حكومة 2006 حكومة الاستكشافات ::

الكاتب: د.دكتور عاطف عزت
نشرت على الموقع بتاريخ: 26/01/2006

بعد التشكيل الوزاري الجديد وأداء اليمين للوزراء.......
الناس في الشارع حيرانة....ومش عارفة رأسها من رجلها......ناس بتقول
إنها حكومة رجال الأعمال........والأكسلنسات جايين فعلا عشان يراعوا مصالح الناس الغلابة
والمطحونين...والخدمات هتبقى أحسن وأحسن في الصحة والنقل والإسكان والتعليم وبكرة تشوفوا
وناس تانية بتقول إزاي الناس اللي ساكنة في العالي والهاي كلاس.........
ها يحسوا بآلام الغلابة .....البيئة ومعاناتهم........
تعالوا .....كده نبص على الوجوه الجديدة........


الدكتور .....حاتم الجبالي....وزير الصحة.......
بذمتك ودينك......لو مريض غلبان من اللي بيقفوا في الطابور ساعتين في مستشفى أم المصريين
ولا حميات إمبابة ولا الدمرداش........علشان يأخد شريط سلفا....... ولا إزازة دوا كحة....
المريض ده لو ساكن ف 6 أكتوبر مثلا وجت له أزمة قلبية بالليل.........
وراح مستشفى دار الفؤاد.......{ اللي الدكتور حاتم شريك أساسي فيها.......}

وطبعا المستشفى ها ترفض تدخله من الباب أصلا......
يا ترى الدكتور حاتم هايطبق القانون ويحاسبها على عدم استقبال مريض في حالة حرجة
يا ترى ها يعمل لهم أمر غلق....ولا ها يلغي ترخيصهم............ولا هايسيبهم يستقبلوا الغلابة.......... وإن شاء الله ما حققت المستشفى مكاسبها الخيالية .........

يا ترى ها ينصر الواجب ولا....العقلية الرأسمالية.......
أول أمبارح سمعت زغاريط في صالة الانتظار بالعيادة الخارجية....
ندهت ع الواد سيد.....إيه دا ياسيد.....؟؟؟

دي ولا مؤاخذة أومي يا باشا....
وأمك إيه اللي جابها هنا وبتزغرط هي وفرقة أبناء الأرض اللى معاها دول ليه.....
هيه ناوية تجوزك تاني يا سيد.....
الشر برة وبعيد يا باشا..............

دي أصلها من ساعة ما عرفت الوزارا الجوداد وهية عمالة تزغرط هي وكل زباين المستشفى وبتقول
خلاص ما عنتش ها تمرمط عندكو في المستشفى عشان كلام فاضي.....
ولا عنت هاجرى شمال ويمين عشان أجيب قرار أتعالج على حساب الدولة....ويصرفولو 200 جنيه بعد الغلب والبهدلة
يا دوب أجيب بيهم شوية شامبو وصابون......خلاص يا واد يا سيد.....

أصل البيه اللي جابوه وزير صحة جديد هوه صاحب مستشفى دار الفؤاد يا وله....
من هنا ورايح ها تعالج في دار الفؤاد يا منيل....مش معقول البيه الباشا الوزير هايبخل عليا بالعلاج...
آدي الوزرا ولا بلاش......ظغرطتي يا ولية منك ليها

يا سلام......دي الست الوالدة عندها عقلية سياسية خطيرة يا سيد...
نعم.....؟؟؟؟؟ يعنى إيه يا باشا لا مؤاخذة...؟؟؟؟

لا متشغلش بالك........{ بكره تجيبها تتعالج من الأكتئاب....هنا عندي......جتك خيبة......}
 

*اقرأ أيضا:
 حكومة 2006.. كي ...جي وان/ أفضفض قبل ما الفيوزات تضرب/المسخر خانة.. الحلقة الرابعة..  /نصائح وهمية (4) ..!!  /دعاء واحد مصري مطحون  /هي الناس اتهبلت من شويه؟  / خلى بالك من عيال اليومين دول.. / عيال صايعة.. بس عندها منطق..!!  / ليست شرم الشيخ وحدها.. ياريس..