حوار مع فرخة مزكومة ::

الكاتب: دكتور عاطف عزت
نشرت على الموقع بتاريخ: 03/04/2006

بعد ظهور مرض أنفلونزا الطيور في مصر...... أطلقت الحكومة يد الشرطة في مهاجمة عشش الفراخ على سطوح المنازل
وتم إعدام آلاف من الفراخ في الأيام القليلة الماضية........
وبما إني رايح عيادة السنبلاوين أمبارح وماشي على عكس العادة ..... سلانسيه ....... فقد سرحت في موضوع لذيذ أوي..
أستوحيته من كتاب كليلة ودمنة ..................
تخيلت أنني أجري حديث مع فرخه ..... من الفراخ المزكومة في تقفيصة الإعدام قبل تنفيذ الحكم
بلحظات......
في البداية لاحظت حالة الذهول على الفرخة ..... حتى أن منقارها كان بيتحرك في عصبية بالغة
وكانت في قمة ثورتها وغضبها ..... بصراحة صعبت عليا.........
حتى أنها هي التي بدأت معي الحوار دون أن أسألها....
حينما عرفتها بنفسي ...... قالت أنت دكتور نفساني ..... من اللي على رأسهم ريشة
يعنى مننا وعلينا .......... برضه يرضيك يا دكتور اللي بيحصل ده .....؟؟؟؟
فقلت لها ....معلش بس دي حالة طوارئ والعالم كله في رعب بسبب الأنفلونزا اللي عندكم
ودي مصلحة بلد بحاله وما ينفعش الدنيا تخرب علشان مرض أصابكم .............
انتفضت الفرخة وأشارت بجناحيها بعصبية وقالت ...... أحنا برضه السبب .... والله لو دورت
كويس في الموضوع ده هاتلاقي أن البني آدمين هوما اللي مصدرين لنا أنفلونزا الطيور دي ...
من أمتى واحنا بنؤذي حد ما حنا طول عمرنا عايشين معاكم ومستحملين بلاويكم ....
مرة تخنقونا بالسحابة السودة ومرة تشربونا مية معفنة من اللي بتشربوها ف بيوتكم
أنا بصراحة اتغظت وكنت ها خنقها وقلت لها ...... ليه أنت عاوزة مية معدنية إن شاء الله

قلت هو الموضوع وقف عند المية بس ....... ما نتم بتوكلونا عيش بايت من المعجن اللي بتاكلوه
واللي زاد وغطى ...... إنكم بتدونا برشام منع الحمل ......
يا دكتور إحنا بقينا بنبيض بالعافية ..... والهرمونات هدت حيلنا .........
بص يا دكتور ع الديك من دول تلاقيه..... منظر..... صدر منفوخ ..... ووراك مكلبظة
وعرف زي العلم ........ وساعة الجد تلاقيه قلب كتكوت .... ويدوخ على بتوع الفياجرا والسيالس
فين أيام زمان يا دوك لما كانت الفرخة البلدي والديك البلدي حالتهم تشرح القلب
البني آدمين يا دكتور هوما اللي عملوا لنا نيولوك بالأدوية والعلف المهبب الجديد
وفي الآخر عاملين علينا حرب ونازلين فينا تدبيح ..... وعاملين علينا حرب ولا الحرب العالمية
التالتة....
فقلت لها ...ومين السبب في الحرب دي يا فالحة.....؟؟؟؟؟؟
قالت على الفور......طبعا أمريكا هوه فيه غيرها......
هي عملت كده مخصوص عشان ما حدش يعرف يكاكي معاها
قلت لها ......يا سلام.......
قالت .....طبعا البني آدمين ما حدش بقى بيكح معاها....لقت ما فيش غيرنا
أحنا اللي طالع لنا صوت في العالم
قالت تصدر لنا المرض ده علشان تخرسناااااا
واحنا لعلمك يا دوك.....عارفين بالتحديد مين صاحب المخطط ده من الأمريكان
سألتها........ميييييين.......؟؟؟؟؟؟؟
قالت هو فيه غيره........{ ديك....} ديك تشيني طبعا....منه لله...
هو السبب في تصدير أنفلونزا الطيور للعالم الغلابة....تقدر تقول لى
اشمعنى المرض ده ما ظهرش ف أمريكا لحد دلوقتي.....
ما ظهرش غير ف الدول الغلبانة اللي بتعتبرهم أمريكا أقل منها
بصراحة الدمعة فرت من عيني.....وأقنعني كلامها.........
وحينما جاء الدور على الفرخة لتنفيذ حكم الإعدام فيها وجم عساكر الداخلية عشان ياخدوها
سألتها.......نفسك ف حاجه قبل ما يعدموكي.......
قالت.......نفسي أزور أمي في كنتاكي قبل ما موت.......

طاااااااااخ............. بووووووووووم.......كرررررررااش

لأ معلش.......دي عربية كارو كانت قدامي وما خدتش بالى منها....
بسيطة......أكسدام... وكبوت.... وفوانيس.......

أقرأ أيضا:
 تخاريف/تعرف حكايه دون كيشوط/ها تسكت ولا أجبلك العسكري؟/مصر 2006 مش ها تقدر تغمض عنيك/لو قلبك ضعيف.....بلاش تقرى الموضوع ده..../حواديت طبيب.....نفساني....../حكومة  2006 عاقلة جدا/حكومة 2006 حكومة الاستكشافات/حكومة 2006.. كي ...جي وان/أفضفض قبل ما الفيوزات تضرب/المسخر خانة.. الحلقة الرابعة../المسخر خانة.. الحلقة الثالثة../المسخر خانة.. الحلقة الثانية../المسخرخانة.. الحلقة الأولى/هي الناس اتهبلت من شويه؟/دعاء واحد مصري مطحون/نصائح وهمية (4)/خلى بالك من عيال اليومين دول../عيال صايعة.. بس عندها منطق..!!/ليست شرم الشيخ وحدها.. ياريس..