حوار مع صديقي المنفسن ::

الكاتب: دكتور عاطف عزت
نشرت على الموقع بتاريخ: 04/04/2006

الحادية عشرة مساء.......انتهى يوم من العمل الشاق......أو هكذا أصبح شاقا الآن بالنسبة لي
تثاءبت على كرسي المكتب وتمطعت بكل ما لدى من قوه....ثم استرخيت على الكرسي وأطلقت العنان لكل
عضلاتي كي تسترخي وتتكاسل براحتها.......هههههييييييه....خلصت شغل...اليوم خلص.......
واستدعيت صديقي المنفسن كي أتسامر معه دقائق معدودة كعادتي قبل أن أذهب إلى البيت....
واد يا ساااااايد........... تومرجي العيادة والمستشفى في وقت واحد

أفندم يا باشا........

آآآآآآآآه عارف أنا نفسي في أيه دلوقتي يا بو السيد.....

تؤمرني يا باشا..............

نفسي آكل فراخ بانيه نفسي رايحة لها أوى

يانهار أغبر ملوش ملامح.......أنا ف عرضك يا باشا......أنا والعيانين محتاجين لك يا باشا
وبعدين أنا ها طلب الأستاذة الأول ف البيت أقول لها على طلب سعادتك الغريب ده......

جرى أيه يااااض.....؟؟؟؟ أنت ها تستهبل عليا ولا أيه......؟؟؟؟؟؟ مراتي دخلها إيه بالموضوع..؟؟؟

يا باشا أنفلونزا الطيور هو حضرتك مش خايف على نفسك.....؟؟؟ والنبي يا باشا
تصرف نظر عن موضوع الفراخ ده الله لا يسيئك..........

صديت نفسى ربنا يصد نفسك...........يالله عندك حق....... الباب اللى يجيلك منه الريح سده وأستريح.......

خلاص نأضيها لحمة وخلاص يا بو السيد

يانهار أغبر ما لوش ملامح.......أنا ف عرضك يا باشا........أنا والعيانين محتاجين لك يا باشا
وبعدين أنا مضطر أطلب الأستاذة في البيت أقولها ع اللي أنت ناوي تعمله ف روحك يا باشا

جرى أيه ياله...؟؟؟؟؟؟؟هو أنت الأستاذة بتديلك مرتب عشان تراقبني ولا إيه....؟؟؟
فيها إيه اللحمة كمان........؟؟؟

فيها حمى قلاعية يا باشا......هو سيادتك لسه ما قرتش الجرنان بتاع..... صوت الأمة.......؟؟؟؟
الحمى القلاعية مالية البهايم في البلد.....ولا مؤاخذة يا باشا

لا والله ........هو أنا فضيت أقرا جرايد

أنا بأه قريته من على مكتبك يا باشا وأنت بتشتغل.....اللحمة فيها حمى قلاعية يا دكتوووور...
الناس خلاص ها تبطل تأكل لحمه

يا سلام.......الفراخ واللحمة انضربوا.....يعنى كده اتكتب عليا آكل السمك كل يوم

يا نهار أغبر مالوش ملامح.......أنا ف عرضك يا باشا.....أنا والعيانين محتاجين لك يا باشا
وبعدين بعد أذنك أنا هابلغ الأستاذة بطلبك الغريب ده يا باشا...... سمك كل يوم...؟؟؟؟

وماله السمك روخر عند شلل رعاش.....؟؟؟؟؟؟ ولا جاله فصام.....

لأ يا باشا.....السمك النيلي..... بياكل مخلفات الدواجن اللي فيها الفيروس....وبيقولوا الفيروس ده
فيروس نضيف أوي....... كل يوم بيغير..... لونه وجلده وطبايعه ......وممكن يتهف ويعملها..
ويتنقل للسمك ومنه للبني آدم...............
وسمك البحر......... أتلوث من أكل جثث ضحايا العبارة يا باشا....بلاش أنا ف عرضك

أومال آكل أيه يا ابن المجنونة أنت....؟؟؟؟ عمال أشتغل م الصبح وأنا على لقمة الفطار
آكل أيه دلوقتى......؟؟؟؟؟....أقولك.... مش طافح....هي جت ع الأكل.... أنجر.... هات لي شويه ميه
نشفت ريقي إلهي ينشف ريقك

المية المعدنية خلصت يا باشا........أنزل أجيب لسيادتك إزازة هوااااا.......
روح يا واد هات شوية مية م الحنفية ....أمشي.........أنا لسة ها ستنى لما تجيب من تحت...؟؟؟؟

يانهار أغبر ما لوش ملامح .....لأ يا باشا.....أنا ف عرضك يا باشا....أنا والعيانين محتاجين لك يا باشا
آآآآآآلو يا أستاذة......

أيه يا مجنون أنت فيه إيه مالك....؟؟؟ فيها إيه مية الحنفية.......
ما هى مية الحنفية من النيل يا باشا والنيل بيرموا فيه كل حاجة.....فراخ ميتة
حمير ميتة....والفيروسات شغالة فيه الله ينور يابا شا

اللهم طولك يا روووووح.....
طيب بالراحة وبهدوء يا صديقي العزيز سيد..... ممكن تقول لي......آكل أيه..؟؟؟
خدها مني نصيحة......ما فيش دلوقتي فى البلد أأمن من الفول يا باشا.........
أومال....الفول.....عارف يا باشا......السادة المعلمين أصحاب عربيات الفول
اللي زي حالاتي....بدؤا ف رفع السعر....طبعا الفول دلوقتي ها يبقى
الوجبة الأولى ف البلد.....عربيات الفول.....أتغير شكلها ياباشا
بقت عربيات مقفلة بالأزاز الفاميه......وفيها شبابيك معدنية عشان الزباين تستلم منها الطلبات
شباك للفول العادي.........
وشباك للفول السبايسي.........
والعربية يبقى مكتوب عليها......{ فولديز........أو فولتاكي.....}
وشباك...... للفولسيس..........
وشباك........ للفولجر...........
وكل معلم صاحب عربية يجيب المدام تقعد على الكاشير.....سياحة يا باشا
ونعمل عروض كبيرة ......خد عندك
واحد فول أجريلك كومبو......مع قرنين من الفلفل الحار مع واحد شاي يظبط الأنفوخ
والسعر جنان........
وعرض تاني.....
أستمتع مع طعم { الفيزو } المذهل....حبات الفول الكهرمانية مع قطع الجزر المقرمش
عليها صوص معتبر.....والسعر مفاجأه
هذه العروض سارية.........حتى شفاء الطيور من دور البرد الجامد
اللي هي متدهولة فيه.....وربنا ياخدها.........

هايل يا سيد..........أتحلت مشكلة الأكل وكتر خيرك......تعرف تحللي مشكلة الشرب......؟؟؟؟؟؟

ودي تفوتني ياباشبوش...........
الجماعة الضريبة..... بتوع قسم الإدمان..... ربنا يروق بالهم زي ما هوما مروقين بال القسم كله
لقونا حل للموضوع ده................إزاااااى...؟؟؟؟؟
قالوا أحنا نشرب بانجو وحشيش بدل المية.....وطريقة تحضير الشرب..... أسهل كتير يا باشا
من طريقه ترشيح المية..... اللي أنت مركبها في المطبخ عندك وقارف بيها الأستاذة
وزاحم المطبخ ع الفاضي.....بالفلاتر والهمبكة الفاضية دي......
شووف يا باشبوش.....بيجيبوا كوبايه فاضية.......غيري طبعااااااا
ويبرموا حتة الحشيش.....ويحطوها ف سيجارة.......ويولعوها وهي جوه الكوبايه
ويغطوها بغطاء محكم.....لحد ما الكوبايه تتملى دخان مركز...... يشيل الغطا....
ويدب بووووزه في الكوباية ويشد الدخان ويكتمه عشان يعشش في النخاشيش
وبعدين....... اللى بعده..... واللى بعده.....وآهي شربة هنية تكفى مية.....
وفي الآخر تلاقي الوشوش أحمرت يا باشا......وفجأة ينقلب حالهم ويبقوا ما لهمش
دعوة بحد م اللي حواليهم خالص وبيبقى كل واحد ف حاله..........
وبكده ما تلاقيش أي مشاكل ف البلد يا باشا وتروح النفسنة.... والصراعات.... اللي ملت البلد
ويبقى كله..... حلو مع كله.......بالذمة دي مش أحسن م المية أمو توكسافين... يا باشا
سعادة الباشا........مالك سعادتك بلمت ليه...........كفا الله الشر......؟؟؟

سيد..........أنا بقول نأضيها ..... مولتو.....أحسن ما موت م الضغط..........

يا خسارة الرجالة يا باشا...........

أقرأ أيضا:
 حوار مع فرخة مزكومة/ تخاريف/تعرف حكايه دون كيشوط/ها تسكت ولا أجبلك العسكري؟/مصر 2006 مش ها تقدر تغمض عنيك/لو قلبك ضعيف.....بلاش تقرى الموضوع ده..../حواديت طبيب.....نفساني....../حكومة  2006 عاقلة جدا/حكومة 2006 حكومة الاستكشافات/حكومة 2006.. كي ...جي وان/أفضفض قبل ما الفيوزات تضرب/المسخر خانة.. الحلقة الرابعة../المسخر خانة.. الحلقة الثالثة../المسخر خانة.. الحلقة الثانية../المسخرخانة.. الحلقة الأولى/هي الناس اتهبلت من شويه؟/دعاء واحد مصري مطحون/نصائح وهمية (4)/خلى بالك من عيال اليومين دول../عيال صايعة.. بس عندها منطق..!!/ليست شرم الشيخ وحدها.. ياريس..