|
| 
|
أولا أشكر إدارة الموقع على تعاونها معنا في حل المشاكل .. جزاكم الله كل الخير وإن شاء الله يكون حل مشكلتي لديكم.
أنا عمري 26 سنة متزوجة من حوالي خمس سنين، ولدي بنت عندها أربع سنين .. مشكلتي هي تتلخص كالآتي:
أنا كنت في أول فترة الخطوبة بحب خطيبي جدا، وبعد تقريبا شهرين من الخطوبة بدأت تظهر مشاكل عادية ما بين الأسرة وخطيب ابنتهم، وقلت ده إن شاء الله هيتعدل بعد الزواج لأنه كان عصبي جدا وغلاط جدا، ومن النوع اللي هو بيغدر بسهولة.
وبعد الزواج بسنة بدأت المشاكل تكتر وتكتر، ده مش معناه إن السنة الأولى من الزواج كانت كويسة، لا بس أنا كنت بستحمل. وكان سبب المشاكل أن زوجي اترفد من الشغل، وكنا أول السنة من الزواج عايشين على المصالح، إذا عمل مصلحه ماشي ما عملش خلاص يبقى نعيش كده، وأنا علشان بنت ليا أصل ما رضيتش أسيبه في الظروف دي، وقررت إني أنزل أشتغل وأساعده علشان بنتي يكون لها مستقبل.
أنا متعلمة معايا بكالوريوس تجارة، وفعلا نزلت اشتغلت في إحدى شركات المحاسبة، وكان مرتبي معقول، وابتديت أنا أدفع إيجار الشقة وأي حاجة تنقص في البيت أجيبها، وإذا هو محتاج فلوس كنت بديله، وإذا جه عيد كنت أنا اللي بدي لأهله العديات وأجيب له لبس العيد وأجيب لبنتي، لدرجة إني أنا اللي حسيت إن أنا الراجل.
هو لما لقاني متكفلة بكل حاجة بطل ينزل أي مصلحة، واعتمد الاعتماد الأول والأخير على مرتبي .. لما لقيت إن المرتب ما بقاش يكفي ضاعفت ساعات العمل علشان يضاعف مرتبي، وأقدر أربي بنتي وما اخليش بيتي محتاج لحاجة.
هو لا بيروح يدور على شغل ولا بقى ينزل أي مصلحة، وبقى معتمد على الفلوس اللي بياخدها مني، غير ده كله بقى إننا عزلنا كذا مره من الشقة دي للشقة دي .. يعني مش مخليني مستقرة في مكان، ولا حسيت بمعنى إني عروسة خالص، وآخر شقة خدناها كانت إيجار جديد، والمهلة بتاعتها كانت تلت سنين وآخر سنة ليها السنة دي لحد شهر 12 /2022 ، وهو في الفترة دي لا شال حاجة للزمن ولا شاف شقة ولا أصلا نزل يشتغل.
بصراحة أنا كمان تعبت من الشغل، وتعبت من بعاد بنتي لأن بنتي طبعا مع والدتي طول فترة شغلي، تقريبا مش بشوفها غير يوم إجازتي، ومش عارفة آخد قرار في أي حاجة. أنا كنت بفكر إني أتطلق منه .. أولا هو مش راضي .. وأهلي بيقولوا لا ما ينفعش تعيشي في المجتمع ده وأنت مطلقة، بيقولوا إن المجتمع يرفض المرأة المطلقة .. طيب إيه الحل؟
أفضل كده طول عمري بصرف على راجل وبيت وبنتي، ولسه مرحلة التعليم جاية، وأنا كمان عايزة أحس بمشاعر الست المتزوجة اللي متستته زي ما بيقولوا .. أنا من كتر اللي أنا فيه بقيت عديمة الإحساس من ناحيته، وكل لما أبص لأي اتنين متزوجين يصعب علي نفسي .. دي تقولي جوزها جابلها ودي تقولي أنا أخدت شقة تمليك ودي تقولي ابني في مدرسة خاصة... بس أنا والله العظيم مش ببص لعيشة حد ما أنا فضلت خمس سنين على الحال ده وراضية .. بس خلاص تعبت تعبت بجد.
ده غير كده معاملته سئية جدا بالإهانة والضرب كمان، مين اللي يستحمل كده؟!! أنا لاحترامي لنفسي مش عايزة أعمل حاجة غلط .. وقدامي كتير بس لا أنا مؤمنة بالله ومتدينة جدا والحمد لله .. ربنا مزين وجهي مش علشان أستعمله غلط دي نعمة من عند الله لازم أحافظ عليها .... اعذروني أنا طولت عليكم مشكلتي، يمكن أنا اختصرت طول مأساة حياتي والقرف اللي شفته منه ومن أهله كمان .. يا ريت تقولوا لي أعمل إيه؟؟ هل أنا لما أصمم على الطلاق غلط ويبقى ظلمته؟ أو إني أعيش كده وخلاص ويبقى ده نصيبي؟
جزاكم الله كل الخير..
السلام عليكم ورحمة الله وبركاته.
26/4/2022
رد المستشار
شكراً على استشارتك الموقع.
قراءة الاستشارة في البداية يوحي بأن هناك أزمات زوجية يمكن تجاوزها مع تشجيع زوجك الكريم على تغيير نمط حياته والبحث عن عمل يساعده في تنظيم إيقاعه اليومي ويعطي معنى لوجوده كزوج وأب.
بعد ذلك تأتي الفقرة التي تشيرين فيها بأن والدتك هي التي ترعى طفلتك٬ وكنت أظن بأن الزوج هو الذي يتولى رعاية ابنتكم والقيام بواجبات منزلية... ثم تأتي فقرة إهانته وضربه لك وعند ذلك لا يستحق الرجل الذي يضرب زوجته أي احترام ومن الأفضل فراقه.
زوجك تعلم على الكسل ولا يملك أي اندفاع... بصريح العبارة عليه أن يعمل ويكسب رزقه ويؤدي واجباته كزوج وأب ويعاملك بدون أي اعتداء شفوي أو جسدي مهما كان. دون ذلك الطلاق هو الحل الأول والأخير.
وفقك الله.
واقرئي أيضًا:
هل الطلاق أنفعُ لي أم ماذا أفعل؟
كونكر وأنانية آخر حاجة! الحل الطلاق
الطلاق الناجح هو الدواء المر لكليكما
تعليقات الأعضاء