حكومة 2006 عاقلة جدا ::

الكاتب: د.عاطف عزت
نشرت على الموقع بتاريخ: 28/01/2006

 
وبعد انتهاء مظاهره أمو سيد....ومعها فرقة المعذبون في الأرض.....سمعت من المكتب صوت ضوضاء وهتافات عالية تقترب من شباك المكتب المطل على حديقة المستشفى....

واد يا سيد.......واد يا سيد.....أنت يا سي زفت......

أفندم معالي الباشا.....

هوه إحنا مش ها نخلص من يومك الأغبر ده........فيه إيه تاني...إيه الهيصة دي{أنا}
دا الواد سلامة الجباس بتاع قسم العضم سعادتك.........

آآآآآه الواد الحرامي ده اللي بيسرق جبس القسم ويشتغل بيه مبيض بعد الضهر....{أنا}
بالظبط سعادتك.............

وده ماله ده راخر.....عامل مظاهرة.....؟؟{أنا}
أيوة سعادتك.....لامم برعي بزازة بتاع الأطفال....وحنفي الأجرب بتاع عيادة الجلدية والواد إبراهيم المفتح
بتاع قسم الرمد مع البت باتعة حكيمة النسا والولادة....عاملين ولا مؤاخذة احتفال بالوزارة الجديدة
أصلهم بيهتفوا لوزير النقل والمواصلات

ليه وعشان إيه أن شاء الله.....؟؟؟؟{أنا}

يا معالي الباشا بيقولوا إن الباشا محمد يونس منصور........وزير النقل والمواصلات...
ما هو ده سعادتك ......منصور شيفورليه.....فاكره سعادتك........اللي دخل الشيفورليه مصر
من تلاتين سنة.....فاكره سعادتك..........فطبعا الباشا الوزير مش ها يرضيه أن الموظفين الغلابة اللي ماشيين
حافيين يفضلوا كده.........كلهم يا باشا بيقولوا خلاص هانرتاح من الأتوبيسات وزحمتها حتى الواد...
برعي بزازه الكحيان...... بيحلم بركوب الشيفورليه....بيقول البيه بتاع الشيفورليه أكيد مش ها ينسانا أومال هو جاي ليه مش عشان
يحل مشاكلنا مع المواصلات....طبعا أكيد.......ها يرحمنا من زنقة الميكروباصات والأتوبيسات الخربانة
ونركب الشفر....... ونعوم على وش الفتة ولا مؤاخذة.....

وعشان سعادتك ما تسألنيش........ المظاهرة اللي جاية في السكة بعد خمس دقايق من العيادة الخارجية
دول بقى أنصار مصيلحي باشا........ وزير التضامن الاجتماعي.........
دا معاليك اللي ها يوصل المعاشات لكبار السن لحاااااد البيت وفوقيها بوسة كمان
مش زى الناس البيئة اللي بتقول ...أنه ناوي ياخد فلوس التأمينات وصناديق التوفير كمان.... هو ووزير المالية
اللي مص دم الغلابة بالضرايب والغلا....وها يتاجروا فيها ويستثمروها.....ومش مهم معاشات...
هموا يعنى العالم بتاعة المعاشات دول لازم ياكلوا ويشربوا.......
أما بقى الإسكان....والسكان......سعادتك دي ها تبقى ميغة.......فتة بالخل والتوم على لحمة ضاني......
الباشا ....المغربي........جه من السياحة....ع الإسكان عيدل....
يعنى لسه واخد على شغل السياحة...يعنى الإسكان ها يبقى سياحي....فاخر....
خمس نجوم سعادتك.......ماعدش مساكن شعبية ولا دياولوا سعادتك.....
فيه حاجه كمان يا باشا عايز أقولها لسعادتك....

قول يا سيد بيه يا محلل يا سياسي....قول يا سيد بيه هيكل.........{أنا}

الحكومة الجديدة يا باشا مش بس حكومة هاي كلاس.......
لأ.....دي حكومة عائلية....بينهم بيس بس.....بزنس....سبوبة يعنى..... نحتايه يا باشا..... وقرابة.كمان..........ودي كانت المعايير المهمة
اللي تم عليها الاختيار والتشكيل.........
عندك وزير الأعلام......أنس باشا الفقى......طبعا هايكون سعيد وهو قاعد جنب
أبن خاله....على باشا مصيلحى....... على كرسى وزاره التضامن الأجتماعى
الأكتر من كده يا باشا.......البت حفيظة شد حيلك........قالت لي إن مرات الوزير مصيلحي باشا....
حبيبة مرات الباشا رئيس الوزرا الروح بالروح....قهوتهم دايما يشربوها مع بعض وهوما بيختاروا الوزرا بلا آفية
واللي سعادتك أكيد ما تعرفوش........واخد لي بالك...؟؟؟
أن أحمد باشا المغربي........وزير الإسكان اللي جاي م السياحة........
شريك الدكتور حاتم الجبلى....... وزير الصحة...في مستشفى ....دار الفؤاد....وشريكه كمان ف
أكاندة كبيرة ف مصر........

وكمان شريكه في السوبر ماركت بتاع.....كترو.......بترو.......مترو ولا مؤاخذة.
نعااااام يا خويا أنت كمان عارف مترو...........؟؟؟؟؟{أنا}
أنا عارف بقى يا باشا أهي الناس بتتكلم...... وأنا بسمع وأقول لسعادتك
المهم مترو...... ولا مترك.....دا منصور باشا شيفورليه شريك معاهم كمان في
مترووو سعادتك.......هوما....مش برضه ها يخفضوا هناك سعر الأكل يا باشا
أكيييييد يا بو السيد.....ويمكن يوزعوه مجانا كمان........{أنا}.
وتفتكر يا بو السيد أن الحكومة الجديدة ها تحل مشاكلكم.....لمجرد أنهم أصحاب وفرقه واحدة وبينهم بيزنس {أنا}

أكييييد يا باشا.......هوه سعادتك..... أنا والواد برعي بزازه وحنفي الأجرب وإبراهيم المفتح
لما بنقعد كل يوم على قهوة...أمو زتون..... نتكلم في مشاكل العيانين ف المستشفى
مش سعادتك بتحس بتغيير في وضع الشغل في القسم...

طبعااااااااااااا..{أنا}
بتحس بأيه سعادتك.....؟؟؟؟؟؟

بحس أن المرضى بتتسرق يا سيد...................{أنا}
الله يكرم أصلك يا باشا.....................بعد أذنك أطلع المظاهرة يا باشا

أطلع ياخويااااااا جتك ستين نيلة........{أنا} 

اقرأ أيضا:
 حكومة 2006 حكومة الاستكشافات  / حكومة 2006.. كي ...جي وان/ أفضفض قبل ما الفيوزات تضرب/المسخر خانة.. الحلقة الرابعة..  /نصائح وهمية (4) ..!!  /دعاء واحد مصري مطحون  /هي الناس اتهبلت من شويه؟  / خلى بالك من عيال اليومين دول.. / عيال صايعة.. بس عندها منطق..!!  / ليست شرم الشيخ وحدها.. ياريس..