|
| 
|
والدي هيجنني!
السلام عليكم ورحمة الله وبركاته
مبدئيا مشكلتي ممكن تكون فيها تفاصيل كتير فأعتذر عن الإطالة مقدما وأرجو أن الاستشارة دي تكون خاصة ومش منشورة على الموقع لأن فيها تفاصيل حياتي ممكن تتعرف لو حد دخل هنا وشافها فأرجو وبشدة أن الاستشارة دي مش تتعرض أبدا أبدا
والدي مش عارفة هو بيعمل كده ليه! مرة بيحبنا أوي أوي وعايز يدينا عينيه ومرة تانية ولا نسوى عنده حاجة خالص بيضن علينا بالأكل والشرب!
من زمان أوي بيعمل كل حاجة ترضينا، بس في المقابل بيضربنا جامد أوي وبيهيننا جامد جدا قدام أي حد حتى لو ضيف وييجي مع ناس تانية يتفاخر بينا وبتفوقنا!
كان بيضرب مامتي من غير سبب ويقولها بضربك عشان الباقيين يتلموا، كل ما تنضف حاجة يتفنن إزاي يبوظها، بيحلف أيمان كتير طلاق وظهار وإيلاء من غير سبب لمجرد أنه شاف حلم أن ماما زارت جارتنا من وراه وهو مش بيحب جارتنا دي! ومقتنع جدا أنه هو الصح وأنه بيجيله حاجات من ربنا تبينله بنعمل إيه من وراه! في الأول كان يتعصب جدا جدا ويضربنا كتير واحنا اللي نروح نعتذر له، دلوقتي بقى يتعصب جامد أوي وحتى ولو هو الغلطان بيدعي على نفسه أو يمسك قلبه عشان عيان وفي الآخر برده بيصعب علينا ونجري نلحقه وننفذله كل اللي هو عايزه! فاكر إننا بنحبه يبقى ننفذ طلباته طول اليوم أكل وشرب وبس مش بنعمل حاجة تاني غير كده.. لو رحنا قعدنا جمبه يشغلنا كل واحد بحاجة يعملها جعان اطبخي أكلة كاملة، عطشان عايز حاجة لحد ما نمشي!
من أول ما نصحى من النوم لحد ما ننام خالص وهو يطلب لو مش نفذناها يبقى مش أبناء بررة بيه أو مستتقلينه ويقعد يقول كلام يوجع ويصعب علينا ونضطر نسكت! كتير بيضربني أنا وماما وبيعل حاجات أكتر وبنحلف مش هنكلمه تاني ودايما بييجي علينا إحنا الاتنين عشان إخواتى الباقيين مش بيسكتوا وممكن يزعقوا أو يسيبوه ومش يعملوله الحاجة اللي هو عاوزها وأنا وماما عارف إنه هيصعب علينا في الآخر وهنروح نعملها له! بيجي علي كتير وفي الآخر يقولي مظلمتكيش ويضيع علي حاجات كتير أوي هتزودني في مستوايا العلمي واشتركت في جامعتين وكنت متفوقة فيهم الحمد لله منعني أحضر الامتحان في الجامعة التانية مع أني بمتحن لايف لمجرد إن أخويا عايز يقعد على النت! جتلي بعثة للخارج وجامعتين عالميتين وطالبني بالقسم منعني أسافر وزعق في جامد أوي وراح لماما قالها أنا نفسي أخليها تسافر وندمت إني ضيعت البعثة عليها ولو جت تاني هبعتها! وجتلي تاني ورفض تاني!
لما باجي في شغلي حتى يقولي إنت نسيتي نفسك إنت مش بتشتغلي أصلا إنت فاكرة نفسك.. كذا *رتبة علمية كنت بتمناها ومش دخلتها عشان حلمي حاجة تانية * إنت أصلا شغلك ده ولا ليه لزمة! مع أني الحمد لله مفيش ولا حاجة باظت مني من ساعة ما بدأت شغلي وحتى وأنا طالبة كنت متفوقة ومتميزة جدا الحمد لله وكله بيلجأ لي أساعده ومستنيني أتخرج بس عشان أبقى رسمي وييجوا عندي! وييجي قام الناس يتفاخر بي إني كذا وكذا وكذا
يكركب لي الدنيا ويمنعني أعدلها.. ممنوع نروق البيت حتى في وجوده! ممنوع نغسل، الغسالة لو وقفت سنة يبقى عقاب لينا مش هيصلحها مع أنها ممكن مش تكمل جنيهات معدودة!
بيعمل كل حاجة تعصبني وتطلعني عن شعوري.. بالضبط بالضبط زي الطفل المشاغب
مش بنطلب منه حاجات خالص أصلا إلا الأكل والشرب.. وعايشين بسيط أوي وهو معاه فلوس ويحلف مش معاه ولو أصريت على حاجة محتاجاها بكام جنيه أبقى كده بضعفه قدام نفسه وبوجعه ووو.. وحاجات كتير أوي بتتقال توجعني أنا
وفجأة ألاقي أخويا خارج مع صحابه يأخد فلوس كتير وتطلع فلوس مرة واحدة كده وأروح أتفسح! طب وإحنا! وضرورياتنا! إنت بنت يبقى مش ليكي حياة تاكلي وتشربي وبس
وإحنا مش من النوع اللي بيهتم بالزينة ولا كده واللي تلبس لبس كويس بس يبهدلها ويحرجها قدام ضيوفها ذوقك وحش ده مقرف لحد ما تكره تلبس حاجة عدلة خالص!
نقول هنطلع نشتغل يزعق ويهد الدنيا.. نشتغل من وراه مش يرضى يدينا فلوس عشان نطلع اللي معانا ويخلص خالص الأول وبعدين يدينا فلوس
عايزنا دايما محتاجينه... ولو معانا فلوس خلاص براحتك عيشي!
النت بيبقى من الراوتر صبح وليل.. كل إخواتي من حقهم يقعدوا إلا أنا آخرى الساعة 10! ولو اعترضت أبقى بنت مش متربية ومفيش بنت محترمة تقعد بعد الوقت ده *حتى لو بحضر محاضراتي في جامعتي التانية بيبقى متضرر وكل شوية خلصي خلصي هقفل هقطع النت عليك* وأختي بنت برده وبتقعد عادي في أي وقت! ولو اشتريت موب موصي أخويا يجيبه من غير نت! أقوله هشتري لنفسي واحد بـــ نت لاسلكي يقولي هفصله مخصوص عشان خاطرك! وإخواتي كلهم بيقعدوا عادي وأنا الوحيدة اللي مش من حقي أقعد وكل واحد يذلني شوية عشان يديني موبه أو يسمعني كلمتين مش ليهم لزمة لو قلت مش عايزة منهم حاجة!
نتيجة ده انقطعت عن الدراسة وأجلت السنة في الجامعتين وسبت كل حاجة بتعلمها لحد ما أقدر أشتغل ويبقى لي دخل خاص.. بس من وقت للتاني بتصعب علي نفسي أوي هو حنين جدا جدا لأ قصى حد ولو حد فينا بقى برة بيبقى هيموت لحد ما يروح ويتطمن عليه وبيحبني أنا بالذات أوي عشان كنت هموت كذا مرة بس بييجي لحد الشغل في البيت أسرع حد هيعمل أنا واللي هقوله أمر وهينفذه أنا يبقى إنت كل حاجة هايفة وكبيرة لحد ما كرهت سرعتي وإتقاني للحاجة بقيت مملة ومستهترة ومش قادرة أعمل حاجة تاني ومحبطة بطريقة بشعة جدا مع إني عمري ما كنت بسمح لحاجة تعمل في كده ورغم رفضه لحاجات كتير كنت بعملها من وراه وبعد ما تحصل أوريله نتيجتها يتبسط أوي وزي ما بيقولوا *بعمل حاجات مجنونة كتير وفي الآخر بطلع صح*
بيتفنن إزاي يطلعنا عن شعورنا وعلى طول حرقة دم لماما وشتيمة وضرب قدامنا وده بيضايقنا جامد جدا وهي ساكتة عشان تعبان وكبير *مع أنه 50 سنة بس مصاحب ناس ستين وسبعين* وعايش دورهم وحاسس إنه قدهم وأنه بقى الكبير ومفيش حد يعدل عليه ولا ييقوله صح ولا غلط حتى لو هو غلط! يعمل حاجات كتير غلط ولو ماما عرفته بس إن ده حرام أو مش ينفع بيطيح فيها جامد أوي وإنت كذا وكذا وآخرك اعمليه أنا كده ومش هتغير
أعمل معاه إيه والدي ده! تعب أعصابي وصعبان علي حاجتي اللي بتضيع مني والغريب في الموضوع إني أخصائية نفسية والحمد لله مفيش ولا حالة باشرتها إلا والحمد لله بقيت تمام أوي أوي وبيجولي بالاسم وهو أغرب حالة وردت علي.. أو بمعنى أدق مش عايزة آخده حالة عشان مش عايزة أفهم اللي جواه إيه وطبعا معروف السبب... مفيش قاضي بيقدر يحكم على حد قريب وبيتنحى عن القضية أنا عايزة أتنازل عن الحالة دي لأي دوك يساعده بس هو رافض يتعالج وجواه عقد كتير أوي وحاجات كتير يقولي عليها ده بقانوني أنا وده اللي هيمشي... يجيبنا يستشيرنا في حاجة دينية لو موافقة اللي في دماغه يبقى تمام أوي غير كده يبقى الشيخ ده مش صح ومش عايز الكلام ده وهمشي اللي في دماغي برده!
أعلم في إيه بقى! أرجوكم عرفوني خطوات أنا دماغي مشتتة ومش قادرة أركز في شغلي من ضغط أعصابي ومن المواقف اللي بتحصل ومش فاضية ألحقها
02/07/2014
رد المستشار
السلام عليكم ورحمة الله
إياك وعقلك فهو رأس مالك في حياتك وعملك لا منطق في سلوك والدك فلا تحاولي فهمه وتفسيره فالمنطق يتعارض والاضطراب.تبدو ملامح اضطراب الشخصية واضحة من وصفك لسلوك والدك ولكن سيصعب عليك علاجه لأن هذا النمط لا يقر بمعاناته من مشكلة، كما أن اقتناعه بكلامك سيكون ضعيفا بحكم قرابتك له.بعض المشكلات لا يحلها سوى الزمن وهذه واحدة منها، استعيني بالصبر على اضطرابه وتجنبي الصدام معه حتى يفتح الله عليك وتنهي دراستك وتستقلي بحياتك.
واقرئي أيضا:
تعليقات الأعضاء