وسواس النجاسة: طفلي ورضيعي وانتشار النجاسة! م1

وسواس النجاسة: طفلي ورضيعي وانتشار النجاسة! م
انتقال النجاسة وانتشارها مع وجود الأطفال
 
عندي مشكلة انتشار النجاسة خصوصا من أطفال فمثلا ابني الرضيع عندما أغسل له على الحوض بيتطاير الماء أنا حريصة ولكن مهما حرصت يتطاير بالتأكيد فهو ماء وأحس دايما بالضيق وأنه نجس وبحاول آخد بالقول أن يعفى عن يسير النجاسة للأم وبأخد بيه ومش بغير هدومي بس بتضايق بعدها وأما بسال ستات مش موسوسين بيقولوا كلام متناقض زي لو اللي جه عليكي متأكدة أنه مايه مش نضيفة غيري هدومك وأنا متأكدة إن مفيش واحدة فيهم غيرت هدومها قبل كده وهي بتغسل لابنها أنا شوفت كتير وقليل عمري ما شوفت واحدة غيرت هدومها عشان غسلت لابنها إلا لو عمل عليها بول طبعا دي حاجة تانية والبعض الآخر يقول البسي مريلة طب ما المريلة هتتنجس والنجاسة هتنتقل غالبا هم مش مدركين أنا بتكلم عن إيه هم خايفين هدومهم تتبل مش أكتر
 
وأما بلبسه الحفاض من غير تشطيف يعني فيه بول وبغيرله سريعا وهو نايم مثلا أو مش هقدر أغسله بخاف جدااا من كل لمسه وبخاف طرف الحفاض يدخل شوية واضطر أطلعه فيلمس النجاسة ويطلع بس دي حاجة مش بإيدي أعمل إيه طيب، وبفكر أيام زمان أيام النبي كانوا بيعملوا إيه والمياه كانت شحيحة جدا ومفيش حمامات كانوا بيهتموا بالأطفال إزاي وكانوا بيعملوا إيه مش فاهمة ولو جت نجاسة في إيديها بتغسلها إزاي بسرعه قبل ما تنتقل ومفيش حنفيات ما علينا المهم لو أنا بغير لابني وحسيت إن إيدي لمسته من ورا كده وكان رطب شوية طب أعمل إيه ما أنا مينفعش أسيبه عريان وأجري أغسل إيدي لازم أكمل لبسه وساعات بيبكي جامد عاوز يرضع مقدرش أسيبه برضو فهل يعفى عن يسير النجاسة دي أنا عارفة أن يعفى عنها بس مش قادرة أطبق ده
 
الحاجة المهمة بقى وهي ابني الكبير في المدرسة وعلمته يقضي حاجته وهو واقف طبعا خوفا من نجاسة الحمام في المدرسة المشكلة أنه مش بيعرف يغسل لنفسه أو بمعنى أصح أنا أخاف يغسل لنفسه يبهدل نفسه مايه ويوسخ نفسه زيادة فبقوله يمسح بالمنديل من بعيد كده من غير ما إيده تلمس المكان ويرمي المنديل ويلبس بطريقة معينة عشان لو فيه بقايا ميبهدلش نفسه بس أما بيرجع ببقى تعبانة ومتضايقة جدا وبغسله وأغيرله هدومه كلها أغسلها وأشطفة كنت الأول بتمادى في التشطيف وأختي قالتلي كده غلطت ونصحتني أني أغسل مكان العضو ويمين ويسار الفخد وبس وأن مستحيل النجاسة تنتشر أكتر من كده، وقالتلي أغيرله الملابس الداخلية بس أنا مش بقدر ولازم أغسل البنطلون كمان وأكيد أنا مش هعرف النجاسة اتنقلت ولا لأ للبنطلون عشان لونه أسود ومستحيل يبان فيه بس أكيد جه فيه وبقايا البول انتقلت من الملابس الداخلية للبنطلون خصوصا أنه بيضع إيده ويحك العضو في بعض الأوقات فطبيعي تنتقل ولا كدة بنضحك على نفسنا يعني
 
والزبالة بقى مشكلتي الكبرى أنا حاطة زبالة مخصوص للحفاضات وبحسها نجسة جدا جدا أي حتة فيها مش عارفة ليه بس بتضايق منها وأنا حاطة جنبها الزبالة الكبيرة للبيت والمطبخ لو لمستها بس بتجنن لو حاجة وقعت من هنا لهنا وكانت في الزبالة الكبيرة ولمست زبالة البامبرز بتجنن حرفيا وبقى لم الزبالة تقيل ومع كل حركة وأنا بلمها بغسل إيدي أنا بقول لنفسي كتير أنتي بتعملي إيه بس مش بلاقي إجابة وبستمر، ومشكلتي الأبدية هي العلاقة والمذي وأطفالي لو صحيوا في نص العلاقة ولازم الصغير يرضع والكبير عاوزني جنبه ألمسه أو أرقد جنبه طيب أعمل إيه والستات بتعمل إيه أكيد مش أنا لوحدي يعني اللي في الوضع ده قولولي أعمل إيه أنا منعت العلاقة خالص مع زوجي بسبب الخوف من النجاسة ومن كل حاجة
 
طيب حاجة كمان ابني الكبير عمل على نفسه وهو نايم فكنت بغسله طبعا فبحس بتطاير مايه أكيييد فيه مايه هتتطاير أعمل فيها إيه وهل نجسة ولا طاهرة وهل أسيب الولد عريان يعني واقف أنا أستحمى مثلا وأغير هدومي طيب الستات بيعملوا إيه عشان إما بسأل بيزايدوا على كلامي عشان يطلعوا نضاف وحلوين واللي متأكدة منه إن مفيش واحدة فيهم بتعمل كده بس أنا مش عارفة أعمل كد
 
أنا طولت عليكم بس آخر سؤال ومؤرقني جدا جدا وهو من فترة مش متذكرة جه على كفر المرتبة بول ولا قيئ مع العلم أنا بأخد بطهارة القيئ المهم الكلام ده من ٣ سنوات تقريبا ومكنش فيه وسواس عندي فأخذت الكفر وحطيته في الغسالة الفوق أوتوماتك يعني أوتوماتيكية ولكن تحميل علوي ولكن كفر المرتبة فيه جزء مشمع فبيلف حوالين بعضه في الغسالة فبحس أنه مش بيتغسل كويس أو أن المايه موصلتش لكل الكفر المهم وقتها كان عادي وأما طلعت الكفر كان متخزن فيه مايه كتير أوي وقعت على الأرض وأنا بنشره فحاليا حاسه بنجاسة كل حاجة، والمشكلة الكبري في إحساسي إن طرف الغسالة من فوووووق خالص المكان ده بيطرطش عليه مايه أثناء الغسل فلو فيه حاجة فيها نجسة هتطرطش نجاسة في الحته دي في الغسالة نجسة
 
 طيب أنا أعرف أن يكفي في تطهير البول سكب المايه عليه ويبقي طاهر المايه المتبقية يعني ده معناه أن مجرد ما المايه نزلت على الهدوم المتنجسة بالبول خلاص طهرتها والمايه والملابس طاهرين حتى لو الهدوم متعصرتش
 29/11/2023