حكاوي القهاوي 39
(179)
للتعديل ده لا.. ولا يعني لا
حتى لو كانت (نعم) على التعديلات الدستورية صح، يبقى (لا) لهذه التعديلات صح الصح. فحسب كلام عمنا يحيى الجمل إنه في حالة التصويت بـ (لا) للتعديلات الدستورية يبقى اللي راح يحصل هو إعلان دستوري مؤقت للبلاد لغاية لما يوضع دستور نهائي، وده يتماشى مع روح الثورة اللي بتعني إسقاط النظام ودستوره. كده بقى إن شاء الله يبقى كلنا لازم نروح ونقول (لا) علشان نبني بلدنا ودستورنا بطريقة صح الصح.
(180)
عايز حقي
أنا عمري ما رحت انتخابات ولا استفتاءات، وده طبعاً لأني سوي وطبيعي وعارف إن كله تزوير في تزوير. النهارده بقى أول مره أحس إني بني آدم محترم في البلد دي. ولهذا قررت ولأول مره في حياتي أقرر أني لازم أروح دائرة انتخابية وأنا عارف أن صوتي له معنى، رايح أقول (لا) للتعديلات الدستورية. بس الفرحة ماتمتش.. قالوا لي أنت بره.. شوف مصلحتك يا سيد. بره ليه يا أخوانا حرام عليكم؟!! قالوا لي أصلك مش موجود في مصر. بالذمة دا اسمه كلام؟!! طب فيه زي حالتي فوق الخمسة مليون مصري، ودول مش موجودين في المريخ ولا مؤاخذة، دول قاعدين في بلاد محترمة، فيها سفارات مصرية محترمة، وبيبعتوا لمصر عملة صعبة محترمة. معقولة تاخدوا فلوسنا، وعند الانتخاب تقولوا لي بره!! والله حرام.. تلاتة بالله العظيم حرام.
(181)
عايزين حد أقصى
سهل أفهم ليه في الدستور حد أدنى لعمر المرشح لمنصب رئيس الجمهورية ولكن مش فاهم ليه مفيش حد أقصى لمن يترشح لهذا المنصب. أظن لازم يكون الحد الأقصى لسن رئيس الجمهورية وقت الترشح أو إعادة ترشحه هو سبعون عاماً لا أكثر، وذلك حتى لا نكرر المأساة بأن نجد من يحكمنا زوجة الرئيس وأبناؤه وحاشيته.
(182)
ذيل الكلب
بعد وجود إشاعات بعودة عائلة مبارك للقاهرة ومحاولتها تحسين صورة أبوهم ومراته وعياله، وإن فيه صفحة على الفيس بوك لترشيح علاء مبارك لمنصب الرئاسة، بعد هذا كله لا أجد كلمات يمكن أن تقال سوى "صحيح اللي اختشوا ماتوا".
(183)
شفيق يا راجل
واضح إن عصابة مبارك متوسمة خيراً في أحمد شفيق بعد تجربته كرئيس وزراء، لهذا بدأ النظام وكلابه حملة على الفيس بوك لترشيح أحمد شفيق.. حساس الجيل لمنصب رئيس الجمهورية لأنه الأجدر للمرحلة القادمة. فهو الوحيد القادر على إخفاء بلاوي النظام البائد ووقف ملاحقة الحرامية، بدعوى الحنيّة وعفا الله عما سلف ولازم نبدأ صفحة جديدة وبرضه مبارك وعصابته دول أخواتنا كلنا. يا عم شفيق إحنا خلاص بطلنا "بانجو" وربنا تاب علينا من "البرشمة" وفوقنا وعرفنا أيدنا اليمين من الشمال، ممكن بقى بعد إذن سيادة اللي مشغل سيادتك تروح تقعد في شرم الشيخ.
(184)
أسوأ ما في الرحيل
أسوأ ما في رحيل مبارك وعصابته هو عودة هالة سرحان؛ لتخرج علينا من شاشات التليفزيون بعد ربنا ما رحمنا من طلعتها علينا، عموماً المشكلة دي حلها سهل وهو "لازم نغيّر المحطة".
ويتبع >>>>>>>>: حكاوي القهاوي (41)
واقرأ أيضاً:
كنت في التحرير.. لستُ أمّك!!/ ملفات أمن الدولة وتوثيق الذكريات/ المستقبل الدستوري لصاحب السيادة/ سيكولوجية الأمن في جمهورية الخوف (مصر ـ سابقاً)/ لا.... للإحباط/ حكاوي القهاوي
تعليقات الأعضاء