|
| 
|
وسواس قهري في الدين والعلاقة! م
مشاكل في علاقتي مع خطيبي
أنا مخطوبة لزميلي في الكلية، كنا بنحب بعض ٤ سنين، أول سنة كانت كويسة جدا وكان بيكلمني بحب ومابيزعلنيش ودايما بيصالحني ومابهونش عليه ودايما عايز نخرج ونتكلم ونتقابل، الموضوع اتطور بسرعة وحصل تجاوزات بعد ضغط منه كتير، بطلنا وكان فيه خلافات بيننا آخر سنة ورغم كدا جه اتقدم واتخطبنا بقالنا شهرين لكن فيه خلافات برضو
هو عايزني ألبس بطريقة معينة عشان عارف دماغ الرجالة، مش عايزني أحتك بزمايلنا مع أني بسيب له مساحته عادي ومابغيرش ولا بعمل زيه أسلوبه معايا وحش وكله شتايم وممكن يمد إيده يعني مدها مرتين تلاتة لكن بطل لكن بيقولي بحاول أبطل شتايم ورغم كدا لسه بيشتمني وألفاظ وحشة جدا وممكن يتف في وشي
بيكلمني بطريقة مش كويسة وعصبية لو عملت حاجة مش على مزاجه واتكلمت قدام حد وهو مش عايزني أتكلم، كل حاجة هو بيعملها بيقولي إن أنا اللي بعملها زي أني بقلب الترابيزة وأني أنانية فعليا دي صفاته هو، وطبعا لو اتعصب علي وشتمني بيقولي أنتي السبب اللي عصبتيني هو ممكن يكون مكمل عشان اللي حصل بيننا مش عايز يحس أنه باعني معرفش، لكن هو مش قابل تصرفاتي ولا لبسي ولا حياتي كلها، في المشاكل بيغلط أهلي وبيغلط فيهم عادي معايا ولو جبت سيرة أهله بيعمل حوار ويزعل ويشتمني
عايزني أخرج أستأذنه ويبقى بمواعيد، ماروحش في حته غير لما يوافق عليها، عايزني ألبس على مزاجه وكل لما أحتشم عايز أكتر رغم إن لبسي اتغير فعلا عن زمان، بعدني عن صحابي حتى البنات كل شوية كان يقولي لأ ماتخرجيش الوقت متأخر ولو زعلنا سوا يقولي مفيش خروج لغاية لما صحابي كمان خدوا جمب مني مبقاش ليا حد، عايز واحدة غيري فعليا وبيحاول يخليني هي.
أنا بعتذر لو غلطانة عادي وبسامح وبفوت هو مبيعتذرش غير بصعوبة ومفيش حاجة بيفوتها ولا بيسامح ولا بينسى دايما عايز يرد للي أذاه اللي عمله حتى في علاقاته مع صحابه، هو بيصلي وبقى ملتزم مؤخرا زيادة، أنا خايفة أسيبه يفضحني رغم أنه قالي أنا مش كدا ولو مش عايزة تكملي خلاص
رغم كدا لما بقوله مش هكمل بيهددني أنه مش هيسكت ولا هيسيبني أبقى لحد غيره فأنا شاكة إن الغيرة والانتقام هيسيطروا عليه لو سبته وهينتقم مني خصوصا أسلوبه معايا في الخناق بيقولي أنتي فاكرة نفسك مين وأنتي مش عارفة أنا إيه وأنا هذلك وهوريكي
معرفش ممكن يحصل إيه لو قررت أبعد ومعرفش فيه أمل في علاقتنا ولا لأ، هو فاكر إن كل اللي بيعمله دا حفاظ وخوف علي وحب لكن أنا شايفاه سيطرة وتحكم وامتلاك، أنا بحبه ومش عايزة أبقى مع حد تاني حاسة أني هخدعه بسبب اللي حصل هي تجاوزات مش علاقة لكن كبيرة طبعا، أنا توبت واستغفرت وإن شاء الله ربنا يغفر لي، بس مش هعرف أخبي وأعترف لو ارتبطت بشخص تاني، الموضوع صعب ومخلي الانفصال صعب
أنا كنت فاكرة فترة الخطوبة هتكون بداية جديدة لكن احنا في نفس الخلافات على شغلي لو كلمت فلان على لبسي والمشاكل هي هي وأسلوبه مبيتحسنش ولا بيكبر لحد من أهله ولا أهلي وأهلنا كمان وصلهم المشاكل اللي بيننا وهما خايفين علي من عصبيته وأسلوبه ومستغربين أني بكمل معاه حاسيين أنه هيحبسني وأنه ممكن يضربني بعد الجواز بسبب أي خلاف بيهددني بالانفصال في أي خناقة سواء قبل الخطوبة وبعدها وأنا كنت بخاف يسيبني وبعتذر له وبصالحه، أنا معرفش حياتي هتوصل لإيه بس أنا راضية بقضاء ربنا بس نفسي أوصل للصح يارب لو الانفصال هو الحل نقدر ننفصل
هل القرار لازم يبقى مني ولا ربنا ممكن يسبب الأسباب ويخلينا نبعد من عنده؟ هل ربنا عايزنا نكمل أنا صليت استخارة كتير ورغم كدا خلافات وبنكمل لكن بنكمل لما أنا باجي على نفسي وبتنازل، هل أنا المفروض ماتنازلش أنا مش قادرة آخد الخطوة، نفسي ربنا يحلها من عنده ولو في خير نكمل، حتى فستان الخطوبة اتخانق معايا عليه ووصل لأهلنا ومكنش عايز يخليني أطلع للناس
يعني فعليا في نكد من أول يوم أنا فكرته جاي عايزني وشاريني وهيقبلني زي ما أنا لكن برضو هو عايز يغيرني وأنا حياتي مش كدا
أعمل إيه؟!!!
28/12/2023
رد المستشار
شكراً على متابعتك.
رسالتك لا تختلف عن سابقتها ويبدو أن المنفذ الوحيد لك للتعبير عن مشاعرك تجاه خطيبك هو الكتابة إلى الموقع. لو كانت هناك فعلاً رواية حب ومودة لتحدثت مع من تحبين وتقدمين الشكوى له بدلاً من تقديم الشكوى لطرف آخر. كتابتك للموقع تعكس حقيقة واحدة وهي فشل هذا العلاقة التي لا تتميز إلا بصفة واحدة وهي علاقة قسرية لا خير فيها.
هذه العلاقة فشلت سابقاً وهذه هي الفرصة الثانية لترميمها، ولكن يبدو أن الأمل في نجاحها وتطويرها لا وجود له. يبدو كذلك تعرضك للابتزاز منه بصورة وبأخرى، وهذه إحدى صفات العلاقة القسرية.
في نهاية الأمر القرار الأول والأخير لك. إما تخرجي من هذه العلاقة الآن أو تدخلي فيها كي يتضاعف الفشل وتتعرضين للإهانة.
هداك الله.
تعليقات الأعضاء