حكاوي القهاوي (52)
(238)
قناة التحرير
جاءت قناة التحرير لتنذر باقي القنوات أن انتبهوا فلم يعد هناك مكان لأنصاف القنوات. إبراهيم عيسى يستعرض عضلاته ويقول هل من مبارز؛ وإن كان يعيبه اعتماده على عضلاته أكثر من اعتماده على قوة الضيف. محمود سعد سيجذب المشاهد بخفة دمه وذكائه، وبلال يخاطب عقل المشاهد ويحترمه كثيراً، ونوارة نجم تستحوذ على القلوب قبل العقول، أما المفترية دعاء سلطان فجاءت لتقف على الساقطة واللاقطة دون رحمة. المنافسة لم تعد سهلة وستجبر مقدمي البرامج على استخراج أفضل ما لديهم وإلاّ فلا يلومن إلا أنفسهم. أسوأ ما في برنامج "في الميدان" هو الديكور المزعج وغير المريح للعين، يا ليتهم كانوا عملوه على نموذج ميدان التحرير بعماراته والمتحف وكل معالمه وقت الثورة من عربية الكشري ودورات المياه واللافتات الظريفة.
مطلوب من منى الشاذلي أن تبذل الكثير خاصة أن عيسى يبدأ قبلها بنصف ساعة، يعني ممكن اللي يبدأ معاه ما يغيّرش المحطة. جلست أشاهد إبراهيم عيسى ونقلت في الفاصل الإعلاني لأرى ما تقدمة منى فوجدتها أيضا في فاصل إعلاني وأظن ده غلط المفروض في تصوري إن المخرج يراعي عدم تطابق الفواصل الإعلانية في نفس التوقيت. أظن أيضاً إنه على برنامج العاشرة مساء إعادة النظر في الإخراج فيبدأ في التوقيت بالضبط كما يجب مراعاة اختيار الضيوف، فهذا هو ما سيفصل كثيراً في الخدمة الإعلامية المقدمة. أما يسري فودة فقد أراح واستراح وبدأ برنامجه بعد كل البرامج ما راحت تنام، يعني بقى بلا منافس.
(239)
يحيا أبو الفصاد
جاءت احتفالات عيد ميلاد مبارك مشابهة لاحتفالات عيد ميلاد الأخ طلعت مصطفى، نفس الشعار "بنحبك ياريس" بس مع طلعت كان "بنحبك يا توتو"، واضح إن المتعهد اللي عمل عيد ميلاد الريس هو هو نفس المتعهد، نفس الشعار ونفس التورتة. كمان المظاهرات في حب الرئيس المخلوع كترت الأيام دي، وبدوري فإنني سأغني وأهتف وأقول للسيد الرئيس "بحبك يا ... وأزعل قوي لو حد يقولك يا ...".
(240)
أول مرة
أول مرة يحصل في مصر إن مسئول في البلد يلغي زيارته للخارج بسبب أحداث داخلية. طول عمر المسئولين بتوعنا ولا حاجة بتهمهم تولع الدنيا، هو ماشي في طريقة ويعمل فسحته وجولته حتى لو كانت داخلية وكمان يطلع في التليفزيون وهو بيضحك قال يعني الحدث تافه وإنه غير مؤثر. أول مرة يحصل إن يبقى فيه مسئول مصري بيحس على دمه. شكرا يا عم عصام شرف ربنا يخليك وتفضل على طول محترم.
(241)
امسك حرامي
يشكك البعض في حسن نوايا الإخوان المسلمين وبيقولوا إنهم ناويين يسرقوا الثورة، زي ما عملوا الشيوعيين في الإتحاد السوفيتي زمان، الشعب هناك قام بثورته ياولداه وبعدها بكام شهر سرقوها أولاد الحرامية؛ وبقت البلاد بقدرة قادر شيوعية. ويتنبأ هؤلاء بسوء نية إنْ الشعب بعد يومين راح يكتشف إنهم دول ألعن من دوكهما وساعتها حنطالب بعودة مبارك ونظامه ولأيد شفيق راح نلحس ونبوس الجزم؛ لأجل ما يتفضل علينا ويقبل يكون هو الرئيس، ما هو مصيرنا زي أوكرانيا حيكون. طيب إيه الدليل على كده يا وحشين؟ قالوا بدأوها بتلاتين في المية وبعدها بشوية رفعوها لخمسين، وقالوا مش راح نرشح منّا رئيس، طلع بعدها أبو الفتوح وقال أنا لسه بافكر. طب ولو توحة قرر، حيقولوا هو أخد قراره من غير ما يرجع لنا، بس المسامح كريم وإحنا لازم نكون معاه حلويين؛ ونزولاً على رغبة الجماعة قررنا إن اللي عايز م الجماعة يؤيد؛ براحته يؤيده. ولاد الذين إياهم اللي للإخوان كارهين، قالوا يا ليتهم على كده ساكتين دول لضمان كسب كل أصوات الدايرة ناويين يتحالفوا مع إبليس واولاد عمه؛ ويحطوا إيدهم في أيد ولاد الإيه، ما هو بعد كامليا وعبير ووفاء قسطنطين حيبقوا هم حماة الدين. وزي ما أنا وأنت وكل الناس عارفين إن ربعنا عاقل والباقي مجانين ولهم راح يهتفوا. بكره ياصاحبي الزي الرسمي حيكون طرحة وجلابية وشبشب، أما حريمنا فلازم يكونوا أسود ف أسود. سنة وراها سنة يارجالة ونكون شربنا المقلب؛ ونشتاق ثاني للزمن الجميل، زمن كانت تسوق فيه المُزة. أكيد ده لو حصل راح ننزل ثاني ميدان التحرير، لأجل ما نهتف لمبارك وعيلته ولأي ابن كلب ثاني حقير. ادعوا معايا وقولوا يا رب يا مالك يوم الدين أنقذ بلدنا من كل اللي سرقوها ومن كل اللي ناويين يسرقوها ومن كل شر ممكن لمصر يصير.
ويتبع >>>>>>>>: حكاوي القهاوي (54)
واقرأ أيضاً:
قنا: البحث عن.. جملة مفيدة/ أهم من الاستفتاء، وأخطر من ثورة مضادة/ هنا والآن.. الثورة تكون إزاي؟؟/ حكاوي القهاوي
تعليقات الأعضاء