وسواس قهري في الدين والعلاقة!

الوسواس القهري في الدين والعلاقات
 
عايزة أعرف دا وسواس ولا مجرد تفكير زايد، وأنا صغيرة عندي ١٠ و١١ سنة كدا كنت بسمع صوت بيسب ربنا أكنه مني بس مش أنا ولا حباه وكان بيوترني وبيخوفني ومبعرفش أنام، والموضوع دا قعد يتكرر فترة كام أسبوع مثلا واختفى لوحده بس كان بيخوفني وبحس أني مش كويسة ومبحبش ربنا ومبيكونش قصدي بس بسمعه أكن نفسي بتقول كدا مش أنا ومكنتش بعرف أتخلص منه.
 
 بعدها من فترة وأنا عندي ٢١ سنة كدا كنت مرتبطة بشخص بدأت أتخيل أني بخونه مع أي حد فعليا صاحبه أخوه أي حد معدي بشوفه وصور ذهنية وحشة أنا مببقاش عايزة أشوفها لكن بتيجي على بالي وبقعد أفكر فيها وبتوتر جدا وإيدي بتعرق وبتخنق مبيكونش بإيدي أفكر كدا حاجة غصب عني ومكنتش عارفة أتخلص منها وبحاول أتفرج على مسلسل وأعمل أي حاجة تخليني مفكرش مبعرفش وكان الموضوع بياخد ساعات طويلة كل يوم من حياتي وقعد معايا سنة ونص كنت حاسة أني إنسانة وحشة قوي وقولت للشخص اللي مرتبطة بيه حسسني إني وحشة قوي واستغل الموضوع ضدي وكنت بقعد أعتذر له وكل شوية يفكرني بيه ويسألني لسه بفكر ولا لأ معرفش دا طبيعي ولا هو كدا مكنش بيحبني أنه يفهم إن دي مشكلة مش بإيدي وكان بيخليني أحكي له بشوف إيه وكان الموضوع دا بيوترني أكتر
 
 بعدها لما قريت عن الموضوع شكيت أنه وسواس قهري ولما افتكرت موضوع وأنا صغيرة شكيت أكتر
 فعايزة أعرف هو كدا فعلا وكان وسواس قهري وهل اختفائه دا معناه أنه هيرجع تاني في صورة تانية؟؟
 
 أنا مهتمة بالنظافة لكن معنديش وسواس فيها
 ولا كنت بعمل أفعال قهرية بسبب أفكاري هي كانت أفكار بتوترني وبتخوفني ومبعرفش أوقفها
 25/12/2023