المسخر خانة.. الحلقة الثالثة.. ::

الكاتب: دعاطف عزت
نشرت على الموقع بتاريخ: 15/01/2006

المسخرخانة.. الحلقة الأولى
المسخر خانة.. الحلقة الثانية..  

بالمدرج.. أحسست وقتها أن هناك أكثر من ألف عقل يدور داخل القاعة.. وبعدها.. دوت القاعة بالتصفيق.. -ليس بالحاد ولا حاجة- مرة أخرى من الحضور مرت لحظات صمت قصيرة بينما انشغل الأغلبية من الحضور في مناقشات جانبية ذات صوت مرتفع.. وحسم حازم "أمين اللجنة الثقافية" حالة الهرج بالمدرج ليعود بقوله: هدوء يا جماعة لسه فيه أسئلة للدكتور ممكن نكمل بهدوء عشان نستفيد..

وما أسعدني أن المدرج كله صمت في لحظة عندما قال حازم كلمته ولم ينصرف أحد كما توقعت

-دكتور عاطف اسمح لي.. أنا كسرت القاعدة واطلعت على شوية أسئلة.. ولو تسمح لي اخترت سؤال منهم.. حاسس إن الندوة دلوقتي محتاجاه، ياترى ممكن تديني حضرتك الحق في قراءة هذا السؤال بالذات..؟؟

-طبعًا يا حازم.. أنا بس مش عايز أكون ضيف تقيل على الموجودين..
وسمعت التصفيق فاستبشرت خيرًا

-أستاذنا الفاضل.. السؤال من ل.س الطالبة بآداب لغات شرقية: من واقع خبرتكم العملية ودراستكم النظرية، ومشاهداتكم لما يحدث من تطور نفسي مستمر في المجتمعات الشرقية، في العلاقة بين الرجل والمرأة.. كيف تتنبأ سيادتكم بصورة الزواج في المجتمع المصري.. عام 2040..؟؟ أرجو الوضوح وعدم الردود الدبلوماسية.. وأعدكم نيابة عن بنات جنسي بعدم الزعل من رأيكم مهما كان..

ضجت القاعة بالضحك.. وسمعت: قولها يادكتور،، قولها يادكتور..

الحقيقة.. السؤال ده سهل جدًا، لأن الإجابة كلها تندرج تحت بند إن زمان كان منتهى أمل المرأة في المجتمع المصري هو المساواة مع الرجل والمطالبة بحقوقها التي كفلها لها الدستور والقانون.. دلوقتي.. ماعادش فاضل لها حقوق تاخدها.. في البداية بنطلون ولبست، كورة ولعبت، ملاكمة وخدت بطوله عالم، رجالة وخلعت من أول جلسة وبدون إبداء أسباب سوى جملة واحدة وهي: إني أخاف ألا أقيم حدود الله.. وخد مهرك ومؤخرك والباب ف أيديك..

أما الزواج سنه 2040 في ظل هذه التطورات فأنا متخيل أنه سينقلب 180 درجة، يعنى الست هي اللي من حقها تتقدم للراجل.. وتقول لأبو العريس: لو سمحت ياعمو أنا باتقدم لأيد ابنك.. والراجل {العريس يعني} وشه يحمر ويروح ميت لون..

ويقول الأب لمراته في المطبخ: والله ابنك كبر ياحاجة وجاتله عروسة، ويرجع يكلم العروسة، ويقول لها كلميني عن نفسك يابنتي..

وترد العروسة: شوف ياعمي، أنا شابة عصامية.. بنيت نفسي بنفسي.. بدون مساعدة حد.. جبت شقة.. تمليك والحمد لله أقدر أفرشها من مجاميعه..

وتقعد أم العريس.. تفطم ابنها{العريس}.. هايعمل إيه لما يخش بالشربات على حماته وعروسته.. أوعى ياحمادة توقع الشربات على حماتك يا حبيبي أحسن يقولوا غشيم ولبخة، ويخش العريس على الضيوف ف أوضة الصالون.. وأم العروسة تقعد تبص عليه وتقول له : {تعالى أقعد جنبي يا حبيبي يا عريس بنتي ياغالي.. والنبي قمر، يازين ما اخترتي يابنتي.. ماعرفش إن ذوقك حلو كده}..

ويحددوا ميعاد الخطوبة.. ويبدأ يخرج مع خطيبته ويتأخروا بره.. كالعادة.. وطبعًا أبو الولد هايسكت مرة واتنين.. والتالتة هايكلم الأب البنت: ماينفعش كده يابنتي كلام الناس زاد عليا خالص.. وانتي عارفه شرف الولد زي عود البخور.. بيفضل والع لحد مايطفي لوحده..
ويتحدد ميعاد الفرح وينزل العريس مع الخطيبة عشان تجيبله الشبكة وبدلة الفرح.. والشبكة طبعا ف الوقت ده لازم تكون روشة جدًا

يعني ممكن تبقى.. {بندانة..} ماركة أديداس.. أو حظاظة.. من الأستك الخالص عيار 24..

وييجي يوم الفرح وتتغير الأماكن، ويقعد العريس على اليمين والعروسة ع الشمال، ويخلص الفرح على خير بعد مايهدوا حيل العروسة رقص مع كل أصحابها ومعازيمها، ويوم الصباحية.. الناس والقرايب تيجي تبارك: {صباحية مباركة ياعروسة.. أومال فين عريسنا الحلو..؟؟ والعروسة ترد: أصله لسه نايم..}

وتعدي الأيام وتيجي الأيام.. وتيجي الزوجة من الشغل تلاقي البيه ماعملش الأكل وقاعد متصلب قدام الدش بيتفرج على روبي 2040 وهيفا2040 وتسمعه بيقول: هي دي الستات ولا بلاش
وتقوم بينهم خناقه لرب السما..

وتروح الست قايلاله كده طب روح وانت طالق بالتلاتة.. ويروح الزوج وهو شايل شنطة هدومه ف إيده.. ويخبط الباب وتفتح له أمه وتقول له يا حبيبي إيه اللي في إيدك ده؟؟ ويرتمي الزوج في حضن أمه.. {طلقتني ياماما.....}

وتطيب الأم خاطر ابنها وتقول له ولا يهمك ياعين أمك والنبي لأكون مجوزاك ست ستها.. دا نص بنات مصر تتمنى ضافر رجلك.. وتكمل الأم كلامها: دا غير إن أحنا هاناخد حقوقك كلها.. نفقة ومؤخر والشقة اللي هيه من حقك ياحبيبي

ويتدخل الأب: ماتشعليليهاش ياستي.. خلي ابنك يرجع بيته لو رجعته وبلاش تخربي عليه..

وترفع الأم المكلومة يدها إلى السماء: بقى تطلقك بنت بتاع الترمس؟، ربنا ينتقم منك ياللي كت السبب ف الجوازة الهباب دي.. دا ماكانتش من واءمك ولا من لونك ياعين أومك..

ونظرت إلى جميع الوجوه التي ملأتها الضحكات العالية.. وقلت في نفسي: الحمد لله..

المسخرة مش عاجبة حد..

*اقرأ أيضا:
نصائح وهمية (1) ..!!
نصائح وهمية (2) ..!!
نصائح وهمية (3) ..!!
نصائح وهمية (4) ..!!
دعاء واحد مصري مطحون
هي الناس اتهبلت من شويه؟  
خلى بالك من عيال اليومين دول..
عيال صايعة.. بس عندها منطق..!!
ليست شرم الشيخ وحدها.. ياريس..