|
| 
|
من وسواس لاكتئاب لقلق معمم م42
استفسار
في يوم 28 مارس 2022 روحت عملت رنين مغناطيسي بالصبغة على الأذن الداخلية في مركز تكنو سكان الزقازيق القومية، أنا دخلت الجهاز بدون حاجة يعطوها لي في الأذن مثل قطنة أو سدادة أو سماعة تقلل صوت الجهاز المزعج، من أسبوع بالصدفة لقيت فيديو لواحد حذارِ حذاري تدخلوا جهاز الرنين بدون حاجة تقلل الصوت لأنه ربما يدمر السمع ويسيب الطنين، من يومها والقلق ماسكني جدا لدرجة كلمت مركز تكنو سكان قالوا عادي يا فندم مفيش أي ضرر إنك تدخل بدون حاجة في الأذن، والقلق هيموتني مش عارف أطمن!
وكل ما أسأل أحد يقول لي أنا دخلت الجهاز وكان فيه سماعة في الأذن لدرجة قلت لهم مركز تكنو سكان ليه الإهمال ده ليه تستخفوا بالناس!! وأنا دماغي هتموتني من التفكير. بس اللي متذكره كويس علشان أكون دقيق أنا فاكر إن الفني أعطاني قطنتين أحطهم في وداني في كل أذن واحدة!! لكن المتأكد منه لما خرجت من الغرفة مش لقيت القطن في وداني!! فالوسواس اشتغل معي! هل أنا حطيتها وأنا داخل ولا لا!! طيب لو نسيت هل الجهاز ده غلط إني أدخله بدون أي حاجة في الأذن ولا لا!! طيب ممكن أكون حطيتها وأنا خارج من الجهاز الفني شالها وأنا مش أخذت بالي!! أقسم بالله 24 ساعة تفكير تفكير تفكير تفكير تفكير تعبت أقسم بالله، مش قادر أسيطر على القلق والتفكير
الجهاز ده فعلا غلط على الأذن بدون حماية ولا لا أرجوكم!! لدرجة كمان من الوسواس عمال أقول طيب القطنة راحت فين أنا نسيتها ولا عملتها ووقعت جو الجهاز وأنا نايم ولا الفني شالها وأنا خارج من غير ما آخد بالي!! وهكذا بقالي 6 أيام ده شغلي الشاغل!! ما بين الجهاز ضرني في حاجة .. ولا لا!! مكدبشي عليكم من الوسواس وعارف إنها حاجة لا يتقبلها عقل!! بقول الجهاز امتص القطنة ولا دخلت وداني واستقرت على الطبلة خصوصا إن الطبلة أنا كشفت عند دكاترة أنف وأذن قالوا الطبلة عليها زي حاجة بيضاء كده قالوا شبيه الوحمة مفيش منها ضرر.
ساعات الوسواس اللا منطقي يقول لي ممكن تكون القطنة واستقرت على الطبلة كلام غير منطقي بس حبيت أقول التفكير شغال معي إزاي للأسف!! حقيقي تعبت والله!! هو أنا مش المفروض أكون خفيت من الوسواس يا دكتور! ولا ده قلق ولا إيه بالظبط!! تفكير لا يتوقف بقالي خمسة أيام وأقول يمكن الجهاز ده الذي سبب لي الطنين!!!!!! وإن إزاي مركز يكون مهمل مع المرضى كده ويدخلونني بدون حاجة للأذن تحميها من الصوت!! هو فيه ناس يا دكتور عملت رنين مغناطيسي بالصبغة على الأذن ومش حطت حاجهة في ودانها وعادي جدا!! وسلامي لدكتور وائل طبيبي العزيز مش بس كده والله والدي العزيز
وطمني على حالتي يا دكتور أنا المفروض أكون من أحسن لأحسن عن زمان بس أنا شايف العكس
ولا أنا غلط مش فاهم حاجة والله!!!
18/10/2023
رد المستشار
الابن الفاضل "أحمد" أهلا وسهلا بك على مجانين وشكرا على ثقتك، ومتابعتك خدمة الاستشارات بالموقع.
وعليكم السلام ورحمة الله وبركاته، بل اطمئن يا ولدي فالموقف الذي حصل معك هو موقف قاسٍ بالنسبة لك وتفاعلا مع طبيعتك الوسواسية القلقة كان لابد من حدوث ما وصفته من خوف شديد وانشغال ممتدٍّ باحتمال أن تكون تعرضت لأذى صحي بشكل أو بآخر.
الواضح أنك استلمت القطن ووضعته في أذنيك قبل الدخول في فوهة جهاز الرنين ولم تنزعه إلا بعد انتهاء الإجراء وخروجك من الجهاز، لماذا أنا واثق? ببساطة لأن من يدخل الجهاز دون حماية لأذنيه من الصوت مفرط الإزعاج غالبا سيصرخ ويطلب الخروج ووقف التعذيب!! وهذا لم يحدث معك!! وأما قطعتا القطن وأين ذهبتا؟؟ فأغلب الظن أنك قمت بنزعهما بنفسك وإلقائهما في سلة المهملات، لكنك كنت خلال الإجراء عموما تمر بحالة انفصال جزئي لجأ إليها جهازك العصبي بسبب شدة مخاوفك قبل الفحص.
المهم يا "أحمد" بك هو أنه لا داعي إطلاقا لتخوفك حاليا فلو كنت تعرضت لأذى لشعرت به، وأما حكاية التقصير من المركز المشهور (بافتراض أنه حدث)، فلا عزاء للمصريين وانتبه لجنسيتك قبل الشكوى يا عزيزي.
ومرة أخرى أهلا وسهلا بك دائما على موقع مجانين فتابعنا بالتطورات.
ويتبع>>>>>>: من وسواس لاكتئاب لقلق معمم م44
تعليقات الأعضاء