حكاوي القهاوي (72)

 حكاوي القهاوي (71)
 (347)
 أليس فيكم رجل رشيد
 
 حركة ستة أبريل وحركة كفاية طلعوا خونة وبياخدوا تمويل وتدريب من الخارج؟!!!! حاصرتم المتظاهرين في العباسية ووضعتوهم بين كماشة من مدرعات الجيش من الناحيتين حتى لا يمكنهم حتى الهروب من الميدان، ثم أطلقتم عليهم البلطجية من الشوارع الجانبية حتى ينهوا عليهم تماماً، ثم الآن تشكروا البلطجية وتقولون عليهم الشرفاء الذين تصدوا للمخربين حتى لا يذهبوا لوزارة الدفاع. ذكرتموني بمأمور القسم الذي قتل مخبروه سائق الميكروباس المسكين الذي رفض الإهانة من المأمور، ثم خرج علينا المأمور ليقول أن الجمهور الشريف غضب من أجله وضرب السائق حتى مات. شوهتوا الصورة الجميلة التي صنعها الشعب لكم، أفقدتم الشعب الثقة فيكم وذهبت مصداقيتكم لديه، أليس فيكم رجل رشيد يرشدكم للصواب؟!!!
 
 (348)
 ابعد يا شيطان
 
 وقد أعلنت قناة بنحبك يا مبارك من مصطفى محمود أنها سنتنضم مع قناة روكسي بتاعة بنحبك يا مشير. لو قناة روكسي وافقوا يبقوا شبهوا نفسهم، إيش جاب طنطاوي لمبارك؟ ولاّ انتم شايفين حاجة تانية؟ الجماعة الإسلامية والسلفيين والإخوان المسلمين من ناحية تانية سنينضموا مع بعض، وأنهم قرروا النزول للتحرير لتطهيره من العملاء والعلمانيين اللي بياخدوا فلوس من الخارج، وبياخدوا فلوس من ممدوح إسماعيل الليبرالي ومن نجيب ساويرس النصراني. ياترى مين اللي بيحركهم وعايز يعمل فتنة وصدام بين الشعب وبعضه؟ بدل ماتسمعوا للشيطان، حطوا إيدكم في إيد بعض وإلتفوا حول المشترك زي ما قال طارق البشري.
 
 (349)
 انتهى الدرس يا غبي
 
 لو كان كل اللي يعرفوك حاولوا يفضحوك أنت واللي زيك مكنوش عرفوا. لو كانوا قالوا للناس عن علاقتك بأسيادك وإنك لسه زي ما أنت لهم مخلص أمين كانوا فشلوا. بس لأن ذكائك محدود حرقت نفسك، ولأنك واللي زيك مش فارقين مع أسيادك حرقوكم، مجرد خدام يروح وألف غيره يجي. يا رب تكون فهمت الدرس، بس تووو ليت، يمكن تفهم في الساعة خمسة وعشرين من اليوم التامن في الشهر التلتاشر.
 
 (350)
 يا حلاوة المولد
 
 مرة تسلم ع البرادعي وتقول يا سلام عليك والله ما كنت أعرف إنك جميل كدة، وبعدها بيومين تترمي في حضن الإخوان وتلعن أبو الثوار اللي في التحرير. ياعم أرسى على ملة ودين، من يوم خمسة وعشرين يناير وإحنا مش عارفين لك ملة. تكونش فاكر شايف مصر مولد وصاحبه غايب، واللي يحب النبي يقول هييييه.
 
 (351)
 الأزهر طلع علماني!!
 
 وقال شيخ السلفية في مسجد الفتح "إن اللي بيعملوا المبادئ فوق الدستورية دول العلمانيين الليبراليين"، طب مش كنت تقرأ المبادئ الأول يا مولانا وبعدين تتكلم، ولاّ أنت يهمك العنوان أكتر من المحتوى. طب إيه قولك يا أخونا في الله إن الأزهر عمل برضه مبادئ حاكمة تحت اسم "التيار الرئيسي"، يعني الأزهر طلع كده يامولانا يبقى علماني وليبرالي هو كمان؟!!
 23/7/2011
ويتبع >>>>>>>>: حكاوي القهاوي (73)
واقرأ أيضاً:
المستقبل الدستوري لصاحب السيادة / ثورة 25 يناير وعرس الاستفتاء / حكاوي القهاوي