تخاريف ::

الكاتب: د.عاطف عزت
نشرت على الموقع بتاريخ: 01/04/2006

يظهر العشرين كيلو اللي مابين عيادة المنصورة والسنبلاوين دول هوما مصدر الإلهام
والسرحان اللي بينتابني طول ما أنا راكب السيارة وسايق بطريقة أتوماتيكة لحد مارجع بيتنا في منتصف الليل
أو قبله بقليل.. .. ينعش ذاكرتي ورغبتي فى الكتابة ......المهم النهاردة لقيت نفسي سارح.....
ماذا يحدث لو عاد أبو لهب اليوم وتقدم لرياسة العالم بالترشيح في الانتخابات الأمريكية أمام
جورج بوش بصفته حاكم العالم.........وبعد شوية ابتديت أضحك.....فقررت الكتابة فورا

أبو لهب خفف حواجبه طبعا وحلق دقنه...وغسل رأسه وحط كولونيا...ولبس أفندي
آل أيه نيو لوك...بيحاول يساير بيه العصر ويلفت بيه الأنظار....
ولأن أبو لهب عنده تطلعات كبيره في الكفر....فقد قرر أن يحكم العالم بدلا من جورج بوش
يهديك يرضيك يابو لهب ارجع جهنم تاني......أبدااا
طقت في دماغه......ركب الجمل وفضل ماشى 3 سنين لحد ما وصل البيت الأبيض
ونصب خيمته هناك
وكالات الأنباء اتلمت والكاميرات من كل الفضائيات حول هذا الإنسان الغريب اللي جاي يترشح قدام
بوش الشديد......

أبو لهب أعلن عن مؤتمر صحفي يتكلم فيه بدل اللمة والهيصة ويعلن فيه عن برنامجه الأنتخابي
وإليكم أيها السادة البرنامج الانتخابي لأبو لهب واللي ها يمسح بيه جورج بوش من على خريطة الزعماء

أولا....
تحطيم تمثال الحرية.......ونحت تمثال أكبر منه....{.لهبل.}
هاحط ع الكونجرس يافطة كبيرة مكتوب عليها...{ دار الندوة}
ثانيا......
ها مسك أبو جهل....حبيب قلبي وزميلي في جهنم...وزارة الاستخبارات الدنيئة
ثالثا......
هألغي كاس العالم ...... وهاخليه كأس خمرة..........
رابعا......
هاخلي حق الفيتو ليه أنا لوحدي بس...عشان أذل الناس
خامسا....
ها شيل أنابيب التنفس عن شارون.......عشان أكون أنا المفترى الوحيد ف العالم
ها وقع قارة آسيا في أستراليا وأخليهم يحاربوا بعض
سادسا.........
ها تجوز ...كوندا ليزارايس....عرفي....وها نقضي شهر العسل فى معسكر
جوانتامو....بعد ما أطلق أمو جميل....مراتى.... بالتلاتة
ها شجع تجاره السلاح والمخدرات....وأخلى العالم يعمل أجدع دماغ
سابعا........
.ها رمى قنبلة سوبر هيدروجينية ع العالم كله....... تهد كل الحضارة الحديثة
أصل بصراحة الجمل وحشني أوي....
ثامنا.........
ها عبي بترول العرب في جراكن....وأشحنه على البنزينة الجديدة
اللي اشترتها في شيكاغو........
تاسعا.........
ها دهن البيت الأبيض......أسود....
ها خترع كام وباء جديد على كام فيروس واهديهم......كادو...مجدعة.... لدول العالم التالت
عاشرا.........
ها لغي تنظيم القاعدة لأنه بقى موضة قديمة.....وها عمل بداله تنظيم
البانيو بالسيراميك 3 نظام.....
حداشر......
ها لغي بعيد عن السامين الصحافة وها شجع سياسة التعتيم وها شغل ع الفضايح موسيقى سلو لزوم الغلوشة
عشان الجو يبقى شاعري
أتناشر.......
ها طبق الديمقراطية....مظبوط....في العالم كله.....تحت شعار......
من حقك تختلف معايا.........بس أبقى أستناني بره يا روح ماما.....
انتخبوا مرشحكم.......
أبو لهب..........

 أقرأ أيضا:
 تعرف حكايه دون كيشوط/ها تسكت ولا أجبلك العسكري؟/مصر 2006 مش ها تقدر تغمض عنيك/لو قلبك ضعيف.....بلاش تقرى الموضوع ده..../حواديت طبيب.....نفساني....../حكومة  2006 عاقلة جدا/حكومة 2006 حكومة الاستكشافات/حكومة 2006.. كي ...جي وان/أفضفض قبل ما الفيوزات تضرب/المسخر خانة.. الحلقة الرابعة../المسخر خانة.. الحلقة الثالثة../المسخر خانة.. الحلقة الثانية../المسخرخانة.. الحلقة الأولى/هي الناس اتهبلت من شويه؟/دعاء واحد مصري مطحون/نصائح وهمية (4)/خلى بالك من عيال اليومين دول../عيال صايعة.. بس عندها منطق..!!/ليست شرم الشيخ وحدها.. ياريس..