حكاوي القهاوي (94)

حكاوي القهاوي (93)
(427)
محدش يقرب من دقني

بعد سيطرة السلفيين والإخوان على مقاعد مجلس الشعب أعتقد إنْ أول قانون لهم في المجلس هيكون السماح بإطلاق اللحية وتقصير البنطلون في الجيش. وعلشان كده أنصح المجلس العسكري أنه يحط مادة في وثيقة المبادئ الدستورية بتقول "إلاّ الدقن والبنطلون". طبعاً العيال بتوع الفيس بوك بكره يعملوا لنا صورة للمشير بالدقن وبنطلونه متقصر، الصورة هتبقى فوتوجينيك خالص.

(428)
غرفة عمليات

بعد اكتساح التيار الإسلامي للمرحلة الأولى من انتخابات مجلس الشعب أعتقد إن المجلس العسكري هيعمل غرفتين عمليات لإنقاذ البلد منهم في المرحلة التانية والتالتة، غرفة هتكون في المركز الطبي العالمي والثانية في طرة.

(429)
صديقي السلفي

* قابلت صديقي وحبيبي السلفي وقلت له بقرف "إزيك يا سلفي".
- قالي بقرف أشد إزيك يا ابن الليبرالي، إيه الحقد اللي إتوا فيه ده؛ الشعب عايزها بدقن إنت إيه اللي مزعلك؟!!
* قلت له عايزينها سودا ونسكت لكم، طب إزاي؟!!
- قال كله بالقانون أشمعنى إحنا كنّا ساكتين على مبارك وأنتم سكتم على بطرس غالي وقوانينه. دلوقت برضه القانون يمشي على رقاب الكل وإن كنشي عاجبك اخبط دماغك في أقرب حيط.
* قلت له ياعم ارحم عايزين تعملوا الدنيا على مقاسكم بس، طب وغيركم يعمل إيه مش حقه برضه يعيش.
- رد وقال يا حبيبي ده حكم الأغلبية؛ مش كده برضه؟ ليه بترفضوه لما بقى مش على مزاجكم، فتوى من الأزهر وأغلبية في المجلس وينعمل قانون، ولازم تسمع الكلام أنت واللي زيك، وبالعند بقى هنعمل لكم جمعية تأمر فيكم وتنهي لأجل ما تقرفكم في عيشتكم، ليك شوق في حاجة تاني يا معلم، مش هي دي الديمقراطية، وهو ده حكم الأغلبية، أنتم والنصارى بقيتم أقلية ولازم تسمعوا م النهارده الكلام.
* أنا قلت يا عدرا، يا ماري جرجس، يا حسين، يارب أشوف فيكم لاجل خاطر النبي يوم.

(430)
سياحة دينية

أظرف حاجة إن السلفيين بيقولوا إنهم هيلغوا السياحة بتاعة البيكيني ويعملوا سياحة دينية. رد عليهم إبراهيم عيسى وقال هو فيه سياحة دينية في مصر؟!! مفيش غير سياحة المولد وأنتوا كارهين الأوليا والمقامات.

أنا قعدت أفكر هم قالوا كده ليه يكون اللي قال التصريح ده كان شارب من زمزم وافتكر إن الكعبة بقت في الحسين. عموماً علشان أنا بحبهم وعايز مصلحتهم أقترح عليهم يبنوا الجسر اللي بيوصل مصر بالسعودية؛ وبكده يعملوا سياحة دينية طول السنة واللي عايز يروح يدفع رسوم ألفين جنية في المرة، ومفيش مانع يعملوا "عرض" العمرة بألفين والعشر عمرات بنص السعر. كمان ممكن يعملوا سياحة دينية من نوع تاني مثلاً يخلوا الناس تطلع من القاهرة ويرموا شرم الشيخ بالطوب ويرجعوا تاني. وممكن برضه يعملوا خيام للمبيت في شرم الشيخ ودي هتكون بهدف التأمل وأخذ العبرة. أظن أنا عملت اللي عليّ وباشوف لهم حلول تخرجهم من ورطة التصريحات العبيطة بتاعتهم.

(431)
كماشة

بدأت تتعالى أصوات السلفيين في وسائل الإعلام لتعلن عن رغبتهم وأمنياتهم الخالصة في أن يتركوا إلى الأزهر فقط مهمة التشريع والإفتاء بشرط أن يكون ذلك بعد تحرير الأزهر من سيطرة الدولة وبعد أن يكون شيخ الأزهر بالانتخاب وليس بالتعيين. السؤال الذي طرحته على نفسي، لماذا الآن هذا الترحيب والحفاوة بجعل الإفتاء مهمة الأزهر فقط؟

وكانت الإجابة؛ أن هذا الحديث للسلفيين لم يظهر إلاّ بعدما حصلوا على نسبة جيدة من مقاعد مجلس الشعب. ما يلعبه السلفيون الآن أنهم يحلمون بتطهير الأزهر من غير السلفيين، ثم يقومون بتسخير أموالهم التي يجلبونها من الخارج بدعم مرشح سلفي بعينه ليكون هو شيخ الأزهر. بعد أن يكون لهم سلطة إصدار الفتاوى من الأزهر بواسطة شيخ الأزهر السلفي، سيطالب السلفيون في البرلمان بناء على هذه الفتاوى بإصدار القوانين المجسدة لها.

فمثلاً إذا ما أصدر شيخ الأزهر السلفي فتوى بعدم جواز خروج المرأة من بيتها وهي غير محجبة؛ فإنه تبعاً لهذه الفتوى سيطالب مجلس الشعب بإستصدار قانون يجرم سير غير المحجبة في الشارع، وأن من تفعل سيوقع عليها عقوبة. هذا ما يحلم به السلفيون؛ يحلمون باختصار بامتلاك سلطة الإفتاء ومعها سلطة إصدار القوانين الداعمة لأفكارهم. لهذا أنصح بأن يكون الانتخاب في الأزهر لمجمع كبار العلماء والذي يختار منه رئيس الجمهورية شيخ الأزهر بالتعيين؛ شريطة أن يوافق على هذا الاختيار مجلس الشعب. قد يكون في هذا الإجراء حماية لهذه المؤسسة الدينية من أن نجدها يوما وقد تم تلويثها والسيطرة عليها من قبل هؤلاء المرضى الذين يسمون أنفسهم سلفيون.

(432)
أسهم الإخوان

عندما تم التضييق على الإخوان المسلمين في ممارسة العمل السياسي في فترة حكم المخلوع، قام الإخوان بالتحرك للسيطرة على النقابات في وقت لم يكن العمل النقابي موضع اهتمام أحد سوى بعض المستفيدين بشكل شخصي من هذه المواقع النقابية. فدخل الإخوان العمل النقابي ليقدموا خدمات للأعضاء بأيدي تبدو نظيفة، فحصد الإخوان أصوات أعضاء النقابات.

كان أيضاً العمل الخدمي للإخوان على مستوى الأحياء من تقديم مساعدات عينية أو خدمية مثل إقامة مستوصفات علاجية وما شابة هو السبيل على الحصول على تأييد المواطنين في دوائرهم. لقد كان إذن العمل الخدمي بأيدي نظيفة أو حتى شبه نظيفة هو الطريق الملكي الذي سلكه الإخوان للسيطرة على سلطة التشريع والرقابة الممثلة في مجلس الشعب. وقد أتى هذا بثماره في انتخابات 2005 وأتي أيضاً بثماره في إنتخابات مجلس الشعب بعد الثورة.

إن أفضل نموذج واقعي يجسد حلم الإخوان المسلمين هو حكومة حماس التي نجحت على أشلاء لصوص فتح فقدمت عمل خدمي بأيدي تبدو نظيفة. إن أزمة الإخوان ستأتي لاحقاً بعد سيطرتهم على المجلس، ذلك لأن مهارات العمل الخدمي على مستوى الأحياء والنقابات بعيدة كل البعد عن العمل الوزاري، كما يختلف عن مهارات العمل التشريعي والرقابي لمجلس الشعب. لهذا أعتقد أن بقاء الإخوان سيكون على المحك بعد دخولهم البرلمان فإما أن تصعد أسهمهم أو ينهاروا إنهياراً شديداً لدى بورصة الشعب.

(433)
هيجل

عم الشيخ هيجل وده راجل من السلف وفيلسوف قديم قال لنا حكمة. قال إن التاريخ بيتكلم وبيجادل. صحيح الجدل عندنا مكروه، بس الحقيقة الجدل عند الراجل ده حلو وطعمه لذيذ خالص. عم هيجل قال محدش يقدر يوقف حركة التاريخ؛ يعني التاريخ يعمل أطروحة وبعدين يتحرك فيعمل نقيض الأطروحة الأولى وبعدها يتحرك فيعمل لنا جماع الأطروحة اللي بتجمع خصائص الأطروحتين مع بعض وهكذا. طب الكلام ده معناه إيه؟

معناه إن التاريخ يعمل لنا النهارده مثلاً موضة الميكرو جيب فيحصل الجدل والتاريخ يتحرك ويجي لنا النقيض، وبقدرة قادر يبقى الفستان واصل لكعب الست، وبعدين التاريخ يفضل يتحرك وما يقفش ونلاقيه عمل موضة تجمع بين الموضتين اللي كانوا قبله؛ يعني تلاقي الفستان ماكس بس له فتحة من الجنب ممكن منها نشوف ونستمتع. وهكذا يفضل التاريخ يتحرك والفستان يتحرك معه صعوداً وهبوطاً وربنا يدينا الصحة والعافية علشان نقدر نتابع حركة التاريخ. اللي بيحصل النهارده في العالم الإسلامي زي الفستان بالظبط. في تونس زين الدين بن علي ومن قبله بورقيبة خلو الموضة بيكيني، ودلوقت الغنوشي عايز يخلي الموضة خمار. إن شاء الله ربنا يسهل وبعد كام سنه تبقى الموضة بنطلون واسع شوية يعني يغطي ومن غير غباوة.

أنا كل اللي نفسي فيه إن الناس ما تنزعجش من حركة التاريخ؛ لأن محدش هيقدر يوقف التاريخ. أصل سيادتك لما توقف التاريخ تبقى عامل زي اللي رافع وشادد فرامل اليد، في الوقت اللي فيه ضغط شديد ومستمر على دواسة البنزين؛ وبالتالي الموتور واخد أعلى سرعة رغم إن العربية شكلها واقف على الأرض. لو حصل بقى وسيادتك نزّلت فرامل اليد مرة واحدة؛ هتلاقي العربية بتطير وأكيد ح تعمل حادثة وتخبط في حد تموته ويمكن أنت اللي تموت ونستريح.

هو ده بالظبط اللي عمله حكامنا الأفاضل والنتيجة إن الدنيا فجأة طفحت لنا دقون في كل مكان. أخوانا السلفيين لأنهم زي حكامنا لهم نفس الغباوة؛ وبيغلطوا نفس الغلطة، وبكره فجأة هتلاقي الدنيا بقت دم، ورقبة أي واحد بدقن راح تطير في ميدان عام، والستات هتمشي لابسه من غير هدوم. ربنا يديني طولة العمر وأشوف فيه الستات في اليوم ده، أصل أنا واثق إن اليوم ده جاي جاي وعم هيجل ما بيكدبش.

(434)
فقط في مصر

أن يدخل المستشار محمود الخضيري وهو من هو، وبعد ثورة 25 يناير، انتخابات الإعادة مع واحد من فلول الحزب الوطني الذي أفسد الحياة السياسية، ويحدث هذا في الإسكندرية التي دفع أبناؤها الكثير إما شهيداً أو مصابا!!!

أن تخسر جميلة إسماعيل الانتخابات وهي من هي، ماكينة نضال وكفاح لسنوات طويلة ضد مبارك وضد نظامه الفاشي!!!!
أن يخسر جورج إسحق الإنتخابات لأنه مسيحي وهو من هو، رجلاً تجري في عروقه وطنية وحباً لمصر يفوق كثيريين غيره من المسلمين!!!!!

أن يرشح ناخبون رزقهم مرهون بالنشاط السياحي، مرشحون سلفيون وهم من هم، الذين يحرمون العمل في السياحة!!!!!!
أن يكون البرادعي واحد من أفضل مائة مفكر في العالم، ونقذفه نحن بالحجارة حتى أدميناه!!!!!!!
أن تبخل الدولة على علاج مصابي الثورة بينما وصلت تكلفة علاج المخلوع بمايزيد على خمسة ملايين جنيه في الشهر الواحد!!!!!!!!

لما يحصل كل ده يبقى أنت أكيد.... أكيد في مصر
6/12/2011
                                                    ويتبع >>>>>>>>: حكاوي القهاوي (95) 
واقرأ أيضاً:
الثورة مستمرة!!! هنا لندن / وصايا العسكر فوق الدستورية، والحسابات الخاطئة / ماذا فعل عصام شرف بالثورة المصرية / الإخوان المسلمون بين الثابت والمتغير / حكاوي القهاوي