أنا وأهلي وزوجي واختلاف البيئة والثقافة

  تعبت كتير في الدنيا ولكن أملي في ربي أن يأخذ لى حقي
 
 أنا حكايتي كالآتي أنا مهندسة برمجة والدي نجار لا يعرف القراءة والكتابة وإخوتى أيضا ولدين وبنت أنا الوحيدة اللي أكملت تعليمي وعانيت وشفت ذل محدش شافه علشان أكمل تعليمي كان ولدي بيذلني وهو بيديني الفلوس مع أني كنت أقل واحدة في زمايلي والله وكنت راضية بس كان كل هدفي إني أحصل على البكالوريوس
 
  لدرجة أنه في آخر سنة وأنا في الامتحانات كان عايزني أترك الكلية وكانت مشكلة ودخلت ناس ويوم أن حصلت على الشهادة كنت فرحانة جدا وطايرة في السماء عمري ما فرحت زي اليوم ده وعمري ما تنكدت زي اليوم ده والدتي حسبي الله ونعم الوكيل دخلت بقولها أنا أصبحت مهندسة رسمي شوفي الشهادة راحت مقطعاها
 
 وقالت لي يعني إحنا هناخد منك إيه وخلت إخواتي الصبيان اللي أصغر مني وأنا أكبر واحدة يضربوني لدرجة أني فكرت في الانتحار واتمنيت أن ربنا يرزقني بزوج ينشلني من اللي أنا فيه خطبت لابن خالي عملوا معاه مشكلة تاني يوم الخطوبة وبهدلوه حسيت أنه مشي وحمد ربنا إنه مشي من هذا البيت
 
 ولما اتصلت بيه وجدته يقول لي يابنتي أهلك دول مجانين وده ابن خالي
 بعدها بفترة اتقدملي واحد كان زميلي في الكلية وظل سنة خاطبني وبعدين قلي نفس الكلام أهلك مجانين زعلت منه وأنا اللي تركته لم أقبل أنه يقول كده وعشت أيام سوداء مع والدتي اللي أنا عمري ماحسيت إنها أمي وليها المعاملة دي معاية أنا بالذات مع أنها بتعامل إخواتي أفضل مني
 
 وخطبت لواحد مهندس عن طريق صحبتي وقلت لو قال إيه عليهم قال مجنين قال مش طبعيين هوافق وخلاص وأول أسبوع اتخطبت فيه قلي فيه واحد يحضر خطوبة ابنته بالشبشب وبعدين مش لابس بدلة ليه قلت لوالدتي يا ماما قولي لبابا يلبس جزمة ويبقى شيك شوية رغم أن والدي مقتدر وميسور ماديا بس فلوسه على الأكل والشغل فقط لاغير يأكل ويوسع تجارته كان الرد كالآتي إنت هتستعري مننا مش عجبينه يمشي
 
  حتى أخويه كان يخش يسلم عليه إديه مليانة دهنات من الخشب وهدومه متربة طب المايه ببلاش الإنسان يغسل وبعدين يسلم على الناس عشت فترة الخطوبة في نار بين أهلي وخطيبي اللي متمسك بي ومش عاجبه أهلي واتجوزت بأقل تكاليف بدأت مشاكل بيني وبين زوجي لبعض الأفكار التي اكتسبتها منهم غصب عني والآراء الخاطئة وأنا معترفة أنها خاطئة
 
 ولكن أكيد أنا أخذت منهم حجات من الطباع لأني كنت عايشة معاهم كثرت المشاكل وبدأت أشتكي منه لأهلي وكانوا يقفون بجانبي أحسست أن علاقتي بيهم تحسنت وعندما كنت أترك البيت لزوجي وأروح عند أهلي كان أبي يقول لي عودي ومتسأليش فيه كنت أشتكي من زوجي كان أبي يقول لي كويس إنه بيتخانق معاكي بس كويس إنه مابيضربكيش
 
  وبعد رجوعي إلى بيتي فوجئت أن زوجي يضربني وكل خناقة يضربني طلبت منه الطلاق رغم أن معي منه طفلة وقالي هطلقك وبعدين تصالحنا والدتي كل خناقة تقول مش إنت قلت هتلقها قلي ابعدي عن كلام والدتك هي عاوزة تخرب عليكي اسمعي كلامي ولأول مرة أفوق وأسمع كلامه وزعلت أنا ووالدتي وظليت شهرين لا أذهب بيت والدي وكانوا أجمل شهرين في حياتي
 
  كنت أنا وزوجي وابنتي سعداء في حياتنا إلى أن جاء زوجي بنفسه وقال حرام دي بردو أمك قلت له أنت لا تعرفها لا أنا مش عاوزة أكلمهم ولا عاوزة أروح هناك
 
 راح اتصل هو بيها وسلم عليها وأعطى التليفون لابنتي تسلم عليها وأنا دخلت وقفلت على نفسي قالي اطلعي كلميها دي بردو أم قلتله لأ أنا كده مرتاحة ومر أسبوع بالضبت ولقتها بتتصل بي وقلتلي إن بنتي وحشتها رحت تاني يوم مودياها لها وهنا بدأت أكبر مشكلة بدأت تسودلي حياتي بالبطيء
 
 كانت تقول لي إنت شقتك صغيرة ضيقة شقة أختك كبيرة وواسعة جوزك وحش هوصحيح مهندس بس جوز أختك رغم أنه مش متعلم إلا أنه مابيستعرش منا ومخليها مرتاحة آخر راحة وبيحبها أوي رديت عليها وقلتلها أنا كمان جوزي كويس وحنين بصتلي بصة كده وقالتلي يمكن، قلتلها ده جوزي جايبلك هدية عيد الأم وبيحبك أوي قلتلي ده بيستعر مننا ده وحش زعلت بس محطيتش في دماغي
 
  كانت كل أسبوع تقولي عاوزة أشوف بنتك وجوزي قالي عايزة تشوف البنت رحيلها لكن هيا متجيش هنا كل أسبوع تطلب تشوف بنتي بعد كده بقت عايزة تشفها كل ثلاث أيام وتقلي لو مجيتش هآجي أنا وزوجي قايلي هي ماتجيش كنت برحلها وبعدين اتخانقت أنا وزوجي لأسبب تافة جدا فضربني ضرب على رأسي لا يتحمله أحد لدرجة أن نفوخي زن لمدة دقيقتين فأقسمت بالله أني مش هقعد وإني هروح بيت أهلي
 
 ورحت ورحبوا بي في أول يوم وثاني يوم بدأت والدتي تقص لي مدى السعادة اللي أختي فيها حتى المايه عند أختي أفضل من عندي قالتلي والمتور بتاع المايه عند أختك كويسة عن بتاعك قلت لها دا أنا عند أختي وهي في الدور الأول المايه لم تكن واصلة وأنا في الرابع المايه بتوصلي ليه كده عاوزه تسودي حياتي ليه قعدت تزعق وسابت البيت ومشيت
 
  راحت عند أختي حكتلها اتصلت بزوجي وقالت له تعالى خدنا جاء ليأخذنا لاقيت أختى قدام زوجي بتشتمني أفظع الشتائم واتهمتني أمام زوجي إني بمشي مع رجال حسبي الله ونعم الوكيل واتهمتني إني اتمسكت فى قسم البوليس في قضية تحرش كل هذا أمام زوجي وأبي مش موجود قلت لزوجي ياله ياله نمشي ياله مشينا وقال زوجى إيه اللي أنا سمعته ده في إخوات يعملوا كده في بعض الأخت حتى لو في حاجة بتستر على أختها مش تفضحها
 
 والدتك هي اللي عملت المشكلة دي كلها واتصل أبي قال إزاي تمشي من غير ماتقوليلي وشتمني وقال لي إنت مجنونة قلتله أختي التي... وماكملتش لاقيته مش عاوز يسمعلي خالص وكل شوية يكرر كلمت إنت مجنونة قلتله إنتم اللي مجانين أنا مش عايزة أعرفكم تاني راح قفل التليفون
 
  وبعد ماروحنا البيت قال زوجي أنا عمري ما شفت ناس كده ومري ما شفت أم عاوزة تخرب على بنتها زي والدتك قلتله مش أنا قلتلك بلاش نكلمهم لاعاوزة أكلمها ولاعاوزة أروح عندهم خالص أنا خلاص نفسيتي تعبت أنا حاسة إني مدمرة نفسيا

أرجوك يا دكتور ساعدني أنا تعبانة حاسة إني تايها في الدنيا ومزهولة
أرجوك ترد علي وشكرا وآسفة على الإطالة
 16/4/2014