زوجي، ابن أمه

مساء الخير

مشكلتي أن جوزي من النوع الذي يتقال عليه "ابن أمه" ومامته ممشيه الكل على مزاجها لدرجة أنها بتحفظهم يقولوا إيه وأخو جوزي مراته اتطلقت بسببها وحمايا بيترعب منها وكتير بتشتمه قدامي وميقدرش ينطق ميقدرش يخرج معايا من غير ما ياخد إذن من مامته، لو عايز يسافر معايا ممكن يكدب عليها ويقول لها أنه هيوديني عند أهلي عشان نسافر ده غير أنه لو اشترى حاجة في البيت لازم يقول لها اشترى إيه بالتفصيل وطبعا هي لما بتعرف تفضل تشتمه.

أول الجواز كان بيديني فلوس خالته مايدنيش، طلبات البيت هي اللي تشتريها وطبعا تتحكم في الكمية ولازم تبقى أقل حاجة ده غير أنها لازم تاخد مبلغ كبير، ده غير المشاكل اللي مسبباها ما بيني وبين جوزي غير الغيره مني لو لقت جوزي قعد جنبي تحاول تقومني عشان تقعد هي لو مسك إيدي تفضل تحسس على جسمه وتطلب منه يسيبني ويبات معاها وتفضل تشتم فيّ ليه وهو بيسمع كلامها كأنه أستغفر الله العظيم قرآن نازل من السما ولو قولت له كلامها غلط يبقي انا وحشه وبكرهها.

أنا من كتر المشاكل اللي تسببت بسببها تعبت والمشكلة أن الموضوع وصل كمان لبنتي اللي لسه 5 شهور من بعد ما ولدت بـ 10 أيام بقت تطلب منه أنه يخليني أنزل لها بالبنت كل يوم وأنا والدة قيصري ولو رفضت تفضل تشتم فيا وفيه وهو يفضل يتخانق معايا لدرجة أن الموضوع وصل لأنه حاول يخنقني ولما كلمت أهلي واشتكيت باباه فضل يقول له دي عايزه تمشيك على مزاجها وعايزه تطلع بره وتخليك تسبنا وبتكرهنا.

ده كان قبل ما أهلي يجوا لما أهلي جم حمايا شتم بابا وخاض في عرضي وطردنا وقال بره اطلعوا بره وجوزي واقف عادي ولا كأن فيه حاجة وفضل يقول لجوزي طلقها ولازم تطلقها جيبوا عربية وخدي حاجتك اللي خديها كل اللي قدر جوزي يعمله بس رأسه وقاله انزل مرديش لما بابا قال لي لمي هدومك نزل حمايا ساعتها لحماتي وبعد كده اتكلم جوزي معا بابا وبابا كان خلاص هيخليني أقعد اتصل حمايا بجوزي يساله هقعد ولا لا قاله هتقعد فقاله هطلع جوزي قاله لا وفي الاخر قاله اطلع بس اسكت طلع اتخانق مع بابا برده.

ومشيت مع اهلي وجوزي واقف مش قادر ينطق جوزي عشان يعرف يرجعني ساب لهم البيت فتره لحد ما وافقوا بالعافيه انه يرجعني ولما جه يرجعني انا كنت رافضه وبابا ضغط عليا ولما رجعت مافيش جديد ومفيش حاجه اتغيرت وعايشه نفس العيشه علي اسوا اللي زاد ان جوزي زمان مكنش بيقولي بيقبض كام ولا معاه كام وبيقول لمامته دلوقت ديما يدعي انه مش معاه فلوس ولو طلبت منه حاجه للبنت يقولي مش معايا مفيش فلوس وهو مخبي الفلوس وغير كده لو اهلي ادوني فلوس ياخدها من ورايا ويقولي معرفش راحت فين وعلي طول يقولي قومي اشتغلي في البيت حتي لو مفيش حاجه تتعمل ويقولي اشتغلي بلقمتك أمال أنا جيبك ليه.

المشكلة أني اتجوزته عن حب 7 سنين وصممت عليه رغم معارضة أهلي وساعدته ماديا عشان نقدر نتمم الجوازة دي حبي ليه مكنش مخليني أحب ولا أشوف حد غيره دلوقت أنا مش حاسة بحاجة ناحيته ومش حابة وجوده معايا ولا طايقه أنه يلمسني وهو من الناحية الجنسية العلاقة بتكون مرة كل فين وفين حتى المرة دي مش عايزاها ولو فكر فيها بصرخ فيه وأقول له ابعد ولو حصل مبقتش بحس بأي حاجة زي الأول.

والمشكلة أنه لما بيفكر في كده إما يحط يده في منطقة الأعضاء التناسلية يداعبها أو يفضل يعض ويقرص في بعنف لحد ما يحصل انتصاب وأوقات ما يحصلش ولو أنا اللي طلبت ممكن يوصل أنه يضربني بالقلم أنا حاليا بقيت كارهة القعدة في البيت ده وعلى طول عايزة أروح عند أهلي على الرغم من أن في أول الجواز حماتي كانت تقول له وديها تقعد عند أهلها أنا كنت برفض ونتخانق بسبب كده دلوقت أنا اللي كارهة القعدة وأحاول مع أهلي عشان يخلوني أتطلق بس بابا رافض وأنا محتارة.

أنا على طول خايفة على نفسي وعلى بنتي منه ومن أهله مامته دائما كانت تدعي على بنتي بأنها لا قدر الله تتعب أو تموت أنا مش حاسة بأمان ولا بحب ولا بسعادة لأن هنا الضحك يعتبر ممنوع وعلى فكرة طول ما أنا مع جوزي ما بهتمش بنفسي لأني كنت لما بهتم بنفسي كان يقول لي إنت عايزه إيه أنا تعبان وإنت ما بتحسيش أقول له مش عايزة حاجة يقول لي أمال عاملة كده ليه أقول له عادي لنفسي يقول لي إنت هبلة بقي ومجنونة.

أنا مش عارفه أتصرف ازاي أتطلق ولا أعمل إيه أنا أعصابي تعبت من الحياة دي أرجوكم أفيدوني بسرعة. المشكلة الأكبر أن جوزي عارف وقالها لي ولأهلي أن أهله عايزين يخربوا عليه زي ما خربوا على أخيه وفي نفس الوقت بيسمع كلمهم في كل حاجة تخرب عليه ليه مش عارفة ولا قادرة أفهم أنا آسفة على الإطالة.
25/01/2015