خالي يتحرش بي كيف آخذ حقي ؟

ماذا تفعل لو كنت مكاني 

السلام عليكم ورحمة الله وبركاته... أنا مش عارفة أبدأ إزاى... طيب أنا بنت اتربيت تربية متعنتة مغلقة وطلعت شخصية مهزوزة للأسف وما بعرفش أتعامل مع الناس ولا الناس عارفة تتعامل معايا ومن أقل موقف أعصابي ترتعش وتهتز وده واضح عليا وحاولت كتير أتعالج بس مش عارفة ما فيش فايدة ليه وللأمانة الموضوع داخل فيه جزء من العين (الحسد يعني) لأن شخصيتي كانت قوية لحد ابتدائي وملفتة للنظر جدا عامة، ده جزء من المشكلة،

المشكلة الأساسية هي في خالي اللي أنا اتصدمت فيه وهو إنه حاول يتحرش بي للأسف، اللي حصل إنه مقيم في بيت جدي رحمه الله مقيم في الدور الثاني وكنا متجمعين عندهم لمناسبة ما _الكلام دا أنا حصل من حوالي أربع سنين_ فأنا كنت فوق عندهم وكان معايا بنت خالتي الصغيرة شابة، هي كانت جالسة في الصالة وأنا في الحمام وكنا ماشيين خلاص ولقيته طالع من تحت ودخل حجرة النوم وما قفلش الباب فأنا قلت أسلم عليه قبل ما أمشي ورحت أسلم عليه قدام الباب مش مدية أي خوانة قال لي اقفلي الشباك رحت قفلت الشباك ورجعت لقيته طلع على السرير وكان جالس بغبائي مديت إيدي أسلم عليه لاقيته بينام وبيشدني عليه بحيث _آسفة_ يعنى صدري يكون على صدره وعمال يقول ليه ماشيين ليه وكلام كده ما لوش علاقة باللي بيعمله، أنا اتخضيت ومعرفتش أتصرف غير إني صلبت جسمي وقفت جسمي جامد بحيث ما يحصلش اللي هو عايزه وسلم ومشيت للأسف من غير ما أقلع اللي في رجلي واضربه بيه أو أصوت وأجيب بنت خالتي تتفرج عليه....

أنا كده بردو للأسف مش مستوعبة إي اللي حصل ده لأنه عنده قدرة عالية على إنه يداري نفسه ويعمل نفسه ما عملش حاجة خالص فأنا اعتبرت إنها حادثة فردية ومش هتتكرر تاني خصوصا إني ما اتجاوبتش معاه بس لاقيت نفسي بسترجع كلام ونظرات سمجة زي وشه.

 زمان وأنا صغيرة كان يتكلم على بعض نقاط الجمال عندي هو ومراته حاجة غريبة ونظرات عجيبة كده فأنا قررت مش ها قول لحد علشان ما يحصلش مشاكل خصوصا المشاكل على أشدها بسبب الميراث معاه هو وباقي إخواته ما عدا واحد منهم وهو بالذات يعنى ما بيقبلش أمي وبيحقد عليها عيني عينك.. فأنا قرر ت أقلل التعامل معاه قدر الإمكان ما بقيتش أتصل عليه تماما كنت بتصل أحيانا علشان صلة الأرحام، المهم أول مرة جالنا وهو كان بيجلنا كتير ما شاء الله أول مرة جه ما طلعتش فماما قالت لي مش هاينفع كل مرة كدة وهي ما تعرفش، تانى مرة طلعت سلمت عليه عادي واحنا يعني بنقبل أخوالنا لما بييجو وكده.. سلمت عليه عادي للأسف لقيته بيقول لي أنا عايز ميه روحت أجيب له وأنا مش طايقاه وماشيه بالراحة قالي بسرعة يا بنت قلت له مش قادرة رحت جبتله كوباية قال لي لا عايز إزازة رحت أجيب له زفت قال لي لا ده أنا بهزر في بيتنا معلش أصل أمى وأبويا ناس طيبين بزيادة....

المهم بقى بييجي تاني وأسلم عليه غصب عني وهو بقى يتعامل عادي تاني مع إني مش بكلمه تماما في التليفون ولا بنروح عندهم، آه نسيت أقول إن مرة بعد الحادثة دي أمي كانت بتعمل عمرة اتصل يطمن علينا على تليفوني في وسط الكلام بقولي عقبالي أنا وأنت ما ردتش وسكت بكل أسف وقبل كده زمان من ضمن كلامه بيقول لي يا ريتك تحلي لي...

المهم آخر حاجة حصلت من حوالي سنة وأمي كانت رجليها مكسورة وجه يتطمن عليها هو وأخوه اللي هو محترم فهو شخص استعراضي كده وفاكر نفسه دمه خفيف فكان عايز قلم يكتب على الجبس ومفيش غيري قمت أجيب له لقيته واقف ملاصق ليا وقلب الحوار على حاجة تانية مش قادرة أفتكر بداية الحوار اللي فاكراه إنه بيقول أصل هو بيحب البنات أوى وطول النهار بيقبل بناته وهم شابات منهم واحدة متزوجة فهما بيقولوا هو أنت عندك جفاف عاطفي ولا إيه وكان ملاصق ليّ بشكل استفزني وقلت له بس أنا بقى ما بحبش حد يقرب مني وقمت مشيت بعصبية كده ودمي فار ولقيت أمي بتأكد على كلامي وكانت لسه ما تعرفش حاجة وخالي المحترم موطي في الأرض ومتجهم وأنا قلبت له وشي وخليت عيني جت في عينيه وبصت له بحدة جدا وبقرف مع العلم أنه شخصية شريرة جدا ومن ساعتها وأنا قالبة وشي وبسلم عليه باليد فقط قدام بابا لأن بابا ما يعرفش ولو عرف هــ يعمل مشكلة لأمي.

أنا عايزة أضيف إني حاليا لست فائقة الجمال وملتزمة بالزي الشرعي يعني في العيلة في بنات أجمل مني وبيلبسوا ضيق مش المنطق بيقول إن التحرش يكون بيهم وأنا طبعا رافضاه لنفسي ولغيري....

أنا عايزة أضيف إن رحت لخالي المحترم وحكيت له ما حستش إنه استغرب ولا حاول يهاجمني مثلا كان بس بيقنعني إنه عنده كبر مثلا...

السؤال بقى أنا كده ماشيه صح؟؟ طيب أتعامل معاه ازاي وسط باقي العيلة؟؟ ولو حد استغرب موقفي أقول إي؟؟

وإيه ممكن تاني أعمله عشان آخد باقي حقي عشان بيراودني شعور إني أجيبه نصفين
 وجزاكم الله كل خير
14/12/2017