الله يرحم الرجالة ::

الكاتب: د/ عاطف عزت
نشرت على الموقع بتاريخ: 16/04/2006

 

...............سمعت هذه الجملة وأنا نازل ع السلم الصبح رايح المستشفى

.........قلت فسرى...... الصوت ده مش غريب عليا......... أيوه دا صوت البت صبحيه..... مرات محمد بواب العمارة............. وليه حشرية ورغايه........... قولت لها وأنا بفتح باب العربية........مالك يا صبحيه...

صوتك طالع ليه ع الصبح............بصت لي وقالت لي وهى بتتنهد....هيييه الله يرحمك يابويا كان راجل صح يا دكتور..... ماكانش مخلى أمي محتاجه حاجه..... مش زى البيه اللي نايم جوه.......

عايز يأكل ويشرب وينام وبس............. الله يجازى اللي كان السبب ف الجوازه دى..........

هوه مش كان سهران طول الليل يحرس العربيات قدام العمارة يا صبحيه.........
فابتسمت ابتسامه خبيثة وقالت.......أيوه........عينيه ماداقتش النوم........؟؟؟

فتحت باب العربية عشان أتوكل ع الله......مش فاضي للهبل ده ع الصبح.....
أنا عندي اكتفاء ذاتي من الهبل في البيت والشغل..........
بصيت لقيت مدام روحيه جارتنا............ 39 سنه............... مأموره الضرائب بالمنصورة بتركب عربيتها اللي راكنة جنب عربيتي....

صباح الخير يا دكتور....

صباح النور يافندم.

أزى مدام ميرفت....... محدش بيشوفها ليه.... والله مشاغل يافندم......... أنتي عارفه الأولاد.

برضه الأولاد........ والله يا دكتور عاطف أنا عايزاك تكتب لي على أي حاجه مهدئه عشان أعرف أشوف شغلي.... الأعصاب اليومين دول بايظه خالص.......

والله يا مدام روحيه فعلا أنا ملاحظ اليومين دول أن حضرتك على طول مشرشره....... ومزرزره....... وصوتك طالع على طول من المنور.

راحت نافخه في وشى...... وقالت لي يقطع العيال ع اللي عايز عيال البيه عمل عملته وهرب ع السعودية....خمس سنين وراء بعض مانزلش أسبوع زى مانت عارف يادوب بنروح له أنا والأولاد شهر كل صيف، ولا يعرف حاجه عن مشاكل عياله ولا قرفهم.... يا فرحتي بالفلوس والعربيات.... عارف.
 
حضرتك أنا آخر مره شفته أنا والعيال في العيد الصغير اللي فات...... ومقضينها تليفونات ورسايل قصيرة........ وساعات رنات بس....
يظهر يا دكتور..... أن الرجالة اللي ليها دور في بيوتها انقرضت ولا أيه.....

يكونش الأكل بتاع الزمن ده فيه حاجه بتخلي الرجالة يهربوا....... أو يبلطوا ف الخط.....ولا يكونش الهوا مثلا فيه ملوثات بتأثر ع الرجالة...... أوعى تكون بتزعل يا دكتوووور...؟؟؟؟؟

أزعل ليه.......؟؟وأنا مالي يا مدام.......؟؟؟

أن جيت للحق أحنا السبب..... أيوه الستات هوما السبب هوما اللي حملو نفسهم فوق طاقتها..... وعملوا فيها جدعان... بيشتغلوا ويجيبوا فلوس.... وبيصرفوا ويوصلو العيال للمدارس والدروس وعايشين متجوزين ع الورق بس.... دا غير شغل البيت وهم العيال.

قلت لها....... طيب تفتكري يا مدام .....طالما أن الرجالة بقوا كده...... مش قلتهم أحسن وبلاش الستات يتجوزا أحسن......

فردت على الفور.......لا يا دكتور مش للدرجة دى..... دا برضه ضل راجل ولا ضل حيطة.......
أحنا ف مجتمع شرقي.... وأهم حاجه فيه المظاهر..... البرستيج.... وبرستيج أي ست وجود راجل لها....

برستيج...... برستيج يا مدام..... الأستاذ {لمعي} جوزك مجرد بريستيج....

أوعى تكون بتزعل يا دكتور أنا بفضفض معاك م العشم والجيرة.... والنعمة أنا بعتبر حضرتك أخويا.....الكبير طبعا......

قلت في سرى...........{ الله يخيبك يا لمعي.......الولية ضربت...}.

ابتسمت ابتسامة خفيفة وركبت العربية وقلت لها..... ربنا يعينك يا مدام.

عشان أنهى الحوار اللي شكله هايفضل للمغرب لو أستمريت معاها في الكلام .............

برستيج......الله يخيبك يا لمعي.....دا ضل الحيطة أشيك من البرستيج.

وصلت للمستشفى...... وقابلني السيد سيد كالعادة..........
صباحه.....أخضر يا باشا........ داحنا مستنين حضرتك م الساعة تمانيه......

أيه اللي حصل ياوش السعد......؟؟؟؟؟.يا فالي الحلو......... عاوزني أجي الساعة تمانيه مع بتوع اللبن يا روح قلبي..... أنت أتهبلت يا له....

أبدا يا باشا....... المدام سميحة السكرتيرة بتاعه القسم جت الصبح منهارة ومن ساعة ماجت ونازله عياط ونهنهه.....ومش عارفين مالها.... دي حته أوغمن عليها مرتين والبت حفيظة بتفوقها كل مره ببخاخه الاتير بتاعه البنج الموضعي اللي هابشاها م الاستقبال...

أتير...؟؟؟؟ أنتوا عايزين تعموا البت....... أنجر هاتهالى المكتب ووقعتك طين أنت واللي متتسماش اللي عينت نفسها دكتورة....... صبركو عليا أنتو الاثنين..........
ودخلت الست سميحة سكرتيره الأسم 28 سنه متزوجة وعندها ثلاثة أولاد......

تعالى يا سميحة....... اقعدي........ أنجر يا واد يا سيد.... خلى الهانم بتاعتك تعمل لها لمون......

حاضر يا باشا.....

أيه يا بنتي مالك أنتي طول عمرك عاقله وشايفه شغلك كويس.... فيه أيه حد ضايقك من أداره المستشفى......

أبدا يا دكتور....

أومال مالك...... عندك مشاكل في البيت....
وطبعا انفجرت في نوبة بكاء مع نهنهه طويلة المفعول مع شحتفه ونهجان............

معلش يا سميحة فهميني يا بنتي يمكن أقدر أساعدك.....

جوزي يا دكتور عاطف...... عشر سنين جواز دلوقتي خلاص تعبت....... كل همه يرجع من الورشة.... يقعد قدام الدش....يشرب في الشيشة.... ويطلب في طلبات لحد الساعة أتنين وتلاته
صباحا.... وطبعا هوه بيروح ورشته الضهر لكن أنا لازم اقوم مع آدان الفجر أصحى العيال للمدارس أفطرهم وبعدين البس وأحضر له فطاره وأسيبه على الترابيزه وأجرى عشان ألحق أمضى في الدفتر قبل الساعة تمانيه ونص..............

طب مانتي أكيد طول عمرك من يوم ما أتجوزتيه وأنت كده.... أيه اللي أستجد عليكي يا سميحة.......؟؟؟؟

تعبت يا دكتور..... تعبت.... خلاص فقت لقيت نفسي زى الجاموسة اللي مربوطة ف ساقيه خلاص لازم أفك الرباط ده.......

بس أستهدى بالله يا بنتي.... الأمور ماتتاخدش كده.......

{في دخله الست حفيظة هانم}...

مش كده يا باشا..... والله من الصبح عاماله أعقل فيها وأقول لها.....يابنتى دا...ضل راجل ولا ضل حيطة........

وانفجرت سميحة مره أخرى........ لا... لا.....

مين اللي قال المثل ده......طبعا ضل الحيطة أهون....... الراجل طول ماهو قاعد له طلبات مابتفرغش... هاتيلي كذا... أعملي.... سوى..... ناوليني..... أنما الحيطة مالهاش أي طلبات.......غير لو أفتكرتها كل كام سنه بوش بياض..... يبقى كتر خيرك........ الراجل لازم يزعق.... في مراته وعياله ويسمع الجيران أما الحيطة فقاعده ساكتة ف وسط أخواتها الحيطان الأمامير.......

الراجل ممكن يتجوز على مرآته في أي وقت ويرمى عياله..... أو يكون مؤذى أو شراني.....يعنى بالعربي يفضح مايسترش.... أنما الحيطة بتستر على ولايانا جميعا، الراجل بيفضل طول عمره..... من بعد شهر العسل لون واحد مابيتغيرش..... أنما الحيطة ممكن أغير لونها كل شهر لو حبيت..... الحيطة بتستحملني لو خبطت راسي فيها م الزهق لكن الراجل لو خبطته روسيه هايدشدش عضمي......... يبقى بذمتك يا دكتور مش اللي قال المثل ده ظلمنا.

سميحة....... ومن شويه مدام روحيه...... وقبلهم البت صبحيه...........

هوه اليوم بيبان من أوله....... وأقطع دراعي أن مارجعت البيت لقيت مراتي عامله أضراب هي روخره..... وقاعده جنب الحيطة.......

قرأ أيضا:
  التطور الطبيعي للرجل /التطور الطبيعي للمرأة/ حوار مع صديقي المنفسن / حوار مع فرخة مزكومة/ تخاريف/تعرف حكايه دون كيشوط/ها تسكت ولا أجبلك العسكري؟/مصر 2006 مش ها تقدر تغمض عنيك/لو قلبك ضعيف.....بلاش تقرى الموضوع ده..../حواديت طبيب.....نفساني....../حكومة  2006 عاقلة جدا/حكومة 2006 حكومة الاستكشافات/حكومة 2006.. كي ...جي وان/أفضفض قبل ما الفيوزات تضرب/المسخر خانة.. الحلقة الرابعة../المسخر خانة.. الحلقة الثالثة../المسخر خانة.. الحلقة الثانية../المسخرخانة.. الحلقة الأولى/هي الناس اتهبلت من شويه؟/دعاء واحد مصري مطحون/نصائح وهمية (4)/خلى بالك من عيال اليومين دول../عيال صايعة.. بس عندها منطق..!!/ليست شرم الشيخ وحدها.. ياريس..