لا أعرف كيف أتعامل مع الآخرين؟

 السلام عليكم
 
أنا حاليا في 2 ثانوي، من وأنا صغير كل دروسي كانت في البيت دروس خصوصية (كانت الظروف الاقتصادية وقتها كويسة) مكنتش بنزل الشارع كتير أو شبه مكنتش بنزل أصلا، فضلت على كده لحد 1 إعدادي بدأت أنزل اكتشفت إني معنديش صحاب وإن كل الناس عندها صحاب واكتشفت أني مش عارف أكون صحاب مش عارف أكلم حد أصلا أو أفتح كلام معاه في الدروس مثلا علشان يبقي صحبي
 
بعد شوية بدأ طلاب معايا في دروس بتنمروا علي علشان نطقي بنطق حروف غلط زي حرف الراء وعلشان عندي حب شباب
 وفوق ده كله كنت بحس نفسي منبوذ لأني ماليش صحاب، كان فيه مشاكل كبيرة في البيت في الوقت ده وكل شوية تحصل هيصة
 وأهلي يعني من يوم ما اتولدت هما مش مركزين معايا لأني أصغر إخواتي بفرق 20 سنة عن أكبر حد في إخواتي فهما مكانوش فاضين ولا قادرين يشوفوني لأن بابا حالته الصحية اتدهورت (فيروس c وكانسر) وماما كانت دايما مشغولة بتعب بابا ومشاوير للدكاترة وكده
 
 فأنا شبه أهلي ميعرفوش عني أي حاجة سواء بابا أو ماما أو إخواتي،،، المهم في أولى إعدادي كنت بلعب لعبة أونلاين على الموبايل واتعرفت فيها على واحد أكبر مني بسنة وكان شخص كويس ومحترم وعنده نفس الاهتمامات عاوز يبقى مبرمج وكده ولقيت أني بعرف أكون صداقات من اللعب الأونلاين أو الفيس بس مازلت مش بعرف أكون صداقات في الحياة الواقعية
 
 كورونا جت في تانية إعدادي علشان أنا وإخواتي وماما عندنا أمراض في الصدر فمكنش فيه حد بينزل من البيت نهائي غير للضرورة القصوي،، فضلنا علي كده ... تالتة إعدادي كان حلمي بجد أني أدخل مدرسة ستيم وكان حلمي بجد ذاكرت جامد أوي أوي أوي في أول ترم بس طارق شوقي وقتها قال إن امتحان الترم الأول مش مضاف للمجموع،، الترم التاني المشاكل اللي في البيت كبرت أوي وصحابي اللي أعرفهم على السوشيال ميديا بدأوا يقولوا فيا عيوب كتير وبعدين يمشوا مع أني والله ماكنتش بالعيوب دي معاهم ودايما بحاول أعامل اللي قدامي كويس حتى لو كنت متضايق أو مكتئب بحاول أرد كويس علشان مضايقش اللي قدامي
 
 المهم بسبب الكام حاجة دول أنا نفسيتي اتدمرت ومكنتش بذاكر نهائي الترم التاني، جيت في آخر شهر قبل الامتحانات بدأت أذاكر (مكنتش باخد دروس علشان كورونا برده) وذاكرت على قد ما أقدر حرفيا كنت بنام في اليوم أقل من 4 ساعات وبشرب كمية قهوة رهيبة، بس دايما البيت كان هيصة وبجد كانت ظروف ماتسمحش أني أذاكر فيها، مع ذلك ذاكرت على قد ما قدرت.. امتحنت والنتيجة بانت وللأسف يعني نقصت في العربي والانجليزي وقفلت باقي المواد والسبب أني مادخلتش أني نقصت في العربي والانجليزي
 
 وقتها حرفيا اكتئبت جامد أوي وفضلت فترة كبيرة كده لأن كل حاجة باظت صحابي بعدوا عني وكمان شافوني شخص مينفعش يبقى صاحب، حلمي ماعرفتش أحققه، أهلي عمرهم ما كانوا واثقين في أنا أقدر أحقق حاجة أصلا... دخلت ثانوي عام واتعرفت على ناس جديدة على السوشيال ميديا وبردو فترة وبعدوا عني لأسباب تافهة فضلت مكتئب طول أولى ثانوي بردو
 
 تانية ثانوي ماحصلش جديد بردو زي مانا مش عارف أصاحب حد، مش لاقي حد أكلمه وأنا متضايق، مش لاقي حد أفضفضله، حاسس أني مجرد نكرة محدش شايفني ولا معبرني.. ثقتي في نفسي معدومة لدرجة إن لو حد جه قالي شكرا أو قالي أي حاجة حلوة أنا مبقتش بعرف أفرق هو بيقول كده علشان هو صح ولا هو بيجاملني وبس، وبقيت بعتبره كله مجاملة وخلاص
 
 علاقتي بأهلي علاقة عامة جدا هما ميعرفوش عني أي حاجة حرفيا (و ده مش بسببي) مش عارف ليه بيحصلي كده، أنا مش وحش
 ولو كنت وحش فهما ليه اختاروا يبقوا صحابي وبعد سنين صحاب يكتشفوا فجأة أني شخص وحش ويبعدوا عني! سنين علشان يكتشفوا ده!! ولو أنا مش وحش فهما ليه بيبعدوا عني!! مش عارف أعمل إيه في الsocial anxiety وبجد الحوار زاد أوي لدرجة أني مبقتش أعرف أدخل سوبر ماركت أشتري طلبات أو أتكلم قدام حد عموما بكره شكلي، بكره نفسي، بكره صوتي
 
 مش عارف حل ده إيه!! فكرت قبل كده في الانتحار كذا مرة بس حرام دينيا غير كده كنت انتحرت فعلا.
 مش عاوز الرسالة تتنشر لو سمحت
 10/12/2022