مستشفى الطلبة: كابوس الطلبة

 ابتسم.... أنت في كابوس الطلبة.... آسف!! "مستشفى الطلبة".
 - مستشفى الطلبة.... كابوس الطلبة.
 (مرحباً بكم في مستشفى الطلبة بجامعة القاهرة) ربما كانت تغرك هذه العبارة لو كنت من الطلبة المترددين(زبائن) على مستشفى الطلبة، عندما تدخل وتقرأ هذه العبارة تشعر بأنك في مرتع الراحة والشفاء وتشعر بأنك في بلد فعلاً تحترم حقوق الإنسان وبلد بالفعل يعيش في القرن الواحد والعشرين، وليس في زمن البيزنطين أو الرومان.
 بداية دخولك إلى المستشفى مبشرة بالخير لكن إيه هي بقية الحكاية تعالوا نسمعها من بعد الصلاة على رسول الهداية "ص".............
 
 أولاً؛ يجب أن نفرق بين طالبين "طالب متردد على المستشفى عنده يعني مرض مزمن يعني خلينا نسميه "زبون لاجئ" ماشي الحال؟؟ ماشي الحال.
 وطالب بيجي كل ما يعياا "بعد الشر عليكوا"، يعني زبون عادي ممكن يجي مرتين ثلاثة في السنة، وطالب مرتاح ومريح، مرتاح من الهم ومريح نفسه وما بيروحش، عمووماً اللي يهمنا الصنف الأول والثاني.." الزبون اللاجئ، والزبون العادي".
 
 أولاً إذا كنت من أصحاب حق اللجوء غير السياسي (المرضي يعني) للمستشفى فأنت من أصحاب الأيام السعيدة جداً جداً جداً تدخل إلى المستشفى وأنت منتعش لأول مرة فقط وبعد كدا أيامك مع المستشفى سوداء جداً جداً جدأً، تدخل وانت فاكر إنك هتتعالج وأنت واقف وتلاقي ناس بتحترم وقتك وما تضيعوش..
 
 أولاً لازم تقف في طابور عشان تآخذ البطاقة العلاجية ولما بيجي دورك بسهولة (والصراحة دي حقيقة) عشان تأخذ البطاقة لازم تعمل كارنيه العيادة اللي إنت بتتعالج فيها! ليه؟ ما كارنيه الكلية موجود!! قال إيه عشان نأمن على الدواء اللي بيتسرق ولازم يكون معاك كارنيه السنة الجديدة ولو أنت على قد حالك (والحقيقية إن الشعب كله على قد حاله) يبقي لازم تروح للشباك الملعون شباك الشئون..(شئون الطلبة) المحترم بتاع كليتك وتقف في طابور ساعتين عشان تأخذ بس حاجة إسمها (إذن دفع) وبعد كده تروح تقف في طابور ألعن من الملعون اسمه طابور الخزنة ممكن تقف فيه يومين!!
 
 (آه والله) وكل ده وأنت نعسان وتعبان أصلاً (شفتوا إزاي وإحنا بنرتاح) عشان تدفع فلوس، كام يا عم، جنيه نص، ليه؟ رسوم قيدك في الكلية، ولو مش عاوز نقف طابور اليومين ممكن ترشي عميل الأمن اللي بيقف على الشباك مع الطلبة عشان يسترزق. تدفع ثلاثة جنيه رشوة عشان تأخذ خدمة ثمنها جنيه ونص بس، يعني تدفع قدهم مرتين، طيب وبعدين ترجع ثاني لشباك شئون الطلبة!! يتوافق لك عليها وبس الحمد لله.. إتعمل إثبات القيد بعد كده هترجع للمستشفى طبعاً (بعد ثلاثة أيام) بعد كده ترجع للطابور السهل إللي في مستشفى الطلبة في شباك العلاج المزمن طبعاً على بال ما تعمل كل ده يكون جالك 3 أو 4 أمراض زيادة وعلاوة على مرضك.
 
 بس تعطي لطبيب الصيدلية اللي بصراحة وبجد بيعامك معاملة تحسسك إنك مش من جنس البشر كأنك (.....) بس الحق يقال مش كلهم بعضهم، بس تعطي لطبيب الصيدلية كارنيه الكلية وكارنيه العيادة والبطاقة وممكن كارنيه النادي وممكن هدومك كل ده "ضمانات".
 
 بس وتأخذ البطاقة وتسجد لله سجدة شكر وتصلي ركعتين وتصوم يوم عشان أعطوك البطاقة ثم تذهب إلى العيادة المختصة بمرضك....
 إنتهى الجزء الأول من حكاية جميلة مش كدا!! هي دي الحكومة اللي عايزة تريحنا، وحسبنا الله ونعم الوكيل...
 
 
 اقرأ أيضا:
 يوميات مجانين: في مستشفى الجامعة / آه ه يا سنتي ... آه من المستشفى النفسي / جامعة القاهرة... اختراق يؤدي إلى احتراق