مجانين جننونا

أرسل أحمد الشاعر (مهندس، 28سنة، مصر) يقول:

المشكلة
الاسم: واحده بتتسلى
تاريخ النشر: 1/1/2010

دكتور الحقني، من يومين افتكرت حاجه حصلتلي من وانا صغيره، ييجي من من كام سنه كده مش فاكره المهم أنا كنت بلعب مع أصحابي في الحارة وماما ندهت علي علشان طابخة محشي كرنب اللي بحبه، طبعا أنا طلعت جري ومش فاكره اللي حصل بعد كده غير إن المحشي كان سخن وأنا عماله ألهط منه لحد ما زوري وجعني.

آه كمان في مرة ثانية برده كنت بشرب ميه ساقعه وزوري وجعني، دلوقتي أنا خايفه قوي لما افتكرت حكاية زوري دي ومش عارفه كده ممكن أدخل الجيش ولا لأ، حياتي بقت هم وغم وضلمه في ضلمه كعادة مشاكلكوا، ونفسي مسدودة عن المحشي بقالها كام ساعة.
أفيدوني أفادكم الله، حاكم اليهود عالأبواب.
1/1/2004

الإجابة

أحمد عبد الله

أمة بلا زور أم زور بلا أمة

يا بنتي، مشكلة زورك اختصار لمعاناة أمة بأكملها تربت على دفن زورها في الرمال، أم تنشغل بالغسيل عن متابعة زور بنتها، أب مشغول بلقمة العيش وشارع يلهي عن أكل المحشي ويا لها من أمة، زورك هو زور الأمة، والمحشي هو محشي الوطن، ومن تخلى عن صباع محشي يتخلى عن صباع كفته، وبينهما تضيع آمال الشباب وطموحات الوطن ومسقبل البوكيمون.

بنيتي لا أمل، لا في زورك ولا زور العرب، فلك الخيار في أن تموتي كمدا على جراح الأمة، أو أن تخوضي معركة النضال وتقتلي أمك وأبوك وكل من شارك في مأساة الشعب الوطني النضالي المتحرر، ومفيش فايده.
تحياتي

أميرة بدران

المهلبية

عارفه البنتجان المشوي، لو نزلتي ترعه ووسطيها لقيت مغارة وجواها لقيت تنين قاعد بيشوي بتنجان، تفتكري هايتشوي قبل ما مية الترعة تنشف، ولا التنين ييأس ويقفل الأنبوبة اللي في زوره، هكذا أنت يا ابنتي، زورك مثل زور التنين، زورك ليس أول ولا آخر زور يتوجع، وأوعي تفتكري إني ببسط الموضوع لا والنعمة الشريفة، لكن الحياة مليئة بالوجع والآلام والجروح والقرف والكآبة ووجع القلب والسواد اللي يعمي العين، وواجبك أنك ماتاخديش بالك خااااالص من كل ده وتبصي على نور الشمعة اللي في آخر النفق المسدود، فهل تتعظين؟ هأو
وألخص مشكلتك في نقاط يمكن تفهمي يا غبية:
* أبدا لا تجعلي اللعب في الحارة يعطلك عن أكل المحشي
* ربنا خلق الزور لوظيفة فاغتنميها
* أوعي تسمعي كلام ماما، بس ماتزعليهاش برده
وأخيرا يا بنتيتي، أحيلك لل100 رابط دول يمكن يهدوا حيلك وتبطلي تسألي
بلا بلا بلا بلا........

قاسم كسروان

الزور والمحشي علاقة لا تنفصم

الكون لله والوطن للجميع والسلام حول جموع الوطن، وكما علاقة الزور بالمحشي تسير علاقتنا نحن البشر توافق وتضامن رغم آلام الزور وأوجاع البطن، تسير قدما للأمام رغم نيران الحموضة، ووجع الزور ليس نهاية العالم، وتستمر الحياة وتستمر وتتوغل وتنتشر.

بنيتي، كبري مخك، الحياة بنبي بنبي بنبي، وخشي الجيش ولا تخافي.... بكره ييجي النصر على إيديكي وتحرري أرضنا من كل كارهي محشي الكرنب

هالة مصطفى

زور تاني، فلقتوا دماغنا

للمرة الألف نقول أنه لا علاقة للمحشي بالزور وأن أكل المحشي بالطريقة المعتادة لا يؤثر على اللوز، لكن فيه ناس غاوية لهط وأكل ورمرمة، فاللي هتاكل صباعين محشي في المرة الواحدة هي بس اللي هايجيلها المرض البطال، ولو عاوزه تتأكدي روحي اقفي في الحوض ومدي صباعك في زورك لحد ما ترجعي اللي في بطنك، لو رجعت يبقى كله تمام التمام وممكن تخشي الجيش بأمن وأمان.
 
ونصيحة أخيرة، طول ما ندي ضهرنا للترعة هايفضل الراجل مش بس بكلمته، وبدل البصمة تكون إمضاء

نعمت عوض الله

دلع بنات آخر زمن

أدي آخرة دلع أبله ظاظا فيك، شفتي، لا حصلت لوز سيلين ديون ولا كرش الست كرنبه، ماتعلمتيش حاجه من انجيلينا جولي ومارلين مونورو وماري منيب ولا حتى الكونت بتاع مونت خريستو.

أدي زورك راح في شربة ميه، تقدري تقولي لي هاتخشي الجيش ازاي؟ 
بنات مش لاقيه حد يلمها، هاتي ودنك اقرصهالك، بس هه
كخ، اوعي تعملي كده تاني، يا وحشة

وائل أبو هندي

محشي إيه وزور إيه يا آنسة

عذرا للتأخير يا بنتي، مانتي عارفه المستشارين.
آنسة واحدة، مشكلتك مثل مشكلة كل البنات، تشرب ميه ساقعه وبعدين تيجي تشتكي لنا وتوجع دماغنا بمشاكل زورها، وأنا أقعد ألف على مستشار فاضي يتكرم ويحل مشكلة زورك، ناس تأكل محشي واحنا نلم وراهم، عموما يا آنسة واحدة، ليس لدينا إحصائيات أكيده في علاقة المحشي بوجع الزور وإن كان عندك إحصائية انجديني بها، لكن في الطب النفسهمبولجي نجد أن الزور ثنائي القطب المعوج من آخر اليمين يتواءم مع أعراض الفصام الذهاني المتحد مع أوصال المرفق الأصغر في قناة استاكيوس الهضمية، ومن أعراضك اللي طبعا مش واضحة ومش كاملة ومش باينة ومش هاقدر أشخصها ومش هادي استشاره ببلاش ، نقول أنك محتاجة تكشفي وبسرعة قبل ما تتجنني وتجننينا معاكي، روحي يا بنتي شوفي لك دكتور.

ملحوظة، العربي بتاعك نساني العربي، يخرب عقلك، يا آنسة يا متعلمة يا بتاعة المدارس المحشي الهمزة فيه تنحط على نبرة مش فوق الألف يا ناصحه، كتكوا القرف مليتوا البلد، هانقول ايه مانتي من مصر أم الدنيا عاللي فيها

__________________________________________________
تعبت خلاص، أكمل الباقي المرة الجاية،

ألا صحيح، في علاج لحالتي ولا أروح اسأل دكتور؟
30/12/2007

* ويضيف الدكتور وائل أبو هندي أهلا وسهلا بك يا مهندسنا المسافر... بصراحة أضحكتني من قلبي وجديد علي أن أعرف أن لديك هذه الملكة... وبصراحة ذكرتني برسالة المقشة... وأحييك بشدة يا أحمد يا شاعر لأنك تجيد التقمص حقا... بارك الله فيك وطبعا هناك علاج لحالتك إذا كانت مرضا نفسيا ولا أظنها كذلك...... دمت سالما لمجانين.
           ويتبع ...: مجانين جننونا مشاركة
واقرأ أيضاً:
أحتاج من يقرأ بشدةٍ.. مشاركات