حكاوي القهاوي (111)
(515)
عذراً بثينة
عذراً بثينة فثقافتنا لم تستوعب بعد أن تكون من بين نسائنا رئيس. عذراً بثينة إذ لم نفهمك بعد، إذ لم نفهم أن ترشحك إنما يعني أننا صرنا أمة لا فضل فيها لرجل على امرأة إلاّ بالتقوى وبحب الوطن.
(516)
حازمون
ووقف الداعي صفوت حجازي أمام باب لجنة الترشح ليعلن أن بينه وبين الترشح للرئاسة نصف المتر ولكنه لن يفعلها (يا حنين)، قال الشيخ كلامي ده للشعب مش لحد تاني (ناقص تقول مش باكلمك أنت.... يا سم). معلش يا مولاهم؛ أنا الشعب وبقول لك العب غيرها؛ كلامك ده للحد التاني، كان نفسي تكون صريح وتقول إنه للعسكر؛ وإن سيادتك بتشتري ودهم بعد ما طار حازمكم. لقد جئت داعياً وقد أمن خلفك زمرة من الداعمين فقلتم بعيون دامعة خاشعة تبنا ورجعنا وندمنا على ما فعل السفهاء منّا، حازمون على أن لا نعود. لقد قررتم أن تمسكوا العصا من منتصفها حسب فقه الأولويات بتاع سيادتك. أريد أن أعرف يا مولاهم لماذا تكونون دائما عند الحق فقط حازمون كاذبون.
(517)
عيون بهية
الواد عسكر ابن مباركة شاف منظره بقى ولا مؤاخذة مش ولا بد، قال يا واد إعمل فيها عنتر يمكن منظرك يبقى عدل. عسكر راح لديفيد فتوة الحتة وقاله ممكن لو سمحت بعد إذنك أضرب سيادتك علقة قدام عيال الحارة وآخد أنبوبة الغاز بتاعة بهية، علشان العيال تهتف بأسمي ويقولوا عني شجيع، وبهية توافق تحبني ونتجوز؟ الفتوة قال وماله بس تدفع كام؟ الواد عسكر قال أنا خدامك أنت تقول وأنا أنفذ. الفتوة قاله مش عايز حاجه منك دلوقت بس لما تتجوز بهية آجي أزوركم في البيت، الواد عسكر فرح وقال غالي والطلب رخيص. ومشي عسكر فرحان، بس الأهبل ما يعرفش إن الفتوة وافق ينضرب المرة دي مش علشان خاطر عيون عسكر ولكن علشان خاطر عيون بهية اللي زاغت في عيون الفتوة وطمع فيها أكتر وأكتر.
(518)
أبو الفتوح لأ
أبو الفتوح راح للشراقوة يعمل هناك مولد وينصب الزار، قام سأله راجل شرقاوي فاهم احلف إن توبتك توبة نصوحة، وإنك بجد تركت الإخوان. رد عليه أبو الفتوح بصراحة وقال باين عليك شرقاوي طيب؛ فيه إخواني يا بني يتوب؟! قال على رأي المثل إن تاب الإخواني....، أنا قلت أخ!! وأنا اللي كنت ناوي أنتخبك!! يعني بمجرد ما تبقى الرئيس هتقول بعدها للشعب مالهم الإخوان يا غجر؟! دول أسيادكم وتاج روسكم. ولأجل حبكة الحدوتة يستقيل سي بديع ومكتب الإرشاد وتيجي وجوه جديدة، وتقعدوا قعده عرب تتصالحوا، ويبقى الشعب أخد أحلى صابونة كاميى، ويحكمنا حزب وطني جديد. يعني أنا ممكن أفتح عيوني في يوم ألاقى مرسي هو نائب الرئيس. لأ لأ مش مصدق، معقولة عاملين مؤامرة ومرسي الإستبن بتاعك أنت مش بتاع الشاطر؟! معقولة أنا حمار للدرجة دي؟! آه.. العيب مش عليك، العيب على الليبراليين الأغبيا اللي مش عارفين يتفقوا ويختاروا منهم رئيس، سوفخس. بكره هيحكمكم واحد من اتنين يا فل أو أخ من الإخوان.
(519)
البرهان الكافي
الشيخ برهامي به بعض من صراحة الفصامي عندما يقول لك الحقيقة دون مواربة ودون مراعاة لما يجب ألاّ يقال. الشيخ برهامي رضي الله عنه فضح أكاذيب عبد المنعم أبو الفتوح علينا وادعاءاته بأنه منفتح وليبرالي وثوري وألخ...، الشيخ برهامي كشف أسرار اللقاء بينه وبين عبد المنعم أبو الفتوح لنتأكد وليتأكد الجميع أنه لا منفتح ولا يحزنون؛ فهو لا يختلف مع السلفيين إذ يؤمن أبو الفتوح بضرورة أن تنص المادة الثانية من الدستور صراحة على أن أحكام الشريعة هي المصدر الرئيسي للتشريع وليس مبادئ الشريعة، كما أن سيادته يؤمن بأن العلاقة بين المصري المسلم والمصري المسيحي ستكون كالعلاقة بين المسلمين ويهود المدينة، يعني لو عملوا غلطة ينطردوا بره، وأن سيادته قال للشيخ برهامي انتم حطوا القانون في مجلس الشعب وأنا سأنفذه.
الشيخ برهامي يملك أيضاً سذاجة الفصامي عندما يصدق ما لا يمكن تصديقه، فقد صدق الرجل أن أبو الفتوح قد قطع علاقته بالإخوان والحقيقة أنه قطع علاقته بمكتب الإرشاد فقط، وحين يفوز بالرئاسة فسوف يكيل العذاب لمكتب الإرشاد وأعضائه إن لم يختاروا الاستقالة كطوق نجاة لهم؛ ليشكل أبو الفتوح مكتباً للإرشاد على مقاسه هو فقط. الشيخ وغيره من السذج سيكتشفون أن أبو الفتوح ليس سوى ديكتاتوراً لا يختلف كثيراً عن غيره. إن الحقيقة التي يجب أن نعرفها جميعاً هي أنه فوز أي إسلامي بالرئاسة فإنما يعني أن الثورة ستستمر وستسال الكثير من الدماء، ورب ضارة نافعة حتى نكتشف كذبهم وأنهم أبعد ما يكونوا عن الإسلام، وأنهم لم يأخذوا من الإسلام شيء سوى إطالة الذقون وسيكون حسابهم عسيراً. أما إذا نجح الفلول فالثورة أيضاً مستمرة ليتم التطهير من فلول مبارك والعسكر الكاذبون. أما لو فاز واحد من الليبراليين وأشك في هذا لما حابهم الله من غباء، فهذا يعني أن طوق نجاة قد أُلقي بها لهؤلاء الإسلاميين حتى يستمر الناس في تصديق كذبهم وأنهم هم شعب الله المختار الذي سنخسر كثيراً لعدم اتباعنا لهم.
(520)
على مين؟!!
الإخوان ولاد الأبالسة لقوا الناس كشفتهم والعسكر كرههم وممكن مجلس الشعب ينحل ومحدش ينتخبهم تاني قالوا مفيش غير المليونيات، وهب نزلوا التحرير وهات يا صريخ علشان يوهموا العسكر والناس إنهم مظلومين وإنهم ضحية العسكر وبكده يحاولوا يكسبوا تعاطف الناس السذج ويضغطوا على العسكر من أول وجديد. عايزين نعمل مليونية إحنا كمان نفضح فيها الإخوان والسلفيين وكل ابن تييت بيتاجر بالدين.
(521)
الجنة تحت أقدام الأمهات
لو حازم أبو إسماعيل ميعرفش إن أمه أخدت الجنسية الأمريكية قبل ما يتوفاها الله، يبقى ده معناه حاجة واحدة بس وهي إن سيادته من أسرة مفككة؛ وإنه أمه وأخواته مقاطعينه من سنين، وإن الست والدته رحمة الله عليها ماتت غضبانة عليه، بجد حرام عليك تغضب أمك، محدش قالك إن الجنة تحت أقدام الأمهات.
(522)
سبوبة
الإخوان أخذوا 92 مليون دولار من قطر لتمويل الحملة الانتخابية بتاعة مجلس الشعب، والسلفيين أخدوا 223 مليون جنية من قطر والامارات والكويت لتمويل حملتهم الانتخابية لإنتخابات مجلس الشعب. ياترى الفلوس دي إنصرفت كلها على الدعاية الانتخابية ولاّ انصرفت برضه على الحبايب والمحاسيب؟ طيب إذا كان المبالغ دي أخدوها ولاد الأبالسة في انتخابات مجلس الشعب يبقى أبوسماعين أخد كام علشان يمول انتخاباته الرئاسية ومين الأهبل اللي إدى له المبالغ دي كلها؟ طيب أنا راضي ذمتكم لو واحد لقى كام مليون وقعوا في حجره؛ معقولة يقول لا يا جماعة أنا أمي امريكية ولاّ يقول النبي قبل الهدية وياخد القرشينات ويكفي على خبر أمه ماجور؟ طيب لو قالوا له إحلف مش يقول برضه جالك الفرج؟ وكل اللي يعمله يجيب كام مسكين يأكلهم بألف جنيه ويحط الباقي في جيبه. كمان الراجل أكيد كريم وصرف على بوسترات ومطابع وشباب مش لاقي شغل قعد يلصق البوسترات في كل حته، يعني ناس كتير بترزق على حس موضوع الرئاسة ده.
وعلشان كده طبيعي كل دول تيجي لهم صدمة عصبية للي حصل لأبو سماعين. أما أبو سماعين نفسه فكان الموضوع كله بالنسبه له نحتاية طلع منها بكام مليون ومحدش قال للي دفع إدفع هو اللي عايز يدفع، وزمان الراجل بالمبلغ ده هياخد له أربع فرد حريم فبريكة بتقفيل بلادهم ويطلع بيهم على جزر هاواي يستجم هناك الكام سنه اللي فاضلين له في الدنيا. والراجل معملش حاجه غلط أو عمل كبيرة من الكبائر، مجرد يمين وعمل الكفارة بتاعته، صحيح هو مش في ذكاء شيخ المشايخ محمد حسان اللي حلف إنه مش بياخد ولا جنيه من البرنامج اللي بيطلع في في التليفزيون ولما سألوه يا مولانا أنت بتاخد فلوس قال الشيخ يا أبني أنا حلفت على الجنيه مش الدولار. شيخ عن شيخ يفرق والخبرة بتلعب دورها برضه. عموماً حلال عليك الكام مليون وجتنا نيلة في حظنا الهباب أدي اللي خدناه من الليبرالية والليبراليين، قاعدين بنقول عشانا عليك يارب.
(523)
كلمة السر
كثير من الجماعات الدينية لا تسعى لإعمال الفكر لدى أعضائها وإنما تسعى فقط إلى التسلط على عقول أعضائها. وكل جماعة تحمل كلمة السر التي تتيح لها عمل ذلك دون أي عناء، فكلمة السر عند الإخوان المسلمون هي الطاعة والولاء. وكلمة السر عند السلفيين إتباع السلف والالتزام بالنص، وكلمة السر عند الصوفية هي من يعترض ينطرد. ما يحدث في الجماعات الإسلامية لا يختلف كثيراً عما يحدث في أي جماعة أخرى تحكم باسم الدين سواء كانت مسيحية أو يهودية. جميعهم يسعون إلى التصلب والجمود الفكري وعدم إعمال العقل، لهذا فلا تنتظرن خيراً إن ولي عليكم واحد من هؤلاء.
(524)
نمساوي
الشيخ مظهر شاهين شيخ بس ليبرالي، وعلشان هو ليبرالي خد بعضه وطلع يخطب في النمسا رشق من غير ما يضيع وقته ويروح بلد نسوانها من عينة أم أيمن أو أم سحلول. الراجل راح بلد فيها حريم عيونها سماوي والصيف داخل والدنيا هناك قشطة بعسل أبيض رباني. الله يرحمك يا شيخ عماد دخلت الميدان ساكت وخرجت ساكت من غير ما حد يسمع لك صوت.
(525)
كلمة ونفسي أقولها لكم
عن أبوكم كلكم..... عن أبوكم كلكلم
ويتبع >>>>>>>>: حكاوي القهاوي (113)
واقرأ أيضاً:
القانون ليس حلاً / دليل الحاكم المسلم: لحكم شعب مؤمن / لقد وقع الإخوان في الفخ / ظاهرة "ولاد ابواسماعيل" / حكاوي القهاوي
تعليقات الأعضاء