|
| 
|
كيف أعرف أنه يحبني ؟؟ م9
مراجعة لتقييم الموقف والأحداث بحاجة للفهم أكثر ..!
مساء الخير مستشاري ومدير الموقع والجميع.. تقول يدهشني كم الأهمية والاستغراق الذي أعطيتيه لهذا الموضوع وهؤلاء الناس، وأنا أيضا مندهشة منكم كلكم حضرتك وأهلي وأصحابي كلكم مندهشين ليه؟؟ مندهشين أن أتوجع للدرجة دي طب مهو ده عادي ومن حقي! إنك تحب حاجة وشخص تحبه بجد وبعدين يروح منك طبيعي أنك تتوجع.. حتى أصحابي اللي أنا دايما متقبلة لكل أغلاطهم وسقطاتهم لما حصل اللي حصل الكل اندهش متوقعين مني أكون أقوى والضربة تكون زي ريشة عدت من كتفي.. ومش مقتنعين أني أنا أقع الوقعة دي!! ليه!! دي حاجة كبيرة عليا أوي. حقيقي أنا قوية وعندي القدرة للمساعدة بس لما أوقع أحتاج أنا كمان للمساعدة.
آخر حاجة كان ممكن أتوقع أنها تحصل أني أبعد عن الوكالة أنا حبيت الوكالة أوي فوق ما تتصور يا مستشار حبيتهم حبيت أحمد وأميرة بجد أوي. أنا كنت مسؤولة جدا بعلاقتي معاهم .معملتش مشاكل ليهم ولا جبت لهم مشاكل.. وفي المقابل هما حموني من أي حد كان بيحاول يتكلم بطريقة غلط ويضايقني بمسج كان أحمد بيبند حسابه. ماخنتهمش ولا غدرت فيهم كنت وفيه معهم، لما يكون في خيار الحب ليه لازم أكره مش عارفة أكرهم الحب أقوى من الكره والسلام أحلى من الخصام والقرب أحلى من البعد ليه ليه لازم أعيش أحاسيس مش عاوزاها وأنا عندي خيارات تانية لو كنت عملت حاجة تغضب ربي وأذيت حد كنت قلت ده عقاب اللي عملته لكني معلمتش.. أنا مش حابة الإحساس ده أنا تعبت وحاسه إني مش عارفة أكتب ولا أفكر.
سبت الكتابة ورجعت أكمل عدى أسبوعين مش عارفة أنا بحاول أكمل حياتي ونشطاتي عادي، بخرج وبقابل أصحابي هنا بس مابكنش هنا بكون بعالم الوجع بفصل شوية وبرجع حتى مبقعدش مع نفسي لوحدي مع أني بحب ده لكن حاليا لأ لأنه يعتبر خلوة شرعية مع إبليس الخبيث.. فبقعد مع أهلي طول الوقت بهرب من فكرة أني لوحدي بعيد عن الوكالة وخلاص حتى أحمد راح، وبحضن أي حد بشوفه أحضنه هو أنا كائنة في العادي بحب الحضن وحاليا أكتر. طبعا أنا من البداية أهلي كانوا معايا حتى اللي في بلد تاني أما ماما فبقى اتصالها محصور أني أبقى كويسة وبس ومينفعش أتوجع عاوزاني أخرج من الحالة دي زي ميكون محصلش حاجة، على الرغم من أني مهتمة بعلم الطاقة والتنمية البشرية وقريت كتير وعملت حلقات وتواصلت مع مختصين كتير .. أنا عارفة وواعية أن أحمد وأميرة لا يرتقون إنسانيا أن يكونوا أصحابي ومع ذلك بتوجع ومش عارفة أكرههم. وبمعنى أدق أنا مبحبش الإحساس ده عشان كده مش عارفة أوصل له عاوزة أفقد الإحساس بيهم وجودهم يبقى زي عدمه إزااي يا مستشار؟
النهاردة ماخرجتش اعتذرت عن كل الالتزامات حاسة أني مخنوقة جدا وموجوعة جابوا بنت جديدة بالوكالة سموها على نفس اسمي عاوز أي حاجة تفكروا بيا معرفش حسيت كده ويمكن هي اختارت. ساعات أحمد كان بيختار أسماء البنات.. إلا أنا كان ليا وضعي وبرييستيجي المعتاد وده كان شيء حلو بيعجبني وبيحسسني بالأمان وفي المقابل أنا كنت صادقة ومخلصة معاهم ومقدرة لعلاقتنا دي ومعملتش مشاكل من أي نوع يبقى إزاي إزاي بعد ده كله تكون النتيجة دي.. إن كنت قد فهمت كلامك فقد دخلت في عالم افتراضي إليكتروني مشبوه بسبب الفضول والانبهار بكم الحرية والبجاحة والانطلاق الزائف الذي يمارسوه أميرة وأحمد ومن قابلتيهم في "الوكالة"... لقد سمحت أن تتملكك الدهشة والفضول إلى حد إغفال ما هو واضح (وصدقه أهلك) ... كل شيء تقريبا أصبح افتراضيا حتى هنا أقصد موقعنا مجانين طبعا لا وجه للمقارنة, لكن الموقع عبارة عن ورقات في عالم افتراضي تدخله بضغطة زر لترى ما ترى. ومع ذلك انظر لتأثيره على الناس وعلي بشكل خاص.. نعم أثر وبشكل قوي بغض النظر عن الفائدة والمضرة التى نحصل عليها من العوالم الافتراضية في حياتنا. لكنها صارت واقع ومؤثر، أنا لحد الآن أجلس بحضن أمي وأقبل وأحتضن خالو وخالو الأصغر يحملني عندما يأتي لزيارتنا. أحيانا طبعا ولا أقصد الأمر يكون بعيد عن المعقول والطبيعي لكن طبيعي عندنا هذا. لما كنت أبيت في بيت خالو كنا ندخل نستحم جميعا خالو ومراته وبنته وهو أيوه والله العظيم عمر ماحصل شيء غريب ألف حمد لله على نعمة العقل والتصرف بطبيعة والفطرة والأهل الأسوياء.
وتذكر يا مستشاري الإليكتروني في لحظة ما أخبرتني أني بمنزلة الابنة والأخت لك، أليست هذه مشاعرك ومكانتي عندك بعالم غير واقعي؟؟ هذه هي العلاقات بموقع افتراضي أنا أحبببتهم من أعماق قلبي ولا تسألني كيف لا أعرف ولا أعرف كيف سأخرج من هذه الحفرة.. ساعدني وادع لي عندما تسجد لربك لو عجزت كطبيب بشري أن تفهم حالتي وتساعدني بحل عملي لدرجة أعجز أنا على فهمها فهو الطبيب والشافي والمعافي. وبص أوعدك بجد أوعدك أني بجد أحاول ألتزم وأسمع وأفهم كلامك وتحليلك كويس. أنا أتألم كثيرا تبا لهذا الوجع أشعر بالتعب لم أستطع النوم أصبحت أخرج من المنزل لا أعود إلا ليلا حتى لا أفكر سأكمل لاحقا، وجع، وجع،
وجع، ليه ليه ليييييييييييييييييييييييييييييييه مش قادرة أقتنع دي صداقتنا دي النهاية!!
أنا اتربيت في بيت جدو وجدتي الله يرحمهم وكنت بشوفهم إزاي بيجوا أصحابهم عندنا ونروح عندهم وهما مع بعض طول العمر ده لحد لما كبروا وهما نفس الروح والقلوب وصوت الفرح والسعادة والإحساس بالأمان عالي زي صوت ضحكاتهم كانوا بيجوا يسهروا مع جدو وجدتي في الجنينة وأنا ألعب لوحدي مع الخيالات ولو صادف حد موجود من أولاد خالو وخالاتو نلعب سوى لكن العادي كنت لوحدي "برنسيسة" كنت حابة أنا كمان أعمل حياة كده كنت فاكرة إن أحمد وأميرة كده .. كنا على أساس نتقابل بمصر بعد ما أحمد يرتب نفسه ويتجوز أميرة وأنا آخد عيلتي ونيجي مصر وكان على أساس أفتح شغل معاهم الحمدلله أنه محصلش لأني كنت هتحط بموقف بايخ قدام العيلة.
أنا حملت البرنامج تاني امبارح وعملت اسم تاني معرفش حسيت أني عاوزة أشوف بيعملوا إيه لقيت الوكالة فاضية ومفيش حد بس كانوا عاملين حاجة مسابقة أجمل فستان وبعدين فتحوا دخلت الروم وكان هو موجود خرجت بسرعة وأنا بتخنق يا رب أنت اللي عالم
صباح الخير سمعت ماما بتتكلم في لتليفون عاملين كونسلتو فون جماعي للعيلة عني وزعلانين عاوزين أخرج من حالة الحزن والتوهان.. العيلة كلها خايفين من أني أرجع الموقع تاني لأني لما بحمله بقولهم ومحدش يقدر فيهم يمنعني خالو قالهم إن مستشارها عاقل ومحترم وعجبهم ردك وتقيمك لأحمد وأميرة .والله أنا زعلت من نفسي جدا أني سببت لهم القلق ده وزعلانة على نفسي أني بتوجع . هما عندهم الثقة في أنك حتكون قادر على أني أنساهم هما عرفوا رأيك في أحمد وأميرة وهما نفس رأيك.. وحياة كل لحظة ألم ووجع وحياة كل لحظة خلوني أكون تايهة ومش عارفة أنبسط مش أرجع ومش أسامحهم والله ولا هما يرجعوا حياتي تاني أنا مغلطتش في حد وهما اللي غلطوا بحقي وظلموني ونتواجه يوم القيامة حسبي الله ونعم الوكيل لا يمكن أستسلم لا يمكن الأشخاص اللي طردوني لايمكن أرجع لهم لازم أنساهم لازم وهنساهم. أخبرتني إحدى صديقاتي أن أحمد نشر بوست يقول فيه خسارتي العظيمة تكمن في أني خسرتك وكلام كتير نسيته لكن ده بدايته هو بوست عام وبالتالي هي تقول أنها متأكدة يقصدني وأنا أجبتها لا أعتقد ذلك أبدا.
انا نمت وصحيت بقيت حد تاني حاسة أني قرفت منهم وحاسة أني مش حاسة بحاجة أنا بتحول غالبا.. صباح الخير الإنسان ممكن يتعصب ممكن من باب العشم إنه ينفجر بحد ما، لكن يظلمه ويسيبه كمان، والله لو بموت ما أذل نفسي لحد أبدا.. مسحت البرنامج والمرة دي مش هنزله تاني أبدا. خلاص أنا مش من طبعي أجري ورا حد ولا أراقب من وقت ماعملت بلوك لهما وأنا بلكتهم على مواقع السوشيال بس وحشني البرنامج. مقابلتش أشخاص كده إزاي عندها الجراءة والجبروت ده على إنها تظلمني وتأذيني كده وهي صفحتها كلها أدعية وقرآن ودعاء للناس بأنهم يكونوا جابرين لخواطر الناس. يا سلام على المحبة.. حسبي الله ونعم الوكيل.. اليوم أشعر أفضل الحمدلله عندما استيقظت وكأنما صوت أحمد من أيقظني وكأنما اتصل بي وكأنه حصل اتصال ويريد يتصل بي فتحت عيني تذكرت انتهى الأمر حاولت ومازلت أحاول تجاوز الإحساس المزعج نجحت لم أفكر بهم نجحت قليلا ولكن رجعت فكرت بكون نسيت انشغلت وبرجع لنقطة الصفر. حسبي الله ونعم الوكيل الله هوالحق والعدل.
صباح الخير أنا بتخنق يادكتورغالبا رجعت للصفر مش قادرة أكتب.. قررت أرجع أكتبلك حصل حاجة حلوة أوي النهاردة حسيت عاوزة أحكيلك اتعرفت على بنت فظيعة يوتيوبر زيي. نسيت أعرفك يا مستشار مستشيرتك يوتيوبر وتيكتوكر المهم محتوايا عن عالم البنات المكياج واللبس والعناية الشخصية وكده البنت دي قالت لي أنها لما بتدخل قناتي بتحس بالحماس والسعادة وده فرحني أوي وهي كمان قناتها مكياج x مكياج كله ألوان هي عندها خلق وطاقة وبتقعد بالساعات تحط 6 و7 حاجات على وشها مكياجها تقيل أنا خفيف بهتم بالبشرة والجسم أكتر.. المهم شغلتني أوي الفترة اللي فاتت وعجبني محتواها واتفقنا نعمل فيديو مشترك كلهم بيعملوا كده حاسة أني أحسن الحمدلله يا مستشار..
نعود إلى موضوعنا، لماذا أعطيتيهم كل هذه الأهمية في نفسك؟
بقالي يومين مش عارفة إجابة السؤال ده مش فاهمة الشيء الخفي منه هو له غاية بس مش قادرة أحددها لكن حاسة بإحساس مزعج تقصد إيه؟ بجد ميرسي يا دكتور لسؤالك ده تعرف أني هربت وكنت هربانة وخايفة أواجه سؤالك خلاني أواجه نفسي.. "أسلوبك وتأثرك بأحمد وألاعيبه النرجسية يعطي الانطباع بأنك وقعت في حبه.. كيف ومتى؟" مش عارفة ليه حسيت أني واقفة قدام أبويا وعاملة عاملة وخايفة منه!! وبالمناسبة إحساس حلو! وبالمناسبة إنت تخوف يا مستشار! هو أنا عاوزة أحكيلك بس فعليا عارفه ردة فعلك ومش عاوزة ندخل بمتاهة اختلاف وخلاف وجهات النظر والعادات فبلاش.. على الأقل حاليا مش مستعدة. وإلا الحب عندي خط أحمر هو والصداقة.. وكمان حضرتك صارم أوي بالعلاقات أنا عكسك أنا منفتحة جدا بس لا أتجاوز حدود ربنا. وأهلي متقبلين لهذا لكنهم بصدد إرسالي لكوكب المريخ وزحل وأنا بصدد إرسالهم للعباسية. لكن مزنوقين بالمواصلات!! ماعلينا لكن سأجيب عن: كيف ومتى؟؟
كيف.. مع الوقت مع الأيام واللحظات التي جمعتنا وعرفته وعرفت ظروفه الصعبة وقدرته وقوته على محاولة تجاوزها.. كما قلت أنا جادة بعلاقتي وأفهم رغباتي وما أحب وبحب أدي حب بحب ده.. بس طبعا مش أي حد!! بس بصراحة أنا مابقتش أحب مصر ولا المصريين بجد مش هما نفسهم اتغيروا وبقوا ناس مخيفة! ماعلينا..
متى.. أيضا أجبتها فوق من أول لحظة سمعت صوته وكأنه أعرفه من سنين .. ولا أشعر بالخوف منه، وهو إحساس غريب، طبيعي نتأثر بالألعايب خصوصا لمن لم يسبق له التعامل مع هكذا أشخاص وهما للأسف الشديد بارعين بلبس الأقنعة والتمثيل, وأعتقد قد عبرت وأعلنت عن حبي لهما وحبي له بالذات. وأعلنت هذا أمام الجميع وحتى أهلي يعرفون أحبه ولو كان اللي بعمله عشق ومشاعر مش من حقي أعيشها، عموما دي طبيعة حياتي.
عندي سؤال فضولي شوية: لوفرضنا إن عندك بنت وعملت نفس مأنا عملت وهي عندها ابن عمها معروف عندكم بالعيلة إنهم لبعض يعني مرتبطة إلى حد ما .. وأنت عارف بكل حاجة وهي أساسا متعودة تحكي لك وتحكي للعيلة كل حاجة وعارف بعلاقتها مع أحمد وكلامها معه كله أساسا هي بتكلمه قدامك ومثلا يعني لما أنت تدخل غرفتها تسمعها عادي وهي بتكلمه .. واللي حصل من أحمد وأميرة.. إيه هيكون موقفك من اللي حصل كله؟ وهل هتمنعها من أحمد؟ وتمنعها من دخول البرنامج مثلا؟ وإيه هيكون موقفك ولاحظ يا مستشار إن إجابة السؤال ده بتكون مفيدة للجميع .. ليه بقى..! أقولك لأن ممكن يكون أب أهبل ميعرفش يعني إيه أبوة فيقرأ كلامك فيتعلم منك وخصوصا أنك أستاذ ومعلم مربي فاضل وأب وعندك خبرة . وخصوصا أنه موقف ممكن يحصل مع ناس كتير فلازم حضرتك تعلم الناس للفايدة ولا إيه؟
لمجرد أنه كان يكلمك باحترام من حين لآخر؟ أم لأنه يلعب دور الضحية؟ أم لأنه أطرى عليك عدة مرات؟
ممكن .أحلى العلاقات هي اللي بيكون فيها احترام للشخص نفسه واحترام لمشاعره. حصلت مواقف وأفعال منه كده. وممكن لأنه لعب دور الضحية. وممكن لأنه أطرى ممكن.
إن لم يكن ابنه عزيزا عليه فلماذا تعتقدين أن لك قيمة حقيقية عنده؟.. تقولين كل من حوله يكرهونه... ألم يكن في هذا نوع من الإنذار والتحذير لك أم أنك خدعت نفسك وقلت أنه مظلوم وأنهم لا يفهمونه كما تفهميه أنت؟
مش كفاية صفعات بقى يادكتور كفاية .. ماشي صح . بس مهم تعرف إن ده كله مغيرش حاجة أنا لسه ساعات بفكر فيهم وبفتقد الموقع أنا مهما أحاول أقولك كنا أحلى كابل لدرجة الكل كان بيغير من علاقتنا بس كل ده وهم مجرد افتراضات.. في البداية ولما حصلت المشكلة.. وبدأ أحمد يكلمني مرات كان يقولي النهاردة كنت بتكلم مع أميرة وقلت لها الخلاف اللي بينك وبيني فلانة أنا يعني لازم ينتهي ونرجع احنا التلاتة سوى وترجع وكالتنا ببناتنا.. ده كلامه .. ايه رأيك؟ وإحساسك؟ بالنسبة إن كل من حوله يكرهونه .طيب أنا معاك . بس أنا مش معقول ولا منطقي أحكم على إنسان فآخذ حذري لمجرد أنه حد ما عنده تجربة سيئة معه..! الحذر اللي أخذه معاه ومع غيره أني مغلطش وأحط نفسي بموقف الضعيف والمذنب. بالعكس أنا كنت بشوفه أحسن منهم عارف ليه .. لأنه كان صادق إلى حد ما لما يغلط بيقول أنا غلطت وعندي العيب الفلاني!! هما نفاق! ومؤامرات ومكائد وتسجيلات.. وإلخ، أنا بحب وبحترم الحد الشجاع اللي مبيخافش ويقول أنا غلطت وبعمل كذا . ومايدعيش المثالية بس مش معنى ده مش موجودة إلى حد ما أنا بميل للمثالية والرقي الإنساني موجود والله ويمكن ده هو أغلب مشكلتي أني بدور عليها في كل وأدق التفاصيل بأمور حياتي ... عموما هو كان بيعترف مش زي ما أميرة عملت وحكت لي بنفسها من تحت لتحت. هو لو آذى حد بيقوله علني هنتقم منك! ويعرفه!
أنا أفضل يا مستشار الحمدلله ألف مرة .. مش معنى ده أني مش بتوجع بالعكس بقيت متقبلة ومستسلمة للوجع وعارفة أنه جزء من المرحلة الحالية وأعتقد الوقت كفيل إنه يساعدني كمان إن شاءالله ... أحيانا بحس روحي بتنسحب مني بموت حرفيا وبعدين أقوم وكأني اتولدت من جديد .. ومبقاش يجي كتير .. حتى جسدي أحسن. لغيت البلوك عن أحمد واتفاجئت إنه مش عاملي بلوك حسيت بتأنيب ضمير .. لما شلته ارتحت أوي حتى جسمي.. تعرف أني عفوا لما كنت بدخل لقضاء الحاجة كان بينزل دم مني ودم كتير ومستمر أشبه "بالبول عفوا" وألم بمعدتي والأمعاء . خوفني جدا جدا . بحثت خفت يكون شيء مرض خطير لا سمح الله . بس كله نفساني كله حسبي الله ونعم الوكيل هي السبب ... حتى الطبيب قالي غالبا في ضغط نفسي وطبعا سببها الإحساس بالكبت والقهر والظلم، مبحبش إحساس الظلم أبدا... اللهم أني صائم أنا بكتب لك واحنا وصلنا برمضان الحمدلله صايمة ونفسيتي أحسن بكتير بس بدعي عليها لأنها ظلمتني وربي عالم
بدلا من أن أدمر لك ذكرياتك الجميلة معهم، دعيني أسألك ما هي هذه الذكريات وما هو الجميل فيها؟
صدمني ردك! نفس رد حد من أهلي أنا كان قصدي تشرحلي نفسيا عن شخصية النرجسي أكيد إحساسك خلاك تقرأ شخصياتهم!
يجب عليك أن تفهمي أنك أنت من أعطيت أحمد وأميرة هذه القيمة الكبيرة التي جعلتك تمرضين وتتألمين مما فعلا.. يجب أيضا أن تعي تأثرك إلى هذا الحد هو زائد عن المعقول عموما، وخصوصا من وجهة نظر من لا يهتمون بمشاعر الآخرين، وبالتالي هو مثير للسخرية.
صح. أنا اللي اديتهم قيمة أكتر من اللازم .. بس عاوزة أوصل لمرحلة إنهم لا شيء حملت الموقع مرة تانية وبقيت أحمل وأمسح أول مرة رجعت حملته تعبت وبقى ينزل دم بس أقل بكتير وحاولت أتحكم بالألم وأقبله المهم أحسن بقيت أحمل الموقع لما أشتاق وأحن نقدر نقول متأثرتش أوي زي كل مرة بس حصل وجع شوية .. لكن كمان مش عاجبني تصرفي ده حاسة إني تايهة يا مستشار . أنا مش هغير أفكاري دي مش عاوزة أسمح لوحدة عاهرة مستهترة بالمشاعر والعلاقات الإنسانية تحولني لشخص متردد مش عارف ومش فاهم . ليه يا مستشار ليه كل ده حصل كان كل غايتي نكون أصحاب نتكلم نلعب نتجنن نحب بعض مش نظلم مش نأذي نغلط عادي نتخاصم وماله بس نصلح!! مش عارفة . المهم عاوزة أقولك على مصيبة جديدة أنا اتعرفت على موقع تاني جديد بس ده أنيل ده نطلع بالكاميرة بوشنا عادي ونغني آه البرنامج معمول فيه ستنك بيضبط الصوت فبيكون حلو أوي
ملاحظة: شكرا جدا لوجودكم في حياتي على الأقل الفترة دي يا مجانين وكمان أتمنى متتضايقوش مني لو طالت كلماتي بس والله كنت موجوعة وروحي كانت بتصرخ من جوه وأنتم شاركتوني وجوعي ده أنا حاليا أحس بفضل الله ألف حمد وشكر له أولا وأخيرا ولغاية ما أقابله. بصراحة اترددت أمسح الكلام والوجع اللي فوق ولا أسيبه ذكرى لي ولعله لأولادي ومن ثم أحفادي كمغامراتي .. شكرا.
20/4/2023
رد المستشار
على الرحب والسعة يا صديقتي أو بنيتي :-)
تعليقات الأعضاء