قلق عام : معمم أو متعمم

القلق
بسم الله الرحمن الرحيم

سيدي الدكتور الفاضل /عمرو أبو خليل

أنا بجد محتاجة رأي حضرتك في مشكلتي لأني حضرت لحضرتك قبل كده ندوه وبثق في رأي حضرتك وحبيت أعرف رأي حضرتك وهل أنا محتاجة أروح لدكتور ولا لأ؟

مشكلتي يا دكتور هيا القلق.. أيوة أنا بقلق بطريقة غبية ومريضة .. أنا نفسي زهقت واتخنقت من نفسي.

أنا بقلق على كل الناس.. بابا وماما وأخواتي وأصحابي, يعني مثلا لو اخويا أتأخر على البيت شويه أو جه متأخر, أنا بقى القلق يمسكني وكل اللي ييجي على بالي ساعتها الوساوس الوحشة يعني مثلا ده أكيد عمل حادثه أو في شباب طلعواعليه وثبتوه أو.......الخ بمعنى اصح كل الحاجات الوحشة بتيجي في بالي وأقعد أعيط وإيدي ترتعش وأبقى مش مركزة في أي حاجة وما عرفش لا آكل ولا أنام ولا أعمل أي حاجه والنظام ده ماشي على بابا وماما وأختي الصغيرة والكبيرة, وأحاول أنى أقاوم القلق ده بأني أقرا قرأن وأصلى بس مافيش فايدة  لدرجة أني ما بقتش أحب نروح أي مصيف علشان أنا بقلق من البحر والغرق وكده.

والموضوع ده زاد عليا أوي اليومين دول علشان حصلت حالة وفاه في العيلة, وبقيت عايشه حياتي كلها قلق, التليفون يرن أقول ده أكيد حد هاي بلغني خبر وفاه حد, بقيت بخاف من كل حاجة وخاصة الموت مع العلم بأني عمر ما حد حصله حاجة علشان كده بخاف.

أنا لما بتجيلي حالة القلق أنا بتخنق من نفسي وببقى مش عارفه أعمل إيه.

لو سمحت يا دكتور ساعدني وقول لي أعمل إيه, وهل حالتي محتاجة لتدخل الدكتور النفسي.
6/6/2005