قصاقيص مجانين44

قصاقيص مجانين43
 أرسلت "lyly" مصرية، 25سنة، مسلمة، خريجة تربية لغة عربية، متزوجة، تقول:
مجرد اقتراح

السلام عليكم؛
أنا قرأت موضوع عن اختبار زوندي الإسقاطي فإيه رأيك لو تضعه ضمن الاختبارات النفسية اللي موجودة في الموقع، كمان وجدت اختبارات للوساوس القهرية وأنت يا دكتور وائل مهتم جدا بيها طيب ليه مش بتضع هذا الاختبار في الموقع؟
أنا هقلك حاجة بس متزعلش احنا نعتبر أفقر موقع في الاختبارات النفسية أنا آسفة بس هي دي الحقيقة وأنا نفسي نكون أحسن موقع على الإطلاق حتى من المواقع الأجنبية.

قرأت موضوع بتاع الزوجة اللي جوزها مثلي (رجل يحب الرجال...) (جديد الموقع) وعلقت عليه بس مش عارفة إن كان تعليقي غلط أو لا، وكنت بفكر في حل أن لو المرأة أثناء..... لبست لبس رجل لتثير زوجها المثلي صح ولا غلط حرام ولا حلال؟
بصراحة أنا شخصيا أكره أكون مكان الزوجة دي لأني أكره أتشبه بالرجال لأنه أمر سخيف ويفقد من الأنوثة لكن في مشكلتها ميعتبرش حل؟
وآسفة للإزعاج، وممكن تاخد بانادول
4/11/2012

جميل جدا هذه الطلاقة واللباقة التي تكتبين بها إلينا ليتها كانت بالعربية الفصحى يا أ. "تربية لغة عربية"! 
موضوع الاختبارات وقسم القياسات كله مسئولية المستشار أ. عبد الرحيم الريفي وقد أرسلت له من قبل ووصلت بينه وبين المهندس محمد شوقي محطم أرقام موسوعة جينيس في طول البال!... وقد أرسلت رسالتك هذه له ليرد عليها شارحا ما تم إنجازه... وربنا موجود!

شكرا لك فربما نبهتني في الوقت اللازم لضرورة تسخين الجو كل فترة من الوقت لينشط مجانين أكثر... والحقيقة أننا في موضوع القياسات سهلٌ جدا أن نكون مثل المواقع الأجنبية لكنّ حالتها سنقيسكم بمقياسهم في كل شيء ونحن نرى في ممارستنا كم أنتم مختلفون... المهم صبرك فقط ومن فضلك دعواتك.

غلط موضوع لبس الزوجة لبس رجل لتثير زوجها المثلي وبهذا أكون قلت ما أعلم ولكنها ليست فتوى يا بنت الحلال.... وإنما هناك في الأمر كلام كثير واصل حتى حدود المطاطي! فاقرائي:
كيف نعيش جنسيا؟؟ أنا وزوجي والمطاطي
كيف نعيش جنسيا؟؟ أنا وزوجي والمطاطي مشاركات
كيف نعيش جنسيا؟ أنا وزوجي والمطاطي.. مشاركة
أنا وزوجي والمطاطي مشاركة 2

* ومرة أخرى أرسلت "lyly" ..............، تقول:
ممكن ترحموني

بجد كتير أستنى من قبل العيد علشان أرسل مشكلتي وفي نفس الوقت لما كتبتها اتمسحت وموصلتش ومضطرة أستنى تاني لحد يوم الخميس واحتمال معرفش أكتبها وبعدين أنتوا بتقولوا في مشاكل كتير وانا مشفتش غير أربعة بس، بأي منطق تاخدوا المشاكل مرة في الأسبوع أنا بجد زهقت ودورت على مكان تاني ولقيت موقع طبيب بس أنا خفت مش عارفة ليه ومردتش أكتب لو أنتم واثقين ان الموقع كويس قولوا لي وأنا أرسل مشكلتي وأخلص.

أنا مبفتش بنام عايزة افضفض هتجنن وقلقانة وخايفة يوم الخميس يجي ومعرفش أرسل مشكلتي أو تتمسح تاني، ممكن تعملوا لي استثناء؟ أكيد طبعا هترفضوا
في ملحوظة أبقوا خلوا كود التحقيق سهل شوية
آسفة للإزعاج أو لو كنت تكلمت بطريقة حادة شوية
5/11/2012

غالبا والله تعالى أعلى وأعلم قمنا بمراسلة "lyly" هانم.... ووعدناها بموعد نفتح فيه استقبال المشكلات خصيصا لها!....

ولذلك أرسلت "lyly"..............، تقول:
شكراااااااااا 

بجد يادكتور شكرا لأنك فتحت باب الاستشارات قبل يوم الخميس اتمنى تكون استشارتي وصلت لأني بجد تعبت فيهم، ياريت متزعلش او متضايقش مني حضرتك قلت مفيش حاجة لو تواصلت انا عارفة اني وجعت دماغك بس معلش يمكن لما استشارتي توصل والاجابة تيجي هريحك مني شويا، جزاك الله خيرا.
5/11/2012

استلمنا الاستشارة وغيرها مما قسم وأرسلناها إلى أنشط مستشاري مجانين بلا منازع د. سداد جواد التميمي.... ثم توالت الأسئلة والتساؤلات..... فآثرنا الصمت..... حتى كان أن انطلقت متتالية طلقات القلق والتوتر والضجر واستبداد الانفعال بالإنسان:

فجاء أن أرسلت "lyly"..............، تقول:
غلاسة الانتظار

أنا بجد مش فاهمة تجاهل حضرتك لرسايلي هو حضرتك مريض مش قادر ترد عليا؟
ولا أنا كتبت بريدي الإلكتروني غلط فمعرفتش توصل لي؟
ولا فعلا حضرتك كرهتني لدرجة انك مش قادر تجاوب على مشكلتي؟
-------------

* ثم أرسلت "lyly" ..............، تقول:
حضرتك تقدر تنتظر اسبوعين او اكتر علشان حد يرد على مشكلة ليك؟ لو كنت تقدر فانت بجد صبور اما انا محتاجة اعرف الرد لو متقدرش تعملي حاجة قولي وانا هشوف اي طريقة

* ثم أرسلت "lyly" ..............، تقول:
أنت مش شايف إن دا قلة احترام لصاحب مشكلة أنك تتجاهله بالشكل دا إنت مش شايف ان دا ظلم

* ثم أرسلت تقول:
بجد حرام أنا مبقتش أنام كويس فيها إيه لو ترد على مشكلتي؟
عموما لعله خير يمكن تجاوبني غلط أو تهيني أو حد يعرف هويتي من المشكلة وتبقى مصيبة

* ثم أرسلت تقول:
قال الرسول صلى الله عليه وسلم "إن لم تستحي فافعل ما شئت واعلم أن كما تدين تدان ولو بعد حين"
أنا أقصد الجزء الأخير من الحديث حضرتك طبعا عندك حياء يعني عايزة أقول لك كما تدين تدان دا قصدي واضح؟

* ثم أرسلت تقول:
ولو حضرتك مريض فربنا يشفيك وتقوم بالسلامة

* ثم أرسلت تقول:
هو أنا أصلا رسايلي بتوصل؟
بجد مش عارفة أفضل أكتب ولا أوقف وأريحك

* وأخيرا أرسلت "lyly" ..............، تقول:
ربنا يكرمك رد عليا إن شاء الله تقولي متكتبش هنا تاني أو امسحي عضويتك متحسسنيش أني بشحت الرد
أنا بجد حاسة بالإهانة بجد دا كتير أنا مش قادرة أتحمل كدا
"وعسى أن تكرهوا شيئا وهو خيرلكم وعسى أن تحبوا شيئا وهو شر لكم"
وعذرا للإطالة ولكن أنا عندي أمل في ربنا كبير
9/11/2012

شكرا جزيلا أن رجعت إلى الحق يا "lyly".... عفا مجانين عن انفعالك..... وها قد وصل الرد وأرسلناه إلى بريدك الإليكتروني.... وغالبا عند نشر هذه القصاقيص تكون مشكلتك عرضت وحلت إن شاء الله.... واصلي مشاركاتك على مجانين..... وأنصحك بمناقشة د. سداد في ردوده ومشاركته... أهلا بك.

* وأرسلت هايدي أحمد (19 سنة، طالبة، مسلمة، مصر) تقول:
الرابط لا يعمل

السلام عليكم ورحمة الله؛
آسفة للإزعاج مرة أخرى، كنت قد أرسلت في طلب استشارة ووجدت رابطا للاستشارة في ملفي الشخصي فظننت أنه تم الرد عليها وراسلت إداره الموقع لأعرف أين العطل وكان الرد أن الموقع لم يتلق رسالتي، ولكن الرابط موجود في ملفي الشخصي بعنوان آخر منذ يومين.
عنوان رسالتي كان "وسواس قهري تقريبا" والرابط في ملفي الشخصي بعنوان "وسواس، اكتئاب، وأعراض ذهانية"، برجاء تفقد الأمر مرة أخرى، وجزاكم الله خيرا كثيراااااا.
30/11/2012

الابنة الفاضلة "haidy ahmed" أهلا وسهلا بك على مجانين وشكرا جزيلا على الثقة، يحدث ما أشرت إليه عند وضع العنوان الذي ستظهر به مشكلتك دون أن يكون رد مستشارها قد وصل لأننا في حال وصول الرد وتأخر النشر عادة ما نرسل الرد إلى بريد المستشير،...... لكن إذا وضع العنوان قبل وصول الرد، وحاول صاحب المشكلة قراءة الرد يحدث ما تشتكين منه الآن شكرا لك.... وبالمناسبة اطمئني فحالتك مرتبطة شدتها بالكرب الذي يتمثل في الامتحانات .... المهم بعد انتهاء الامتحانات أن تبحثي جادة عن العلاج المعرفي السلوكي.

واقرأ أيضًا: 
قصاقيص مجانين