آن أوان الفطام يا عزيزتي – متابعة

القاتلة لذاتها..

حسبي الله ونعم الوكيل...

آن أوان الفطام يا عزيزتي

بسم الله الرحمن الرحيم، السلام عليكم ورحمة الله وبركاته؛
السيد د.وائل أبو هندي هذه المرة الثانية التي أرسل لسيادتك فيها رسالة، الأولى شككت في أمري بسببها وظننت أنني أؤلف قصةً ما، ولهذا فأنا هذه المرة لن أتكلم كالأدباء وسأرجوك للمرة الثانية أن تتفضل بتجهيل بياناتي كما طلبت منك في السابق..

كانت رسالتي السابقة لك تتحدث عن رؤيتي لنفسي وأنا أقتلها شر قتلة، وكانت بعنوان قتلت نفسي ثم انتحرت! وكنت فيها أقول إنني لن أتزوج وإنني دخلت كلية لا أبتغيها ولا أحبها ولا أريدها ولكني مرغمة على الخوض في معركة لست أهلاً لها بسبب وجودي في الحياة وحيدة نوعا، فأمي هي التي أدخلتني هذه الكلية لأنني لو بقيت وحدي فبماذا أعمل وأن شهادتي متوسطة ولا تفتح بيتا؟؟!! ولأنني لن أتزوج مهما حدث.... 

حسناً هذه هي مشكلتي الآن سيدي وأرجوك ألا تحيلني لمستشار آخر أنا على الانترنت أسألك أنت فقط الآن لعلك تسأل لماذا لا ولن (وعلى جثتي من الآخر) أتزوج أبداً؟؟؟ 
ولكن اسألني أولاً ليه أنا دخلت دبلوم تجارة رغم أني مش بحب التجارة؟ ليه أنا رغم حبي للغات وعلم النفس والأدب ما دخلتش ثانوية عامة عشان أنجح زي الناس؟
وبعدين ابقى اسألني على الجواز والكلام اللي يتعب الأعصاب ده (مش عاوزة أفقد أعصابي وأقول رأي تاني)، أنا مغصوبة على كل حاجة في حياتي لدرجة أني مش هاسمح لحد ياخدني مني، دي الحاجة الوحيدة اللي أنا من حقي أتحكم فيها..
 
بابا الله يرحمه وماما ربنا يديها الصحة غصبوني وأنا في إعدادي آخذ درس خصوصي عند مدرس يزعم أنه صاحب بابا وكان مدرس رياضيات، وكان من الأخر المدرس ده بيتحرش بينا أنا والبنات واحنا نعيط لأهالينا ونقول لهم ده حيوان، مافيش فايده إزاي البنت الغبية دي الحقيرة اللي مش عاوزة تذاكر ولا تهتم بدروسها ترفض درس عند مدرس عبقري بالذكاء ده؟!!!

وكمان وصلت بيها الوقاحة إنها تكذب وتقول عليه كده وتسلط زميلاتها على أنهم يقولوا كده عشان نبعد أولادنا عنه طب عقابا ليكي ده هايديكي دروس لغاية ثانوي كمان وإذا كان عاجبك يافاشلة، مش عاوزين يصدقوني ولا يصدقوا البنات!!!!!!!!!!!!!

وأنا محبوسة مع الراجل ده 3 سنين في نفس البيت مع نفس البنات وكل يوم نصرخ لأهالينا وما يصدقوش، ولا حتى يحاولوا يتحققوا من الموضوع، ليه؟؟ عشان احنا أطفال رعاع مش من حقنا نعترض على واحد عبقري زي ده (يا رب يتحرق في نار الهاوية مش بس جهنم!!) وبناءاً عليه فضلت أسقط سنة والتانية في الإعدادي وجبت ملحق أو دور تاني في سنه تانية إعدادي وكانت صدمة إني أصحى من نومي على صوت بابا الله يرحمه وهو جاي من المدرسة يبلغني بالنتيجة بتاعتي (انتي غبية وفاشلة) وعليه أنا ماحطيتش منطق ولا أتكلمت ووقعت في مكاني وآلام صدري لا حصر لها لدرجة أن بابا في أخر اليوم جرى بيا على مستشفى عشان يلحقني، عارف الاحساس بالشلل؟؟؟ ربنا مايكتبه عليك ولا على حد.

ده بالظبط اللي أنا حسيته وقتها اتشليت، ألم صدري كان رهيب لدرجة إني ماكنتش قادرة أتحرك ولا أحرك عقلة من مكانها ولا أتنفس ولا حتى لساني كان بيتحرك
ولغاية دلوقتي فضلت الحكاية دي ملازماني كل ما حد يزعلني صدري يوجعني قوي وماعرفش حتى أعيط، أنا عندي 25 سنة دلوقت ولما جاتلي الحالة دي كان عندي 12 سنة ولما نجحت في الدور التاني والسنة الأخيرة ليا في إعدادي كنت حالفة إني مش هادخل ثانوية عامة عشان مافضلش تحت رحمة الكلب ده مهما حصل، كان نفسي أدخل علم نفس أو آداب انجليزي، لكن هانت عليا كل حاجة بعد ماهانت نفسي وعرضي على أهلي، مافتكرش أي حاجة كانت تنفع ساعتها خلاص.
 
ونجحت بالعافية بدرجة تدخلني خدمات المدارس التجارية كمان مش تجارة، لأ دي أفظع، وفضلت أتخانق معاهم لما قالوا لي عيدي السنة وادخلي ثانوي عام وهانخلي أستاذ يسري يساعدك!!!!!!!! ربنا ياخدكوا!!!! يسري زفت تاني؟؟؟
 
وأصريت إني أدخل الخدمات دي مهما حصل عشان المحاسبة والتجارة مش تبع المدرس ده خالص، وفعلاً دخلتها وأنا كرهي للرياضة والتجارة مش بس بسبب المدرس ده، ده طبيعة فيا لأني مش بحب غير حاجتين اتنين بس ولا واحدة فيهم دخلتها أساسا، وبالتالي حكاية الدور التاني دي أتكررت معايا كتير ونجحت في أخر سنة وعديت وأخذت الدبلوم وفضلت 6 سنين في أجازة من المدارس ومن يسري، ومن التجارة، وجالي في سنة 2003 منحة لدراسة الانجليزي في معهد الدفاع ودخلتها ونجحت فيها بتفوق لدرجة أن الضباط هناك كانوا فرحانين بيا وقالوا لي لو أنا نجحت بنسبة 85 % ممكن أدخل التويفل غير أن لكنتي كانت أشبه باللغة الأم نفسها وكأني مش من مصر.

وعشت أحلى 6 شهور في حياتي كلها بس خلصوا، ومادخلتش التويفل عشان تكسير المجاديف، ماما قالت لي إني فاشلة ومش هاأعرف أكمل في الصعب ده، رغم إني عديت 12 مستوى اساسا وأحسن من كتير كانوا معايا، أنا طلعت الأولى على المجموعة بلا منافس، ودخلت المستوى المتقدم وبرضه أنا مانفعش للتويفول ماشي أنا عديتها وطنشت بمزاجي وقلت بعدين اتخانق عشان هي صحتها مش مساعداها على الخناق دلوقتي ربنا يكرمها ويخليهالي.
 
أنا بحب أهلي جدا يا دكتور بدرجة الجنون وماتتخيلش إني ناقمة عليهم، أنا بس ناقمة على تصرفاتهم اللي تغيظ وتحرق الدم وتقتل وتخلي الإنسان مش على طبيعته وممكن يخرج من أعصابه ويفقد سيطرته على نفسه وينتحر بس...... هو ده اللي أنا زعلانة منه مش أكتر لو أنت شايف في كل ده سبب واحد يخليني أحترم راجل وأعيش معاه وكمان أكمل في كلية تجارة اللي أمي دخلتني فيها بالغصب عشان اسكندرية مافيهاش جامعة مفتوحة غير تجارة وماقدرش أروح القاهرة أعمل اللي أنا عاوزاه هناك، واللي بالمناسبة بسقط في مواد كتير أساسا ومع ذلك أنا مش قادرة، عمالة أجاملها عشان مافيش حلول أخرى.
 
لو أنت شايف حل بعد ده كله أبوس إيدك ورجلك دلني عليه أنا قلت إني مش هاستسلم وإن رجالة كتير كويسين وولاد ناس، وعرفت واحد وأنا في المعهد ده وحبيته، الباشا طلع متجوز في الأخر ومراته ببساطة مش مريحاه وهو عاوز واحدة يجدد معاها نفسه ويمارس معاها القرف الفموي ده ومن غير جواز كمان، ماتسألنيش عملت فيه إيه عشان مش عاوزة أدخل السجن، عندي مواعيد تانية صحيح ماعرفهاش لسه بس عندي مواعيد تانية أكيد، من حق كل مواطن يلاقي إنسان مقزز أدامه إنه يولع فيه، عادي يعني مش مشكلة.
 
أنا مش هاحرق دمي أكتر من كده ويغمى عليا في الشارع عشان واحد حيوان زي ده زعلني وبعدين يستغلني براحته وأنا ضعيفة، ببساطة اتكيت على ألم صدري شوية واتصرفت ومش هاعترف باللي عملته، دلوقت يا دكتور وائل... أنا اتعرفت بشاب غاية في النضافة وغاية في الاحترام ويعرف عني كل صغيرة وكبيرة وبيحبني لدرجة إني لو سبته ممكن يعمل في نفسه حاجة، أنا كمان بحبه بس مش بنفس الدرجة دي، أو يمكن مش عاوزة أدخل فرحة مالهاش مكان في الواقع اللي أنا عشته.
 
وأنا لا عاوزة أخسر صداقته ولا عاوزاه يلمسني، ولا عارفة أذاكر في الهباب ده ولا عارفة أقول لماما بلاش عشان لو هي جرالها حاجة لا قدر الله إخواتي مش هايشيلوني في عنيهم وإن حصل فمش للأبد طبعاً، خصوصا مع واحدة رفضت الجواز ورفضت تنجح مع واحد عبقري فزيييع مدرس مافيش منه خمسة في الدنيا (من رحمة ربنا بالعباد)، أنا طولت عليك وأنت تعبان جاهز وعندك مشاكل كتير محتاج تدرسها وترد عليا ربنا يكون في عونك ومش هاطول عليك أكتر من كده، بس لو ماقدرتش تلاقي لي حل.... ادعيلي.
 
وبالمناسبة أنا ماكتبتش بالعربية الفصحى أهو ولا بطريقة المؤلفين والأدباء عشان ماتزعلش مني وتقولي أنك مش قادر تتورط في تحليل نفسي على النت من كلمات منمقة ريحتك أهو والله.......
والسلام عليكم ورحمة الله....
09/06/2006