|
| 
|
هل أنا مصابة بالاكتئاب؟
بقالي مدة طويلة تقرب على أسبوعين مش في حالة نفسية مستقرة مش بخرج من البيت ماخرجتش غير 3 مرات وكانوا إجباري وفي التلاتة ماكنتش بسيب التليفون من إيدي وأول فرصة متاحة لي علشان أروح البيت بروح وأرجع أوضتي تاني
وقتي كله على التليفون بلا أي هدف ولما بسيبه بمسك اللابتوب وأقعد أتفرج على أفلام علشان أحاول أخرج بيها من المود، بتجيلي نوبات عياط متكررة بالليل ومش ببقى لاقية ليها أي سبب وبحاول أستخبى من أهلي علشان بس محدش يسألني مالك أو بعيط وهما نايمين وكل ما أقولهم حاسة أني مش كويسة بسمع منهم كلام تافه يحسسني أني ماليش أي وجود فبكره فكرة الكلام معاهم من البداية
من حوالي أربع أيام كنت بظبط خروجة مع أصدقاء طفولتي كنت بحاول أخرج من حالتي النفسية بس واحدة من البنات كلمتني وحذرتني من الخروج معاهم لأنهم بيتفقوا علشان يأذوني وأنا معملتش أي حاجة لحد وما أذيتش أي حد قبل كده في حياتي حتى لما كنت مش لطيفة مع حد منهم قبل كده في الكلام دخلت اتكلمت واعتذرت عن كلامي البنت اللي نبهتني للكلام ده مقالتش ليا أي تفاصيل بس كل اللي قالته إنها عاوزة تقابلني في أقرب وقت علشان تفهمني الموضوع، اليوم ده أنا جالي انهيار وفضلت بعيط لحد الفجر لأني مكنتش فاهمة حاجة وكنت مصدومة من اللي حصل ومكنتش متخيلة منهم إنهم يأذوني
تاني يوم صحيت كنت أحسن وقابلت بنات عمي وكنت كويسة لما نزلنا بس لما روحت رجعت لحالتي وقعدت أعيط تاني يوم نزلت لجامعتي أجهز أوراق سفر للسعودية وأدفع مصروفاتي وقررت أني أروح عند عمي يمكن أغير جو وأبقى كويسة وكنت هقعد يومين بس روحت في نفس اليوم وكنت كويسة إلى حد ما لحد ما نمت اليوم اللي بعده فضلت طول اليوم في السرير ماسكة التليفون لحد ماحسيت بتقل في قلبي إني عاوزة أعيط رحت بدأت في العياط ومكنتش لاقية أي سبب وبعدين هديت شوية وبعدها بدأت نوبة تانية من العياط المفاجئ وفضلت على الحال ده لحد مانمت والنهاردة صحيت قررت أبقى أحسن نزلت النادي وطلبت أكل بحبه وعصير بحبه وأكلت وشربت بس مكملتش ساعتين وروحت تاني
لما نزلت النادي كان مع أمي وصديقتها، صديقتها علقت علي وقالتلي خسيتي وشكلك تعبانة بالرغم من أني كنت لابسة واسع وحاطة ميك أب علشان ميبانش علي الإرهاق بس مع ذلك كان باين ولما روحت قولت أنا هبقى كويسة وعملت سكين كير وأخدت شاور وكنت مبسوطة وقعدت اتفرجت على فيلم، لكن بابا جه من الشغل وبدأت تعليقاته عليا بأني مابقتش أضحك زي زمان وإن الأفلام اللي فيها دراما وبتخليني أعيط دي هتأثر على نفسيتي وأني صغيرة على أني مبقاش مبتسمة ولما جيت أوضح له أني حاسة بفراغ في حياتي ويومي فاضي وبشغله بالتليفون والأفلام ضحك وقالي ساعدي أمك في المطبخ وكده هتشغلي وقتك
وبكده استعدت حالتي وبدأت في العياط مرة أخرى، المشكلة إن أنا مش فاهمة نفسي ولا عارفة أنا عاوزة إيه حاسة إني عايشة بس من غير حياة حاسة بفراغ في حياتي مش عارفة أملاه حتى معنديش أي هوايات غير الأفلام ومعنديش حد أخرج معاه علشان أخرج من اللي أنا فيه بالإضافة إن أنا مش قادرة أرد على أي حد ولا قادرة أتكلم مع حد حتى أهلي لأنهم بيسخروا من اكتئابي وبعضهم يصفه بعدم الثقة في النفس وأمي بتقولي إن أنا منكدة عليهم بسبب حالتي وبحس إن كلامي معاهم مش بيعمل حاجة غير إنه بيخلي حالتي أسوء وأسوء
مارحتش قبل كده لأي دكتور نفساني لأن أهلي رافضين وشايفين إني بتدلع إن مفيش حاجة تستاهل اللي أنا فيه وإن طول ما أنا باكل وأشرب كويس يبقى أحمد ربنا ومتضايقش بسبب أي حاجة
على مدار السنتين اللي فاتوا خسرت أشخاص كتير وحالاتي المزاجية اللي بتتغير سرعتها بتزيد أني أبقى في مود مش كويس دي بقت حاجة عادية بالنسبالي الفكرة بس في حدة الحالة النفسية اللي فيها وبحس إن كل شوية حالتي بتسوء يعني زمان كان ممكن أبقى مش كويسة يوم واحد بس تاني يوم أبقى زي الفل وكان مفيش حاجة مع الوقت بدأت المدة تزيد باليومين والتلاتة لحد ما وصلت دلوقتي لأسبوعين ولسه مكملة
اليوم بيبدأ بأني ببقى كويسة بس في أي لحظة بقلب وأرجع أعيط سواء حد جه ناحيتي أو لا وبمجرد ما أبدأ أول مرة عياط في اليوم بيفضل يومي عبارة عن أني أعيط شوية وأمسح دموعي وأقول هبقى كويسة وأضحك وفي ثانية أعيط من غير مقدمات لدرجة أني بجد حاسة أني عندي انفصام وشخصيتي بتتغير غير عصبيتي الزايدة وإن طالما حد ضايقني خلاص يبقى كلهم هعاملهم وحش بالرغم إن مالهمش أي ذنب
بداية إحساسي بالخنقة في الفترة الأخيرة كان يوم 29/7 بعدها رحنا مصيف وماكنتش كعادتي هناك كنت حاسة إني عاوزة أفضل في الأوضة أغلب الوقت بس كنت بدوس على نفسي علشان أحاول أتبسط بس كل ما كانت بتبقى الفرصة متاحة قدامي كنت بقعد لوحدي وأسرح في لاشيء، نومي الفترة دي متلخبط تماما بنام 8 الصبح أو 7 وأصحى العصر أو أنام الساعة 12 بالليل وأصحى الفجر وأكمل للصبح وأنام لحد العصر أو أفضل مطبقة لحد بعد الظهر وأنام لحد المغرب مش ثابتة على حاجة
ومابقتش طايقة الأكل ممكن أقضي اليوم كله على وجبة واحدة وآكل الوجبة التانية لما افتكرها وساعات بكسل فمش باكل ولو أكلت بيبقى بالليل متأخر أوي، بنقص في الوزن لدرجة إن الناس لاحظت زي ما قلت قبل كده
عاوزة أشغل نفسي في أي حاجة بس بجد مش عارفة أعمل إيه ولا أعمل كده ازاي محتاجة حد بس يمسك إيدي ويحطني على الطريق
بقيت بالليل وأنا سهرانة كل ما ألاقي نفسي هبدأ أعيط بكتب في النوت بتاعتي كل اللي أنا حاسة بيه فبعيط وأنا بشرح اللي جوايا
30/8/2022
رد المستشار
شكرًا على مراسلتك الموقع.
لا يستطيع الموقع أو غيره تشخيص الاكتئاب بثقة بدون فحص الحالة العقلية للمراجع ولا يتم ذلك إلا عبر استشارة طبيب نفساني على أرض الوقع.
هناك أيضاً فارق كبير بين أعراض اكتئابية تصل أو لا تصل إلى عتبة معينة تتميز باستمرارية الأعراض تأثيرها على أداء الإنسان الوظيفي. الكثير من أعراض الاكتئاب لا تصل إلى هذه العتبة ورغم شعور الإنسان بالكآبة والحزن ولكن ذلك لا يعني بأنه يعاني من اضطراب الاكتئاب.
تشيرين في الرسالة إلى أن مدة الأعراض أسبوعين٬ وهذه فترة قصيرة نسبياً٬ والقاعدة العامة في الممارسة المهنية هي عدم تشخيص الاكتئاب بسرعة وتشجيع المراجع على الخروج من موقعه الاكتئابي بتنظيم إيقاعه اليومي وممارسة تمارين رياضية يومية. الأهم من ذلك عليه التفاعل مع الضغوط التي يتعرض لها وتجاوزها.
رغم كل ذلك فإن رسالتك مشحونة بوصف لأعراض اكتئاب وفي البداية حاولي الحديث مع المقربين لك حول مشاعرك وأسباب شعورك بالكآبة وخلق العزيمة في داخلك للخروج من هذا الموقع الاكتئابي. إذا فشلت جميع المحاولات بعد أسبوعين من الآن فتوجهي صوب طبيب نفساني.
وفقك الله.
تعليقات الأعضاء