أريد حلا : الروابط المنفصلة

المحبة لكل الناس..!؟

أعرف من أين أبدأ ولكن في البداية عايزة أقول إن الموقع ده كويس أوي وأني استفدت من مشاكل الشباب والبنات هنا كثير بس متأخر شويه.

أنا مشكلتي مش زي معظم الرسائل اللي هنا، هي مشكلة عادية، يعنى خائفة تكون من وجهة نظركم تافهة بس هي مهمة عندي أوي؛

أولا أنا كنت بحسب نفسي أحب إنسان كان أول واحد في حياتي لما كنت في سن 15 وبعدين قعدنا مع بعض لحد 18 سنه بس في الثلاث سنين دول عرفت شخصيته الحقيقة، إنه إنسان متقلب جدا، ويحب التغيير حتى لو كان واحدة يحبها أو زي ما كان يتهيأ لي؛

المهم أنه سابني بعد لما تعلقت به جامد أوي، وربنا يشهد أني أد إيه كنت أحترمه ومكنتش بخليه يتكلم عن الحب والكلام ده، والله كنت أشجعه على المذاكرة، ودائما يطلب مني أني أقابله بس أنا كنت برفض بشدة، حتى قبل لما نفترق عمري ما قابلته بس كنت أكلمه على النت وشافني على الحقيقة بس ولا كلمني، كنت بكلمه في التليفون لمده دقيقتين كل أسبوعين أو ثلاثة، أطمئن فيها على مذاكرته، ولأنه متقلب ويخلف وعوده دخل كلية شرطة، واستهتر جامد بس خلاص مبقتش فارقه معايا؛

وبعدها بفترة تعرفت على دكتور في صيدلة وهو متدين أوي وكويس جدا بس كان يحب زميلته في الكلية لمدة 5 سنين وأخلاقه مسمحتلوش إنه يكلمها بس نظراتهم كانت كفيلة بكده، وكانوا شبه متواعدين لغاية لما هي اتخطبت وهو اتعذب كتير أوي لأنها كانت مستعدة تستناه بس هو فضل سعادتها على سعادته هو وكان بيموت والله من الألم وأنا كنت جانبه وحسيت إنه مر بنفس تجربتي مع اختلاف إنه متخدعش زيي؛

المهم أني حبيته اوووى وتعلقت بيه هو مش دريان خالص مستسلم لقضاء الله لحد لما في يوم لمحتله وهو ذكى جدا وعرف إني بحبه بطريق غير مباشر وقال لي أني أقرب واحدة ليه وأنه يعاملنى زي أخته، وللمرة الثانية بتعذب لأني بجد حبيته أوي مش زي الأولاني لأني كبرت دلوقت وظروفنا إحنا الاثنين تسمح لنا بالزواج، لكن المشكلة أنه مش بيحبنى علما بالتزامنا الشديد بالإسلام وعدم وقوعي في المعاصي إرضاء لله حتى يحتسبه لي يوم القيامة

أفيدوني أفادكم الله، فهل أستمر في حبي على عدم جدوى هذا الحب أم أتعامل معه على أنني أخته المخلصة؟؟ 
وأنتظر من يحبني لشخصي وليس لاعتبارات أخرى كالمال
وجزاكم الله الخير والعافية

20/8/2004