حكاوي القهاوي (115)

حكاوي القهاوي (114)
 (540)
 غاويين
 
 كنّا بنقول ع العيال بتوع الأيام دي شباب سيس ومش نافعين، لابسين بنطلونات ساقطة وسايبين لا مؤاخذة تبان. طلعوا العيال أرجل منّا وأسقطوا النظام. العيال بعدها سألونا سؤال منطقي وبسيط، ليه ما عملتوش ثورة من زمان؟ ليه ضيعتوا مستقبلنا لما صرنا في وسط البشر ما نساويش ملاليم؟ معرفناش نرد وانخرسنا، نقول لهم إيه؟ هنقول لهم الحقيقة إننا مخنثين، وإن شنباتنا اللي يقف عليها الصقر عيرة وحطينها للتمويه مش أكتر؟ العيال سامحونا وقالوا خلاص تعالوا نبني بكره فيه شمس طالعة جايبة الدفا والخير لنا كلنا. عملنا نفسنا قال يعني محرجين وعندنا شوية دم، وقلنا خلاص كده عداكم العيب يا شباب وكتر الله من أمثالكم للوطن حامين. بس تقول إيه علينا وإحنا أصلنا مخنثين!! صعب علينا نعيش بشرف أحرار!! قمنا بالليل ندوّر ع اللي كان راكبنا وحلفنا يمين تلاتة ليركب ويدخل ويخرج زي ما يحب، وحطينا على اسمها إيه عداد يعد من أول وجديد، أصل بصراحة إحنا يا أولاد ولا مؤاخذة غاويين!!
 
 (541)
 المقاطعة هي الحل
 
 من زمان قلت إن العسكر عاملين صفقة مع موسى وإنْ أبو سماعين مجرد أراجوز يدخل مع موسى في مرحلة الإعادة، والناس طبيعي هتختار موسى علشان الناس قرفانة من المتأسلمين وعايزين دولة مدنية. بس الظاهر إن موسى صدق نفسه إنه ناجح من غير دعم العسكر، وشاف نفسه عليهم فقرروا يأدبوه وجابوا الفشيق فريق بدل منه، وإختفى المندوبين بتوع موسي من اللجان فجأة وراح موسى يا ولداه في خبر كان.
 
 طيب إيه حكاية مرسي وإزاي دخل في اللعبة؟ أظن إن المجلس بعد ما لقى الأراجوز أمه أمريكية، قال نختار أراجوز غيره وأتفق مع الإخوان وقال لهم رشحوا واحد من عندكم للرئاسة، الإخوان ما كدبوش خبر وحطوا الشاطر ومرسي بقى الإستبن. يعني باختصار فيه أتفاق بين العسكر والإخوان وله بنود واضحة، والإخوان قالوا زي العادة للعسكر آمين. ما هو الإخوان ماشين بمبدأ خلينا ندخل ونحط رجلينا في اللعبة، يا نوفي بالاتفاق وأمرنا لله، أو يحصل في الأمور أمور ونرجع في كلامنا؛ ودي عادتنا ومش هنشتريها. الإخوان يعني باختصار ماشين بمبدأ يا الملك مات يا الحمار مات أو يموتوا هم وربنا يريحنا منهم. هي دي الحدوتة ولذلك المقاطعة هي الحل؛ لأن اللي بيحصل مسرحية هزلية زي ما قال عمنا البرادعي اللي عمرنا ما فكرنا مرة ولو بالغلط نسمع كلامه. المقاطعة هي الحل بس شرط نعملها كلنا مع بعض. ولو حد مش عايز يقاطع يبقى أرحم يدي صوته مرسي اللي بقينا للأسف نحلم يركبنا حمار، ونبقى أول أمة في التاريخ بيركبها حمار بعد ما كان راكبها بقرة.
 
 الإخوان بيمثلوا إنهم داخلين في حوار مع القوى الثورية، وقال إيه ممكن يسيبوا التأسيسية للدستور والحقيقة إنهم هيسيبوها حسب الاتفاق مع العسكر، بس في الآخر مش هيتفقوا مع حد علشان يكون فيه مبرر إن الحمار ما ينجحش. صدقوني مرسي مش هينجح واللي هينجح هو الفشيق فريق، والإخوان ممكن يلطموا ويصرخوا شوية قال يعني غضبانين لكن في الحقيقة هم عارفين إنهم مش ناجحين وهيقبضوا التمن اللي يمكن يكون عدم حل البرلمان وممكن تشكيل الوزارة. بس وشرف أمي البرلمان هيتحل، ما هو اللي غايب عنكم أيها المتأسلمون إنكم صحيح أندال بس العسكر وشفيق أندل منكم.
 
 (542)
 انتخبوا ابن الكلب
 
 جاءتني رسالة على الموبايل من صديق يدعوني فيها لانتخاب مرسي في الإعادة دفاعاً عن دم الشهداء، فكان ردي على الرسالة هو: تاجرتم بالدين والآن تتاجرون بدم الشهداء، لعنة الله على الكاذبين، صححوا رسالتكم لتكون مرسي ابن كلب وشفيق ابن ستين كلب؛ من فضلكم انتخبوا ابن الكلب.
 
 (543)
 مرسي ذو الرأس الكريه
 
 أطلق علينا المجلس العسكري صاروخه شفيق لتدمير الثورة وسنرد عليه بإطلاق مرسي ذو الرأس الكريهة السامة التي لا تحمل إلا كل ما هو قاتل ومقزز. فلينعم العسكر باستنشاق روائحه، وهتديهم لي شفيق شفيق، هديهم لك مرسي مرسي، وأبقى قابلني لو استحملت.
 
 (544)
 قضية خلع
 
 أنا شايف إن الست اللي تخرج من بيت جوزها وتكون ناوية على الطلاق بجد يبقى ما ترجعش لجوزها تاني أبداً. وشايف إن الست اللي تخرج من بيت جوزها ومستنية إن جوزها يصالحها ويقدم تنازلات وترضيات علشان ترجع معاه، وبعدين جوزها ما يقدمش تنازل يبقى تخلعه أحسن. وشايف إن الست اللي تخرج من بيت جوزها، وتفضل قاعدة عند أبوها وجوزها سايبها لما تزهق وهي في الآخر اللي ترجع من نفسها، يبقى هترجع وهي مزلولة وراسها في الأرض ولا يمكن تفكر تطلب الطلاق تاني.
 
 أنا شايف من الآخر إن الست اللي ناوية على الطلاق بجد تسيب الحمار اللي متجوزاه حتى لو كانت هتتجوز حمار غيره وتطلق منه تاني وتشوف حمار تالت تتجوزه. الست اللي بتطلّق جوزها سهل عليها جداً تاخد قرار الطلاق تاني بسهولة جداً، أسهل مما كان في المرة الأولى. الست دي ممكن تكون أختنا أو أمنا. علشان كده أنا شايف إن أمي لو رجعت لشفيق يبقى هتعيش مزلولة وقدامها تلاتين سنة على ما تفكر تطلب الطلاق تاني. واللي مش مصدق يشوف كام سنة بين انتفاضة الحرامية وثورة يناير.
 
 أنا شايف بوضوح شديد إن مصر ممنوع عليها ترجع لشفيق والعسكر، وإنها لازم تتجوز حد تاني حتى لو كان حمار وبدقن ووشه عليه علامات الغباء كلها. لو مصر إتجوزت الحمار ده وقالها أي كلمة حتى لو كان بيكلم نفسه من غير ما يحرك شفايفه، هترميه أمي رمية الكلاب بره البيت، وتشوف حمار غيره تتجوزه. علشان كده مصر أمي لازم ماترجعش للحمار شفيق ولازم تتجوز الحمار مرسي.
 
 (545)
 لماذا مرسي
 
 الفرق الوحيد بين شفيق ومرسي إن شفيق برخصة بينما مرسي عامل زي الست اللي لابسة نقاب وفلقانة بمواعظ ودروس في الأخلاق وهي لا مؤاخذة. شباب الثورة دول بقى ولاد ناس ومالهومش في الوساخة. فلو نجح أبو رخصة وبقى هو الرئيس وشباب الثورة المتربي ده فكر يتخانق معاه، يبقى أبو رخصة أكيد هيغلب؛ لأن أبو رخصة وشه مكشوف ومعندهوش ريحة الدم. ولو بقى مرسي هو الرئيس ودخل شباب الثورة في خناقة معاه، هترسم المنقبه علينا الشرف وتقول إن بعض الظن إثم، ومش بعيد تُقيم علينا حد رمي المحصنات. طب إيه الحل؟
 
 الحل عندي إني أوقع الإتنين في بعض، وأقعد أنا أتفرج. وعلشان كده إذا قرر حد ينتخب يبقى من فضلك أنتخب المنقبة، فلو ده حصل يبقى أبو رخصة مش هينام الليل إلاّ لما يفرج عليها أمة لا إله إلاّ الله ويخلّي سيرتها على كل لسان. والمنقبة أكيد برضه هتقلع برقع الحيا وتفرج أم رخصة الوش التاني. باختصار إنتخبوا المنقبة علشان الإتنين يخلصوا على بعض.
 
 (546)
 سلم لي ع الاستقرار
 
 السادة المخنثين اللي بيحبوا الاستقرار وناويين يرموا نفسهم في حضن عمو شفيق وفاكرين إن بكره أحلى معاه، المخنثين بيحلموا وبيرهتلوا وشاربين سيجارة بني أو كاسين مرتيني زي عمو ما بيعمل. أول قرار هياخده شفشق هو سحل الإخوان والسلفيين؛ معتمداً على إن الشعب بيكرهم وهيفرح في أي مصيبة تحصل لهم. وبعد ما ينتهي من الإخوان يبدأ يلم شباب الثورة والعيال بتوع الفيس بوك زي الفراخ ويحطهم هم كمان في السجن. شفيق بلغة البلطجية ناوي يعلم ع الشعب ويخليه يحلف ما يفكر يعملها ويثور في يوم من الأيام تاني. الجيش وأمن الدولة وأقسام الشرطة جاهزين وفي انتظار الإشارة للانتقام، وحالفين ليخلّوا أتخن شنب فيك يا شعب يلبس طرحه، ويلبس بدلة رقص كمان ويرقص بلدي زي ما كانوا بيعملوا في معتقالاتهم زمان.
 
 رد الفعل إية يا ترى؟ التاريخ بيقول لما تقمع السلمي يطلع لك العنف على طول يا قمر؛ واللي عايز يفتكر نفكره، أول ما السادات قمع الشعب في انتفاضة الحرامية، ظهرت الجماعات الجهادية والتكفيرية وقتلت السادات بعدها بكام سنة . المرة دي العنف جاهز والسلاح مالي البلد، وليبيا على أتم الاستعداد لتمويلنا بكل اللي نفسنا فيه، وفي ظرف كام شهر بالكتير هيظهر جيش مصر الحر. شفيق والعسكر مش خايفين من المجتمع الدولي، طظ سلامات يا دولي، زي ما سكت في سوريا ممكن يسكت المرة دي كمان. ماشي يا حلاوة بس جيشنا مهما كان مش زي جيش سوريا، ولو طلع شوية لا مؤاخذة وعملوا زي ما عملوا في مجلس الوزرا أو العباسية، مش مضمون يطلعوا كل مرة. يعني باختصار يا بتاع الاستقرار سلم لي ع الاستقرار.
 
 (547)
 مسدجات إلى
 
 مصر: ويمكرون ويمكر الله، والله خير الماكرين.
 شباب الثورة: أنتم الأعلون في الأرض، الثورة مستمرة.
 
 البرادعي: لسه دورك موجود والثورة مستمرة وهتكون الرئيس.
 
 حمدين: خطيئتك إنك تعاليت ع البرادعي. حط إيدك في إيده، مكانكم الميدان مع شباب الثورة علشان تبقى بجد واحد مننا ويبقى للثورة قائد. البرادعي عمره ما كان طمعان في كرسي، وممكن هو اللي يوصلك للرئاسة بنفسه. خليك مرة ذكي واتحرك صح.
 خالد علي والبسطويسي وأبو العز: إتفو
 
 أبو الفتوح: باعوك السلفيين وأخدوا أوامر من أسيادهم في أمن الدولة بعدم النزول في الانتخابات، لو مش مصدق بص لنتائج الإسكندرية وانت تفهم. إزاي تطمئن لهم يا مقطف وأنت في الأصل كنت واحد منهم وعارف إنهم كلهم لا مؤاخذة.
 موسى: يا مآمنة للعسكر، يا مآمنة للمية في الغربال
 الإخوان: فاكرين هتخدوها، يا خي...
 
 السلفيين: مش هتنزلوا في الإعادة بناء على أوامر أسيادكم، متعودة، دايماً، وبكره تطلع فتواكم لشفيق وتقولوا ممنوع الخروج ع الحاكم، وتدعوا له ع المنابر، ويخرج شيخكم حيتان ابن سلول ويحلف إنه إستبشر خيراً عندما علم بدخول شفيق الإعادة، وإنه يثق في أن شفيق إذا ما رفع سماعة التليفون سيعود الأمن لمصر فوراً.
 الأحزاب الكرتونية: البطستة لونها النهاردة شفيق
 
 السيد الرئيس القادم: طظ فيك، وعلشان أنا مؤدب مش هقولك....
 المجلس العسكري: إن غد لناظره قريب.
 مجلس الشعب: اللي لابس فيكم قطونيل يبقى يسمعني صوته منك له
 
 (548)
 يا مسهل
 
 الشباب نزل دلوقت التحرير ولو وصلوا للمليون وما رجعوش بيوتهم مهما حصل، العسكري هيرجع في كلامه، وطظ في بتوع الاستقرار، وطظ في النخبة.
 28/5/2012
                                                ويتبع >>>>>>>>: حكاوي القهاوي (116)
واقرأ أيضاً:
تحليل نفسي للمناظرة الرئاسية الأولى / الثورة المضادة في الشعب نفسه / خيار العودة إلى "الميدان" وثورة المصريين الثانية / انتخبوه وعارضوه / حكاوي القهاوي