(638)
ربنا يديم المعروف
ضباط الشرطة رافضين محمد إبراهيم وزير الداخلية وبيهتفوا ضده، رغم إنه شبه كل الوزرا اللي قبل منه، ويمكن أرحم من حبيب العادلي. التغيير الوحيد الي حصل هو إنكم إنتم يا ضباط الشرطة بقيتم شبهنا، وربنا يديم المعروف.
(639)
عصابة الإخوان
اللي اقتحموا السجون كان معاهم الخرايط الهندسية للسجن بكل التفاصيل، ياترى جابوا منين الخرايط دي؟ مين خاين في الداخلية سلمها لهم؟ من حق الشعب يعرف مين اللي خان الوطن.
(640)
مصر مش هتكون تكية
مبارك عمل من مصر عزبة وحلم يورثها جمال. الإخوان بقى عايزين يعملوا من مصر تكية، كل نطع من الإخوان يدخل البلد ويدخل القصر، ياكل ويشرب ويتكي ويمد رجله وينام. إنسى يا بديع، كان غيرك أشطر، مصر مش هتكون تكية.
(641)
مش مسامحكم
المصريين اللي انقتلوا في أبو النمرس دمهم في رقبة من أفتى بقتلهم من تجار الدين. كل من أفتى بقتل إنسان بغير حق، قاتل ومجرم وحسابه عسير يوم الدين. من زمان وانتم بتنشروا فتواكم بالقتل يامجرمين. محمد الغزالي قاتل ومجرم؛ أيوه قاتل ومجرم لأنه أفتى بقتل المسلم فرج فودة. عمر عبد الرحمن قاتل ومجرم لأنه أفتى بقتل الأبرياء في مصر وخارجها. بتقتلوا كل من يخالفكم سواء في الدين أو حتى في الرأي. إقتلونا مش خايفين، إسحلونا وأرفعوا على جثثنا علامة النصر. اعرفوا وإحنا بننقتل إننا كارهنكم، رافضنكم. اعرفوا إننا كلنا المصريين يوم القيامة هنقف قدام مالك يوم الدين ومش مسامحنكم.
(642)
مصر يا وطن
لما تنزاح -إن شاء الله- الغمة، أول قرار ناخده تبعية كل مساجد مصر من أصغرها لأكبرها تكون لوزارة الأوقاف. ممنوع على أي كلب ينط ع المنبر ينبح ويلوث عقول الناس. مفيش تجارة بالدين. مفيش أحزاب على أساس ديني. مفيش خلط بين السياسة والدين. السياسة تعني تيسير أمور الناس في الدنيا، أما الدين فهو عقيدة وعبادة بين العبد وربه. لازم الكل يعرف إنْ الدين لله والوطن للجميع، لازم الكل يعرف إنْ مصر وطن لكل المصريين، فاهمين يعني إيه وطن، مصر وطن لكل المصريين.
28/6/2013
ويتبع >>>>>>>>: حكاوي القهاوي (139)
تعليقات الأعضاء