|
| 
|
من وسواس لاكتئاب لقلق معمم م40
السلام عليكم
أنا كشفت أنف وأذن وحنجرة ورحت مركز سمعيات علشان أشوف سبب الطنين، مفيش حاجة غير حاجة طلعت على الطبلة اسمها Tympanosclerosis (تصلب الطبلة)... دكتور أنف وأذن قال لي دي عند ناس كتير وملهاش قيمه تذكر ولا لها تأثير، دكتور ثاني قال لي ممكن تعمل طنين! غريبة أنه قال ممكن هو فيه في الطب حاجة اسمها ممكن!! دكتور ثالث قال اعمل رسم سمع وأقولك طلع كويس قال لي لا مش هي السبب!
دكاترة على النت واحد يقول ممكن وواحد يقول متعملش!! آراءهم متضاربة.. المشكلة في بفكر 24 ساعة يا ترى السبب نفساني ولا منها علما أني بدعي يكون السبب نفساني... عايش في صراع نفسي من التفكير مش قادر أوقف التفكير لدرجة لا تتخيلونها غصب عني مش قادر ً بصحي وأنام بفكر هل ممكن تكون السبب ولا لا والمشكلة مفيش حاجة تؤكد لي لدرجة اليقين .. التفكير مش قادر أسيطر عليه! هل ده طبيعي ولا من طبيعة مرضي هي اللي عاملة كده؟؟ حرفيا نفسي أعيش مرتاح البال والقلق هيموتني
ملحوظة لما قبل كده مكانتش الفكرة دي في دماغي وأن عقلي مقتنع أن الطنين ده نفساني كان بيقل جامد وأحيانا مش بكون سامعه
لما بفكر وأقلق وأدور وأقول ممكن منها ولا لا بيعلى عليّ، أرجوك يا دكتور وائل أعمل إيه؟ مش قادر أوقف التفكير خصوصا إن الطب في الأنف والأذن مش مواكب التطور ومفيش حاجة تأكد مين كلامه صح ومين غلط لدرجة دكتور منهم قال لي دي عاملة زي الوحمة ملهاش لازمة ومتعملش اللي عندك خالص ولا ليها علاقة بالطنين قلت له بس كشفت عندك وقلت لي إني تمام هل مكانتش ظاهرة قال لي كانت ظاهرة وعلشان ملهاش قيمة مقولتش ليك عليها لأني عارف إنك هتوسوس أكتر تقريبا عرف شخصيتي هو الدكتور الوحيد اللي حلل شخصيتي في كل الدكاترة لدرجة إنه حلف إنه مش منها.. كمان قال لي حاجة قال لي دي عندك من يوم ما اتولدت لو هي السبب اشمعنا الطنين مظهرشي من زمان وظهر دلوقتي قال لي ملهاش علاقة،
لكن دماغي مش بتبطل تفكير منها ولا مش منها هي السبب ولا نفساني
ويا رب يكون نفساني لأني هرتاح لو عرفت إنه من القلق والله
3/2/2023
رد المستشار
الابن الفاضل "أحمد" أهلا وسهلا بك على مجانين وشكرا على ثقتك، ومتابعتك خدمة الاستشارات بالموقع.
لو أن غيري من الزملاء كان يعالجك ربما كان عاديا بالنسبة لي أن تقول (غريبة أنه قال ممكن هو فيه في الطب حاجة اسمها ممكن!!) ... أما أن أكون أنا من تتابع معه على الأقل جلساتك السلوكية المعرفية فهذا صادم لي! ... كنت أظنك تستوعب جيدا ما أحكيه وأشرحه وأكرره لك وأطلب منك أن تشرح لي ما فهمته وكنت تبدي أنك فهمت! ... كيف بعد كل ما دار بيني وبينك عن المآلات السيئة لمرضى الأعراض الجسدية ذات المنشأ النفسي (مثل وجود عيوب خلقية ضئيلة أو علامات ترسب للكالسيوم أو غيره (كعلامات تصلب الطبلة) والتي تبقى دون مستوى المرض السريري لكنها يمكن أن تحيل حياته جحيما على تفاهتها) ... وكررت عليك كثيرا أن الطب ليس دائما أبدًا 1+1 =2! وأن غير المفهوم ما يزال أكثر مما تم فهمه لم أكن أقصد الطب النفساني وإنما الطب كله، بل لعلني شرحت لك ظواهر مثل الاستجابة للموه، ومثل الاضطرار الأخير إلى تعليم المريض كيف يتقبل أعراضه بحيث لا تؤثر على حياته.
الأغرب أن لديَّ ذاكرة أنك حكيت لي هذا كله من قبل أظن في جلسة من الجلسات، ولا أدري سبب تكراره؟ ... ربما لتعلن عن تذمرك من صدمتك في الطب (غريبة أنه قال ممكن هو فيه في الطب حاجة اسمها ممكن!!) ... والحقيقة أنه نعم في الطب هناك ربما وهناك ممكن وهناك يا رب! وكلام الطبيب الذي تقول أنه حلل شخصيتك كلام صحيح ولعل تحمله مسؤولية القسم تدل على صدق طبه ومهارته في مناجزة المريض... أرجو أن تتذكر الرياضة اليومية والأكل الصحي وعدم متابعة أخبار الزلزال.
ومرة أخرى أهلا وسهلا بك دائما على موقع مجانين فتابعنا بالتطورات.
ويتبع>>>>>>: من وسواس لاكتئاب لقلق معمم م42
تعليقات الأعضاء