نظيرة.. أكيد كلكم تعرفوها.. أييييوة.. هي دي، بتاعت كتب الطبخ..
وحيث كدة بئه.. ندخل في الموضوع..

ماما سافرت بقالها كم يوم.. وده معناه إني كل كم يوم بردو هكرم اخواتي بأكلة من أكلاتي الشهيرة والخطيرة والي قلت مينفعش أحرمكم منها أبدًا عشان كدة هكتبهالكم على حلقات..

كنت بفكر في الهامبورجر بتاع أول امبارح.. قلت أريح نفسي واعمل حاجة سهلة.. وموضوع أريح نفسي ده زاد لدرجة إن السندوتش كان عبارة عن مربعة الجبنة ودايرة الهمبورجه والحمد لله على كدة.. كنت حاسة بإحراج وأنا لاقياهم راجعينلي على المطبخ من الصدمة بيقولو.. هو في إيه؟؟ أصلي كنت مفهماهم إني أخدت الوصفة من بورجر كينج ولفالهم الزندروتشات بئه وحكاية..

جت على بالي اللقطة دي بحزن كدة وأنا واقفة انهردة في المطبخ أفكر.. قلت لازم أعوضهم انهردة بئه بأكل يعتبر أكل..
بصيت عالمقادير..

*فراخ متقطعة مربعات صغيرة ومتبلة مكتوب عليها (خاصة بالشوي).. بس شوي على مين؟
أخدت الطبق ده وفضلت شوية كدة بافكر أعمل فيه إيه؟، جبت صينية ودلقته فيها..
وفضلت أبص..
حسيت انو ناقص حاجة..
حطيت شوية زيت..
حسيت انو ناقص بردو مريحنيش..
قطعت عليه فلفل وقوطة..
حسيـ....
لأ بئه
قطعت الإحساس على كدة وقفلت الغطا على الصينية ورجعت أفكر تاني..
هو الناس بتاكل إيه مع الفراخ..
ممكن مكرونة..
طيب مفيش مانع
أهي المية على النار، وقعدت أقضي الوقت في تقطيع شوية سلطة..

بعد برهة من الوقت معرفش هي كام من كتر التفكير ومحاولة افتكار ماما كانت بتطبخ إيه وازاي في الأوقات القليلة الي بتعملها.. أيوة أنا فاكرة شكل الأكل كويس أوي..
لأ/ ده أنا فاكره طعمه كمان..

بس الطريقة ازاي؟ دي عايزلها تفكير بئه، واسترجاع النظريات بتاعة "بما أنَّ/ إذن".. ربنا يذكرك بالخير يا ميس الرياضيات مش تيجي تشوفيني في الورطة دي..

هقولكم معلومة عني خاصة بالطبخ..
لما بطبخ بحط على البوتجاز جنبي طبق كدة فيه معلقة وشوكة وسكينة ومغرفة، الحجات الي هحتاجها يعني في الطبخ، عشان مش كل ما أقلب حاجة أرمي المعلقة، وأمشي لغاية الدولاب تاني أخد وحدة تانية وأرجع للحوض أحطها والرحلات دي.. بحب أفضل واقفة في مكاني..

بس الموضوع انهردة اتطور لما هو أكتر من المعلقة والمغرفة..
اتطور ازاي؟
قعدت أفكر..
هو أنا لسا هاروح أجيب حلة أعمل فيها الصلصة بتاعت المكرونة؟

فاكرين الفراخ الي حطيت عليها مكونات؟
شلت المكونات قصدي شلت مربعات الفراخ وحطيتها في علبة كدة وفضلت المكونات..
دلقت عليها علبتين صلصة..
وجالي موضوع الإحساس ده..
حطيت زيت..
زاد الإحساس..
حطيت ملح وفلفل وبهارات وزنجبيل و..
اتحول الموضوع لهوس..
لقيتني قاعدة أدور أحط ايه كمان..
لقيت بطاطساية "مسلوقة"، قطعتها مربعات وحطيتها.. ومنستش أبدًا أعصر على الخلطة دي لمونتين..
ده طبعًا بالإضافة للأوطة والفلفل الي متقطعين من الأول في نفس الصينية..

اتكونت عندنا كتل من الصلصة المتكتلة ولونها مائل إلى البني -قصدي الأسود-.. إحم..
بصيتلها وبصيت للمكرونة.
قلت في نفسي: دلوقتي لو حطيتها عليها هيبان الموضوع ويمكن ميرضوش ياكلوها أعمل ايه؟

.
.

أعمل شوربة..
بس إيه الي دخل الشوربة؟
امممم
الشوربة هتبقى سوخنة جدًا، ولما هياكلوها في بداية الأكل بوءهم هيولع وبالتالي.. حليمات التذوق مش هتبقى في وعيها أوي "حد دكتور يلحقنا"..

الحاجة الوحيدة الكويسة في الشوربة إنها باكيت جاهز، تسخن المية وتدلقه عليها، مش عارفة أنا فيها ايه لما الأكل كله يتحول باكتيتات هيحصل ايه؟
"نفسي في باكيت فتة"..

الوقتي عندنا.. شوربة وسلطة (مكونة من أوطة وخيار وفلفل وخس ودرة وجزر).. طبعًا بالكمية "حسب الرغبة" واللمون وزيت الزتون والملح والكمون "حسب الرغبة" بردو..
يااااااااااااااااااه
الكلمة دي بتحسسني إني شيف كبير أوي..

بس يالهوي بئه لو الأكل كله ده الي تعبت فيه يبقى هو كمان "حسب الرغبة" واتدبس فيه أنا.. لأ أنا لازم اتصرف..
أيييييييوة
هو التقديم..
لازم يكون التقديم شهي..

طبق سرفيس طويل كدة وعميق شوية..
ادلقي يا سيدتي المزيج من الصلصة المتكتلة الذي عملناه آنفًا..
ثم اخفيه تمامًا وغطيه بمكعبات الدجاج التي شلتيها من الصينية قبل الكارثة..

بعد ذلك قومي بشطف المكرونة التي تم سلقها بالماء.. وضعيها في مصفه حتى تنشف "بلاش السشوار الله يخليكي".. وبعد ذلك ضعيها في طبق مدور الشكل.. وزيني الطبق بأي ورود أو فروع شجر، "أي حاجة انشالله دريم ويب".. المهم ان يكون شكل الطبق مشجع على الأكل..

بعد تجهيز السفرة، ودلق الشوربة في صحون مناسبة.. ينصح بالابتعاد عن مسرح الجريمة حتى تنتهي التحقيقات على خير..

،،
بعد المغرب طلعت من أوضتي..
بصيت هنا وهنا، مفيش صوت..
كانوا ساكتين نحية التلفزيون
قلت سبحان الله، أخيرًا بقى في برامج مشوقة ولا إيه؟
كنت هأدخل المطبخ عشان أعرف نتيجة المعركة؟
لكني لقيتني بدخل عندهم كدة..

-ازيكم؟؟
(محدش بيرد)
-بقولكم ايه؟
(حسيت انهم جوا التلفزيون مش في الأوضة)
بردو مفيش صوت
-إحم.. أكلتو؟
(كإني سمعت حد بيكح)..
-تحبو أطبخلكم ايه بكرة؟
(أيوة كدة لازم الأسئلة المباشرة دي مدام التلميح مش نافع)..

>>>>>>>>> رَدّو علياااااااااااااااااااااااااااااا
طبعًا انتو متوقعين ردوا قالوا إيه؟
مش بقولكم أبلة نظيرة كانت بتتودد لي وتتقربلي عشان أديها وصفة وحدة من وصفاتي؟، الله يرحم بئه

قالولي في صوت واحد:

بكرة الجمعة، أجااااااااااااااااااااااااااااااااااااااااااازة :>

،،،،،،،،،،،،،،،،،،،،،،،،،،،،،،،،،،