حاتنتخبٍى مين؟

 قالت البنت لأخيها: أنا ابتديت أشك في نفسي
 قال: أحسن
 قالت: أحسن إيه الله يخيبك، بأقول لك بأشك في نفسي
 قال: ما يمكن ده يخليكي تبطلي غرور ولماضة شوية
 قالت: أنا اللي لمضة، ولاّ إنت اللي عمال تفتي فى كل حاجة حتى لو ما حدش سألك
 قال: بتشكّي فى إيه؟
 قالت: بأشك إنى يا متآمرة، يا متخلفة
 قال: ....الاتنين
 قالت: أهو إنت يا سلبي، يا بتاع "الشعب يريد" "الشعب يريد"، وخلاص
 قال: هو إنت عايزة الشعب ما يُريدشي،
 قالت: يريد بس بالصناديق
 قال: اسم اسم الله، ما أنت شفتي الصناديق جابت لنا إيه
 قالت: ما هو مش كل الصناديق صناديق، الصناديق اللي جايّة دي عشرة على عشرة
 قال: إيش عرفك؟
 قالت: ما إحنا اتعلمنا بقى
 قال: اتعلمنا إيه؟
 قالت: إيش عرّفني، أهم كلهم بيقولوا إن إحنا اتعلمنا، والصناديق المرّا دي ما تخرش المية
 قال: ما تخرش المية؟ يمكن تخر حاجة تانية، المهم ننتخب عشان يبان لنا صاحب
 قالت: صاحب!! هو إحنا في زريبة محتاجين صاحب يعلفنا ويحرسنا؟
 قال: قصدي يعني حايبان لها شكل
 قالت: حايبان "لها"! مين هيّ
 قال: مصر
 قالت: مصر أم الدنيا برضه؟
 قال: لا مصر مرات أمريكا
 قالت: إخرس يا قليل الأدب، مصر عمرها ما تبقى مرات حد
 قال: طب بلاش، "مصر التي في خاطري وفي فمي"
 قالت: إنت بتتريق؟! مصر هي مصر، مهما حصل
 قال: أنا عارف إني سخيف وقليل الذوق مع واحدة رقيقة زيك
 قالت: طبعا رقيقة غصبن عنك
 قال: هو إنتو خليتو فيها رقة
 قالت: رقة عفية وقادرة على كل الخونة لما يحتاج الأمر
 قال: وحانعرف الخونة إزاي
 قالت: كل شيء انكشفن وبان، ويمكن يسجلوهم في الشهر العقاري
 قال: هم دلوقتي بيسجلوا نوع الولاء في الرقم القومي
 قالت: يا أخي بطّل، بطّل، ما الجرايد كل يوم بتطلع لنا دَسّتة خونة على ما قُسِمْ.
 قال: آه..! قولي كده، آدي عيبك إنك لسه بتقرأ جرايد
 قالت: مش أحسن منك اللي ما بتقومشي من عالنت
 قال: والله الواحد ما عاد عارف يصدق مين ويكدب مين
 قالت: وعايز تصدّق وتكدّب ليه
 قال: عشان أعرف حانتخب مين
 قالت: ودي صعبة قوي يعني؟!
 قال: طبعا صعبة، دا مستقبل بلدنا
 قالت: لا يا شيخ!!! وصوتك بقى هو اللي حايحدد مستقبل بلدنا
 قال: طبعا صوتي، إمال صوتك؟
 قالت: طبعا صوتي ونص، هو إنت مش عارف إن ستات مصر دلوقتى أوْعى من رجالتها، وهمّا اللي بيروحوا الصناديق، وهمّ اللي بيرسُّوا المزاد، وهمّ اللي بيرسموا الطريق
 قال: بقى كده؟!! يبقى ده بقى سبب اللي حصل، مش تقولي من الأول وإحنا عمالين محتارين: هيّ خِربت ليه؟ هيّا خربت كده إزاي؟
 قالـت: إخرس يا جدع إنت، هي لسّا ما خربتشي
 قال: طيب، طيب، عندك خبر حاتخرب إمتى؟
 قالت: مش حاتخرب
 قال: من بقك لباب السما، طب قولي ليه إزاي
 قالت: لما نعرف عدونا من حبيبنا، لمّا نبطل سلف، وما نبطلشي شغل
 قال: عايزانا نشتغل من غير ريّس
 قالت: هوا الريس حايشتغل نيابة عننا ولا إيه
 قال: طيب طيب، إلاّ قولي لي: إنت بقى حاتنتخبي مين
 قالت: مش حاقول لك
 اليوم السابع
 الأثنين 5-5-2014
 
واقرأ أيضاً:
البصق على كرامة البشر.. وبيت المقدس/ المسيح يصلب من جديد !/ عن الثورة والنظرية والأيديولوجيا والدين