كتلة مشاكل متحركة : هل شخصية حدية ؟

الغلطة فين؟
 
السلام عليكم، أنا بنت ولدت وعشت في السعودية أصغر أخت لـ 8 أخوات 4 معرفش عنهم حاجة من الأب وأخت من الأم أقرب لي من نفسي، وثلاثة أشقاء، وذي نبذة عن معيشتي في السعودية بشكل مختصر يشمل التفاصيل التي أذكرها:
- خناقات بين الأم والأب كتير عمرهم ما تفاهموا وكذب كثير من الطرفين على بعض يشملها ضرب وشتائم وهكذا
- خناقات بيننا إحنا الإخوات وتسليط إخواني الصبيان علي أنا وأختي بشكل سلطة عُليا الأمر لو ما اتنفذش يبقى هنضرب
- أخويا الأكبر مني مباشرة بسنة حاول في فترة ثانوي يتحسسني ولما اشتكيت اتكَدبت، وفاكرة له موقف من فترة أولى إعدادي دخل لقاني بكلم بنت على الكومبيوتر في نص الليل كلامي معاها كان مجرب شات مفيش فيه أي حاجة بس مجرد أنه لقاني بكلم حد في نص الليل خلى ده مجال للشك ورد الفعل السريع أني ضربت بالقلم على وشي منه من غير حتى ما يتأكد أنها بنت أو لا أو حتى يسمع مني أو أي حاجة
 
موقف ثاني كنا مسافرين وضربني بالقلم في وسط الناس في الباص لمجرد أني ماسمعتش الكلام لحاجة معينة تتعمل وكان رد فعله عناد في أني لا ده أنا هضربك في وسط الناس عادي وماتتكلميش، باختصار أنا حقيقي بكرهُه
 
في الفترة دي كنت تعرفت على حد من النت وحبيته من ثانية إعدادي وفضلت بحبه لحد ثانية جامعة كان حب من طرف واحد بس بنسباله أنه ليه لا؟ وطبعا اكتشفت كذب كثير كان قايلي اسم غير اسمه وعمر غير عمره أنه أكبر مني، بس اللي اكتشفته أنه في عمري وتتابع الحوار لكده وخلصت من الموضوع كله وأنا في ثانية جامعة
 
أنا دخلت كلية مابحبهاش أجبرت نفسي أني أحب أي قسم فيها عشان أعرف أكمل لأن كان مرفوض التحويل منها وصلت لثالثة وكرهت كل حاجة، تعرفت على شاب في الجامعة بس كلية ثانية، مدمن، نسونجي، صايع، دكتور!
 
فضلت جنبه ثلاث سنين لحد ما بطل كل حاجة ورجع لحياته الطبيعية بس يوم ما رجع طلعني أنا منها ولما حب يتجوز تقدم لواحدة ثانيه وكأني مكنتش موجودة في يوم!! أنا مااتحبتش في حياتي وكل اللي حبني كان عايز جسمي حتى بعد ما خلصت جامعة واشتغلت، 
 
كل الفترة دي من عمري محدش تقدم لي خالص مع أني شكلا مش وحشة وتصرفات كويسة ومؤدبة لحد ما بطلت أبقى مؤدبة وبقيت شايفة أن البنات كلها بتتجوز وأنت مش هتتجوزي أصلا
 
- شغلي أنا خريجة بقى لي سنتين مش عارفة حقيقي ليه مش بكمل في شغل أكتر من 3 شهور وبمشي مش بزهق! ومش بترفد بس بيحصل حاجة تخليني أمشي، مرة مشكلة مع حد من إخواني فبضطر أني أسيب شغلي عشان أساعد في حلها أمشي ومرة صاحب الشركة شايف أني أنفع في محاسبة وأنا مابحبش الحسابات وأنا أصلا مقدمة عشان أشتغل في مكان ثاني ومرة عشان الليدر اللي عليّ شايفة مابشتغلش أو بشتغل غلط في حين أنها ماعلمتنيش الشغل هيمشي إزاي وكنت بسأل ومع ذلك الرد كان بيكون هجومي أكثر من أنه حل للمشكلة
 
- باختصار ثلاث مشكلات حاليا أواجههم
1- أنا أحب واحد متجوز أو بيحضر لجوازه وكتب كتابه ومش عارفة أبعد وحصل بينا تجاوزات بس مش لدرجة كبيرة وأنا حاسة أني لو حصلت فرصة في الموضوع هيتطور أكثر والمصيبة إني بسعى لده وهو بيبعد أنا شيطانة أنا عارفة بس أنا حبيته ومش قصدي أخرب حياة البنت أو حياته أنا مكنش قصدي أنا لقيت نفسي في وسط كل ده وهو نفسه مش ذنبه أنا اللي شديته وقلت له أني هقبل بأقل حاجة منه بس أفضل في حياته
2- أنا داخلة شغل جديد وخايفة ما أستمرش برده ومش عارفة لو مااستمرتش المرة دي كمان هعمل إيه وده مخليني حتى مش عارفة أستقل ماديا أو أستقل بعيد عنهم
3- أنا عيلتي مش مستقرة ماديا وكل فترة بمشكلة شكل وأنا وحد تاني بس اللي شايلين حاليا، كل ما حد فينا يشتغل التاني بيسيب وهكذا مينفعش يبقى كلنا بنشتغل في نفس الوقت لأسباب مش مفهومة وفكرنا أنه ممكن يكون حسد أو عمل بس مين هيفكر يؤذي عيلة هي أصلا مدمرة لوحدها عايزاهم يستقروا أو اديت لنفسي مهلة أن أحاول أخليهم يستقروا عشان أنا مش عايزه أكمل ومش عايزة أكمل معناها أني عايزة أموت، اللي عامل حاجز بيني ويين التنفيذ أني لو وقعت هما هيقعوا في ظهري ده السبب الوحيد اللي مخليني موجودة
 
أنا كان عندي أصحاب بس لما لقوا أني كتلة مشاكل متحركة بعدوا عني عشان كنت بشتكيلهم كتير ومحدش هيحب الشخص النكدي أو الشكاء، مش بلومهم ده حقهم
مش مرتبطة ومحدش بيتقدم ومحدش بيفكر وأنا حقيقي محتاجة حد يطبطب عليّ ومفيش
أختي اللي أقرب حد لي مسافرة وفرق التوقيت خلاها بعدت
 
أنا تائهة ومحتارة ومش فاهمة الغلطة فين في كل ده ومش قادرة أكمل حقيقي ومش عارفه أكمل لوحدي أكثر من كده
كنت بآخد سيبرالكس وبطلت من سنتين
1/11/2019