حكاوي القهاوي (113)

حكاوي القهاوي (112)
(526)
 عجبي!!
 
أظرف مرشحي الرئاسة هو اللي يؤيد واحد غيره، طب دخلت الانتخابات ليه؟!! هي دي التجربة المصرية حاجة كده مالهاش زي. أنا واثق إن صاحبنا دخل الانتخابات علشان نفسه يغيظ عمرو موسى بس واضح إن هو اللي هيتغاظ في الآخر.
 
(527)
حمدين
 
المرشحون للرئاسة أربع مجموعات، المجموعة الأولى فيها ناس ينطبق عليهم كلام سمير غانم في مسرحية المتزوجون "أموت وأعرف مين اللي زقني في البلاعة". أما المجموعة التانية فهي فلول وندعوا الله أن يفتت أصوات مؤيديهم. أما المجموعة الثالثة فهي لجماعة التيار الديني اللي بيستغفلونا باسم الدين ونتمنى أن يخذلهم ربنا ويفتت أصوات مؤيديهم. باقي المجموعة الأخيرة بتاعة الناس الليبراليين الثوريين، بس هم للأسف طلعوا زي غيرهم ماعرفوش يتفقوا على واحد يرشحوه منهم والباقي يدعمه، وبكده الأصوات برضه شكلها هتتفتت واللي هيكسب في الآخر يا فلول أو متأسلم.
 
الناخبين الليبراليين قعدوا يضربوا كف على كف، إيه اللي ممكن يعملوه في غباوت حبايبهم؟ قالوا مفيش غير حل واحد إن إحنا نتفق نرشح واحد بس ومع خالص احترامنا للباقي. ولهذا قررنا نحن الناخبين الليبراليين أن نعالج مشكلة إخوانا في الله وننتخب حمدين صباحي فقط مع خالص إحترامنا لخالد علي والبسطويسي وأبو العز. يا رب نكون بكده ساعدنا في حل الخلاف ونوحد الكلمة على مرشح واحد ليبرالي يمكن يعرف يصد مع ولاد التييت.
 
(528)
يارب يتوب عليا
 
الليبرالي اللي ينتخب أبوالفتوح عمل زي اللي إتجوز رقاصة (أصلها تابت). الحقيقة إن الرقاصة اتخانقت مع مدير الكباريه فطردها منه، وحالفه ترجع وتشتري الكباريه وتطرد المدير منه.
 
(529)
حمامة محمد مرسي
 
بعد درس الحمامة اللي أعطاه محمد مرسي لمؤيديه مش أشوفه غير مدرس علوم في مدرسة ابتدائي ناظرها هو محمد بديع.
 
(530)
دعاء اليوم
 
اللهم أهلك أبو الفتوح بمرسي وأهلك موسى بشفيق علشان ينجح صباحي.
 20/5/2012 
                                ويتبع >>>>>>>>: حكاوي القهاوي (114)
واقرأ أيضاً:
القانون ليس حلاً / دليل الحاكم المسلم: لحكم شعب مؤمن / لقد وقع الإخوان في الفخ / ظاهرة "ولاد ابواسماعيل" / حكاوي القهاوي