الفقر الحقيقي

رد المستشار

يا ليت كان الفقر بتاع الفلوس هو حقيقة المشكلة، كانت هانت قوي، لكن المشكلة في فقر المشاعر وفقر الحب وفقر الأفكار، وفقر الحالة النفسية، أنا مش بقول إن مشكلة الفلوس مشكلة تافهة، بس أنواع الفقر إلي كلمتك عنها بتخلي مشكلة الفلوس تأخذ أكبر كتير من حجمها، وكمان مش بقول أن ظروفك حلوة وعادية، بس مهم أقولك حاجات تخليكي تفكري وتشوفي أحسن:
* محدش اختار أبوه وأمه، ومحدش بيختار القدر لأنه بتاع ربنا، لكن إحنا بتختار نتصرف أزاي مع إلي بيحصل في حياتنا، يمكن كنت صغيرة وكل همك إنك تتجوزي وتخلصي ويكون ليك بيت لوحدك، بس تقدري تقولي أنك مكنتيش عارفة أنه فقير؟، مكنتيش عارفة وعاملة حسابك إنك هتحتاجي لأخواتك وتمدي أيدك ليهم؟، مكنتيش عارفة أن أبوك وأمك مش هيتغيروا؟، يبقى أنت أخترتي أنك تتجوزيه وأنتي عارفة أن كل ده هيحصل يبقى زعلانة من أيه بالظبط؟.

* الصح دلوقتي أنك تبطلي تقولي لنفسك أن أنا مش محظوظة وأني ضحية العيشة دي؛ لأن فيه غيرك كتير عايشين حياة أسوأ وأولهم أختك إلي كانت في نفس ظروفك بس فكرت أنها تحسن ظروفها فاختارت تتجوز واحد على الأقل ما تبقاش معاه محتاجة تمد أيدها لحد، والله أعلم هو كويس ولا أيه، أنا بس أقصد أقولك أننا مهم إننا نغير طريقة تفكيرنا ونفكر عشان نقدر نحل مشاكلنا بجد وده مش سهل بس ممكن قوي لو ركزنا.

* جوزك أتجوزك عشان بيحبك والدليل أنه عارف أن أبوكي بخيل، وأن أمك مش مركزة معاكي يعني مش عاوز حاجة من وراكي، ولو هو فقير وأتجوزك عشان طلباتك مش هتبقى كتير فهو بردو عنده حق يفكر فيكي، لكن ما ينفعشي بعد ما تتجوزيه تحسسيه أنه فقير وعاجز يصرف عليكو وكمان فيه فرق بينه وبين خطيب أختك طب هيعمل أيه غير أنه يكره يقعد في البيت ويكره عيشته ونفسه؟؟.

* تاني.. هنفكر نعمل أيه؟.... مهم قوي إنك تبطلي تقولي لنفسك كل شوية أنك ضحية، عشان دي مش الحقيقة، وتبتدي تقولي لنفسك أنك لازم تكوني أقوى وتكوني موجودة مش مجرد حد عاوز إلي حواليه يفضلوا يحللوله مشاكله طول الوقت لأن ده هيزهقهم ويحسسهم بالاستغلال أو بكسلك وإنك شكاية وبس، طب أيه ممكن تعمليه؟، ممكن تشوفي حاجات أنتي شاطرة فيها وبتعمليها حلو وتبتدي تفكري هتشتغلي عليها إزاي؟، أو تتعلميها على أصولها عشان تبقي شاطرة فيها عشان تعتمدي على نفسك وتشيلي مع جوزك المسئولية عشان تكونوا أسعد، هل ممكن تدي دروس للعيال إلي حواليك؟، هل ممكن تساعدي الموظفات إلي حواليكي بحاجة تعمليها بدالهم وتأخذي مقابل عليها؟، هل ممكن تودي ولادك حضانة جنبك وتشوفي شغل في مدرسة بالحصة؟، حاجات كتير ممكن تعمليها من غير ما تقولي أيه الأرف ده، الشغل بيخلي الإنسان مبسوط أنه معتمد على نفسه حتى لو تعبان، بيخليكي تخرجي وتشوفي الدنيا ويبقى ليكي ناس بتتكلمي معاهم بدل الفراغ إلي هيخليكي تخشي في سكك غلط أو يجيبلك المرض والملل والخنقة.

أنا مش عارفة ولادك التوأم سنهم كام، بس لو هتساعدي اللي حواليكي هتلاقي اللي يساعدك من غير ما تكوني هم علي قلبه، المهم تفكري ممكن أزاي تعملي حاجة تفيدك وتفيد عيلتك الصغيرة، عشان تعتمدي على نفسك وعشان ترجعي العلاقة بينك وبين جوزك بشكل أفضل لأنه تعبان اكتر منك، كل ما تفكري بشكل إيجابي ومن غير ما تقولي كل حاجة ما تنفعش كل ما تعملي حاجة بجد وتكوني أسعد،... يلا مستنية أخبار عنك أحسن ماشي؟

المستشار: أ. أميرة بدران