|
| 
|
حصار معرفي أو وسواس قهري أنا تعبت ! م5
وسواس
أنا بعت لحضراتكم كذا مرة قبل كده، أنا اتعالجت من الوسواس وقاطعة الأدوية الحمد لله من سنتين وكل فترة باخد جلسات علاج معرفي سلوكي وبثقف نفسي من اليوتيوب والحمد لله جالي فترة وساوس دينية وانتهت تماما من متابعة قناة اسمها هاني عرفة وفهمني حاجات كتير عن الوساوس.
ولكن يظل السلوكيات القهرية بعملها حتى الآن فى المذاكرة كل لما آجي أذاكر أقول لنفسي فيه حاجة منعاكي من المذاكرة وفيه حاجة ماسكة جسمك الكلام دا من إعدادى وأنا حاليا فى رابعة جامعة وكل لما أروح لمعالجة تقولي تجاهلي الأحاسيس دي ولكن خلاص حصل ارتباط شرطي بمجرد ما أقول مذاكرة يجيلي الإحساس الجسدي في رجلي إن حاجة ماسكها وتقل على دماغي وحاجة كمان بيظهر فى دماغي كلمة مذاكرة يعني لما بفكر فى المذاكرة الكلمة بشوفها قدامي في دماغي، أنا معرفش دي صور وسواسية ولا لا!!
ولكن فيه حاجات غريبة بتحصلي إن مثلا آجي أذاكر بردو درس معين مثلا يجيلي فكرة إن الدرس دا صعب وأتخيل نفسي بذاكره وأد إيه حاسة بصعوبة أنا بتخيل كدا بشوف نفسي وإني فى نص المذاكرة وعمالة حاسة بتقل رهيب ومش عارفة أكمل مذاكرة دى تخيلات محصلتش أنا أصلا لما بيجيلي التخيلات دى بتجنب المذاكرة خالص لأن فعلا بحس بأن التخيلات دى هتحصل لو ذاكرت وإني بحارب لو ذاكرت.
التخيلات دي مش بعرف أطردها خالص وبتبقى حرفيا لازقة في دماغي معرفش ليه وليه أصلا يطلعلي تخيلات كدا مجرد ما فكرة تيجي فى دماغي!!
تانى مشكلة مضايقني جدا جدا مشكلة الشغل حاليا أنا خلاص هتخرج وعايزة أشتغل لأن مجال شغلي كويس جدا، أي متقدمين للخطبة معترضين على الشغل والاختلاط فى الشغل أنا الحمد لله متدينة جدا جدا وأصلا مش هشتغل فى بيئة فيها اختلاط يشيلني ذنوب ولكن أنا عايزة أشتغل، هقول لحضرتك ليه أنا عايزة أشتغل أولا علشان لما بقعد فى البيت وبيبقى فيه فراغ الوساوس بترجع، ثانيا عايزة يبقى معايا فلوس دايما علشان لو رجعلي الوساوس أقدر آخد جلسات علاج نفسي لأن مفيش حد يدفعلي أنا لما باخد جلسات بدفع لنفسي لأن شغالة بتخصصي وأنا في الكلية.
ثالث مشكلة عندى إن كان نفسي أطلع معيدة فى الكلية جدا ودايما متفوقة طول حياتي ولكن الوساوس أثرت علي فى الكلية والسنة اللي خدت فيها علاج نفسي طلعت الأولى على القسم وأنا فى عين شمس يعنى فعلا كان إنجاز بالنسبة لي لأن القسم بتاعي صعب جدا ولكن لما وقفت جلسات علاج معرفي سلوكي الوساوس رجعت تاني وطبعا أثرت علي ثالثة ورابعة مطلعتش من الاوائل، المهم أنا عايزة أكمل دراسات عليا لأن عندي حب رهيب للعلم يكاد يوصل للهوس عندي رغبة أعرف كل حاجة بطريقة رهيبة تصل لحد الكمالية وبالنسبة أنا عندى كمالية بتوقفني عن حاجات كتير ودا مش كلامي دا كلام المعالجة.
المهم حاليا عايزة بعد ما أتخرج أكمل دراسات عليا والفكرة مش عايزة تخرج من دماغي أبدا إني عايزة أكمل بقول لنفسي طيب إنتى هتكملي ليه؟ الدراسات العليا عندنا فى الكلية أكاديمية بحتة معندناش دبلومات مهنية ولكن ممكن آخد شهادات مهنية دولية برا الكلية وأشتغل بها، لا عندي جمود فكري رهيب إني لازم أكمل دراسات عليا، طيب لو أنا هشتغل فى جامعة خاصة اللي حولي مش موافقين أدرس لطلبة جامعة لأن بيقوليلي الطلبة الولاد مش مؤدبين وبيقعدوا يعيبوا على المعيدات وكده إنتي بتدرسي فى بيئة مختلطة واللي قالي الكلام دا ولد قريبنا لما قولتله احنا الولاد بيحترموا المعيدات عندنا قالي أنا ولد وعارف بقولك إيه الولاد بيقعدوا يتكلموا عن المعيدات البنات وفعلا قرأت فتاوى على النت أن التدريس فى جامعة مختلطة حرام.
مش عارفة أعمل إيه جوايا صراع رهيب!! وكل لما يتقدملي حد مش عايزة أقعد معاه ولو عرفت إن حد مش عايز يشغلني برفضه أصلا، هل فعلا فكرة الدراسات العليا عندي متحولة لوسواس لأن مش كل زمايلي يعني هيكملوا دراسات عليا حتى الدكاترة عندي قالولي الدراسات العليا بتبقى يإما هتتعين فى الكلية أو كلية خاصة والكليات الخاصة حاليا بالوسايط وبعدين لو اشتغلتى فى كلية خاصة واتجوزتي هتقصري فى بيتك.
انا بجد تعبت تعبت معرفش أعمل إيه وفي حالتي دي عايزة حضرتك توضحلي إزاي ممكن الوسواس يعوقني في الزواج والخطوبة لأن معاييري متصلبة جدا وممكن في ساعة أقول أنا موافقة على العريس ساعات تانية يجيلي أفكار تقعد تقولي لا متوافقيش فيه أحسن منه حتى معاييري كمالية وعايزة واحد مفيهوش عيب، يعنى عايزة واحد مخلص كلية قمة زيي ويكون بيصلي ومتدين بس مش معقد ويكون بيشتغل شغل كويس وعايزة يبقى شكله كويس وفكره كويس جدا مستواه المادي مهم بس مش أولوية بالنسبالي أهم حاجة يبقى فى مستوانا المادي أنا مش تفكيري زي البنات المهم يكون عنده فلوس، اتقدملي ناس أغنياء ولكن معندهمش فكر ومش ناضجين موافقتش
أنا في حالتي دايما وكمية تزاحم الأفكار دي
أعمل إيه؟!!
22/4/2022
رد المستشار
الابنة الفاضلة ".......إخفاء الهوية....." أهلا وسهلا بك على مجانين وشكرا على ثقتك، واستعمالك ومتابعتك خدمة الاستشارات بالموقع.
صراحة من يقرأ قولك (أنا اتعالجت من الوسواس وقاطعة الأدوية الحمد لله من سنتين وكل فترة باخد جلسات علاج معرفي سلوكي وبثقف نفسي من اليوتيوب) ... يعجب لما يقرأ في سطور إفادتك!! فأنت لم تعالجي علاجا كاملا ولا حتى فهمت الوسواس جيدا ... ولا قادرة أن تذاكري ولا أن تستريحي.
عبارة (التخيلات ذي مش بعرف أطردها خالص وبتبقى حرفيا لازقة في دماغي معرفش ليه وليه أصلا يطلع لي تخيلات كذا مجرد ما فكرة تيجي فى دماغي!!) معناها أنك لا فهمت الوسواس ولا فهمت العلاج السلوكي المعرفي .... ببساطة لأن ألف باء الع.س.م للوسواس القهري هو أن لا تطردي الفكرة ولا التخيلات ولا الصور الوسواسية ... والمفترض أن يعلمك المعالج طرق التعامل مع الأحداث العقلية الوسواسية وليس من بينها محاولة قمع أو التخلص من الفكرة واقرئي لتعرفي أكثر: قمع الأفكار وفخ العملية الساخرة.
أهم ما يجب أن يكون هدفا علاجيا لك الآن هو علاج الكمالية السريرية التي ضيعت ويمكنها إن بقيت عليها أن تضيع عليك كثيرا من الفرص سواء في إيجاد وظيفة أو الموافقة على خاطب... أي أن هذه السمة (الكمالية) وما يرافقها من اضطراب وسواس قهري (وشركاؤه) تجعل الحصول على العلاج الصحيح أولوية لك ففاتحي معالجك في هذا الأمر... وأخيرا لا نعرف لماذا تركت أدوية الوسواس ونكاد نجزم أنه حصل بغير النقاش في الأمر مع المعالج يعني يفضل أن تعودي إليه لأن آخر تواصل بيننا ظهر على مجانين بتاريخ 8/11/2022... هذا يعني أنك لم تتناولي العقاقير إلا بضعة شهور... وهذا لعمري علاج دوائي مبتسر إضافة إلى الع.س.م المبتسر كذلك... من فضلك كوني على بينة من أن علاج الوسواس القهري يجب أن يكون كاملا متكاملا.
ومرة أخرى أهلا وسهلا بك دائما على موقع مجانين فتابعينا بالتطورات.
ويتبع>>>> : حصار معرفي أو وسواس قهري أنا تعبت ! م7
تعليقات الأعضاء